ଅର୍ଥ ସୂତ୍ର: ଏକାଧିକ ବ୍ୟାଙ୍କ୍‌ ଆକାଉଣ୍ଟର ଭଲମନ୍ଦ

ନିଜର ସବୁ ପୁଞ୍ଜି ଗୋଟିଏ ସ୍ଥାନରେ ଠୁଳ କରି ନରଖିବା ଲାଗି ଅର୍ଥ ବିଶେଷଜ୍ଞମାନେ ପରାମର୍ଶ ଦେଇଥାଆନ୍ତି। ଆଗରୁ ଲୋକମାନେ ଗୋ‌ଟିଏ ବ୍ୟାଙ୍କ୍‌ ଆକାଉଣ୍ଟ ରଖୁଥିଲେ। ହେଲେ ‌ଏବେ ଅଧିକାଂଶ ଏକାଧିକ ବ୍ୟାଙ୍କ୍‌ର ଖାତାଧାରକ। ତେବେ ଏକା‌ଧିକ ଆକାଉଣ୍ଟଧାରୀଙ୍କ ପାଇଁ ଟଙ୍କା ସାଇତିବା ଏକପ୍ରକ‌ାରେ ସହଜ ଓ ଲାଭଦାୟକ ବୋଲି କୁହାଯାଏ। କିନ୍ତୁ କେମିତି ଓ କାହିଁକି?
୧. ଉତ୍ତମ ଆର୍ଥିକ ପରିଚାଳନା: ଏକାଧିକ ସଞ୍ଚୟ ଖାତା ରଖିବା ଦ୍ବାରା ଆପଣ ନିଜ ଟଙ୍କାର ଉଚିତ ଉପଯୋଗ କରିପାରିବେ। ଆୟର କିଛି ଅଂଶ ଘରଭଡ଼ା, ‌ସଉଦା, ଦୈନନ୍ଦିନ ଖର୍ଚ୍ଚ ପାଇଁ ଗୋଟିଏ ଜମାଖାତାରେ ଓ ବାକି ଅର୍ଥ ଆଉ ଏକ ଆକାଉଣ୍ଟରେ ସାଇତି ରଖିପାରିବେ। ଏହାଦ୍ବାରା ଆପଣ କେତେ ଟଙ୍କା କୁଆଡ଼େ ଖର୍ଚ୍ଚ କରୁଛନ୍ତି କିମ୍ବା ବଦ୍‌ଖର୍ଚ୍ଚ କରୁଛନ୍ତି ତା’ର ଆକଳନ ସହଜ ହୋଇଥାଏ।
୨. ଜରୁରୀ ପାଣ୍ଠି: ଅପ୍ରତ୍ୟାଶିତ ଖର୍ଚ୍ଚ ପାଇଁ ଏକ ଜରୁରିକାଳୀନ ପାଣ୍ଠି ସୁରକ୍ଷା କବଚ ସଦୃଶ କାମ କରେ। ଜରୁରୀ ପରିସ୍ଥିତି ପାଇଁ ଏକ ପୃଥକ୍‌ ଆକାଉଣ୍ଟରେ ଅର୍ଥ ରହିବା ଦ୍ବାରା ଆପଣଙ୍କ ଯାବତୀୟ ଅନାବଶ୍ୟକ ଖର୍ଚ୍ଚ କମ୍‌ ହୋଇଯାଇପାରେ।
୩. ସୁଧରେ ବୃଦ୍ଧି: କିଛି ବ୍ୟାଙ୍କ୍‌ ଜମାକାରୀଙ୍କୁ ଅଧିକ ସୁଧ ପ୍ରଦାନ କରିଥାଆନ୍ତି। ଏଣୁ ବିଭିନ୍ନ ବ୍ୟାଙ୍କ୍‌ରେ ଆକାଉଣ୍ଟ ଖୋଲି ସଞ୍ଚୟ କରିବା ଦ୍ବାରା ଅଧିକ ସୁଧ ମିଳିବାର ସମ୍ଭାବନା ଥାଏ।
୪. ବିକଳ୍ପ ବ୍ୟାଙ୍କିଂ ସୁବିଧା: ବର୍ତ୍ତମାନ ପ୍ରତିଟି ବ୍ୟାଙ୍କ୍‌ ଟେକ୍ନୋଲୋଜି ଉପରେ ନିର୍ଭରଶୀଳ। ଅର୍ଥାତ୍‌ ବ୍ୟାଙ୍କ୍‌ର ଯାବତୀୟ କାମ ଇଣ୍ଟର୍‌ନେଟ୍‌ ଦ୍ବାରା ହୋଇଥାଏ। ସର୍ଭର ସମ୍ବନ୍ଧୀୟ ସମସ୍ୟା ବା ଲିଙ୍କ୍‌ ଫେଲ୍‌ ହେଲେ ଘଣ୍ଟା ଘଣ୍ଟା ଧରି କାରବାର ଠପ୍‌ ହୋଇଯାଏ। ଏକାଧିକ ଅାକାଉଣ୍ଟ ଥିଲେ ଆପଣ ଏପରି ଅସୁବିଧାର କମ୍‌ ସମ୍ମୁଖୀନ ହେବେ।
 ଏକାଧିକ ଆକାଉଣ୍ଟ ପାଇଁ କ’ଣ ଜରୁରି?
ଏକାଧିକ ବ୍ୟାଙ୍କ୍‌ ଆକାଉଣ୍ଟ ଖୋଲିବା ପାଇଁ ସେମିତି କିଛି ବିଶେଷ ନିୟମ କି ଯୋଗ୍ୟତା ସର୍ତ୍ତ ନାହିଁ। ଆପଣ ଯେତେଟା ଆକାଉଣ୍ଟ ଚାହିଲେ ଖୋଲିପାରିବେ। ଏଥିପାଇଁ ବ୍ୟାଙ୍କ୍‌ର କିଛି ନିୟମାବଳୀ ପୂରଣ କରିବାକୁ ପଡ଼ିବ।
 ବୟସ: ଆପଣଙ୍କ ସର୍ବନିମ୍ନ ବୟସ ୧୮ବର୍ଷ ହୋଇଥିବା ଆବଶ୍ୟକ। ନାବାଳକ ହୋଇଥିଲେ, ପିତାମାତା କିମ୍ବା ଅଭିଭାବକଙ୍କ ଦ୍ବାରା ଆକାଉଣ୍ଟ ପରିଚାଳିତ ହେବ।
 ଆପଣ ଭାରତର ନାଗରିକ କିମ୍ବା ଜଣେ ପ୍ରବାସୀ ଭାରତୀୟ ହୋଇଥିବା ଜରୁରି।
 କେୱାସି ଅନୁପାଳନ: ଭାରତୀୟ ରିଜର୍ଭ ବ୍ୟାଙ୍କ୍‌ର ସମସ୍ତ କେୱାସି ନିର୍ଦ୍ଦେଶାବଳୀକୁ ପାଳନ କରିବା ବିଧେୟ।
ଏହାବାଦ୍‌ ଆପଣଙ୍କୁ ପ୍ରଥମେ ଆପଣଙ୍କ ମୋଟ୍‌ ଆୟ ଅନୁସାରେ ଏକ ବଜେଟ୍‌ ପ୍ରସ୍ତୁତ କରିବାକୁ ପଡ଼ିବ। ଆପଣ କେତେ ଖର୍ଚ୍ଚ କରିବେ ଓ କେ‌ତେ ସଞ୍ଚୟ କରିବେ ଏହାର ସଂପୂର୍ଣ୍ଣ ହିସାବ ରଖିବା ନିହାତି ଜରୁରି। ନହେଲେ ଏତେଗୁଡ଼ିଏ ବ୍ୟାଙ୍କ୍‌ ଆକାଉଣ୍ଟ ପରିଚାଳନା କରିବା ଅସୁବିଧାଜନକ ହୋଇପା‌େର। ଏହାସହିତ ବିଭିନ୍ନ ବ୍ୟାଙ୍କ୍‌ର ରକ୍ଷଣାବେକ୍ଷଣ ଦେୟ, ସୁଧ ଓ ଅନ୍ୟାନ୍ୟ ଚାର୍ଜ ଲାଗି ଆପଣଙ୍କ ପକେଟ୍‌ରୁ ଅଧିକ ଟଙ୍କା ବି ଯାଇପାରେ।
ସୌଜନ୍ୟ-ସମ୍ୱାଦ