ଆଇସିସି ଟେଷ୍ଟ୍‌ ମାନ୍ୟତା: କୋହଲିଙ୍କୁ ଟପିଲେ ପନ୍ତ

ନୂଆଦିଲ୍ଲୀ: ସଦ୍ୟ ପ୍ରକାଶିତ ଆଇସିସି ଟେଷ୍ଟ୍‌ ମାନ୍ୟତାରେ ଭାରତୀୟ ୱିକେଟ୍‌ରକ୍ଷକ ବ୍ୟାଟର୍‌ ଋଷଭ ପନ୍ତ ଷଷ୍ଠ ସ୍ଥାନକୁ ଉଠିଛନ୍ତି। ଉପରକୁ ଯିବାରେ ସେ ଅନ୍ୟତମ ବ୍ୟାଟର୍‌ ବିରାଟ କୋହଲିଙ୍କୁ ପଛରେ ପକାଇଛନ୍ତି। ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟେଷ୍ଟ୍‌ରେ ୯୯ ରନ୍‌ର ବ୍ୟାଟିଂ କରିବା ପରେ ପନ୍ତଙ୍କୁ ତିନିଟି ସ୍ଥାନ ଚଢ଼ିବାକୁ ସୁଯୋଗ ମିଳିଥିଲା। କିନ୍ତୁ ପ୍ରଥମ ପାଳିରେ ୭୦ ରନ୍‌ କରିଥିବା କୋହଲି ଗୋଟିଏ ସ୍ଥାନ ତଳକୁ ଖସି ଅଷ୍ଟମରେ ଅଛନ୍ତି। ପ୍ରାରମ୍ଭିକ ବ୍ୟାଟର୍‌ ଯଶସ୍ବୀ ଜୟସ୍ବାଲ୍‌ ସର୍ବୋଚ୍ଚ ମାନ୍ୟତାପ୍ରାପ୍ତ ଭାରତୀୟ ଖେଳାଳି ଭାବେ ଚତୁର୍ଥ ସ୍ଥାନରେ ଅଛନ୍ତି।

ଭାରତୀୟ ଅଧିନାୟକ ରୋହିତ ଶର୍ମା ଦୁଇଟି ସ୍ଥାନ ତଳକୁ ଖସି ପଞ୍ଚଦଶ ସ୍ଥାନରେ ଶ୍ରୀଲଙ୍କାର ଦିମୁଥ କରୁଣାରତ୍ନେଙ୍କ ସହିତ ରହିଛନ୍ତି। ଇଂଲଣ୍ଡ ତାରକା ଜୋ ରୁଟ୍‌ ଶୀର୍ଷ ସ୍ଥାନ ବଜାୟ ରଖିଛନ୍ତି। ବୋଲରଙ୍କ ତାଲିକାରେ ଯଶପ୍ରୀତ୍‌ ବୁମ୍‌ରା ଶୀର୍ଷରେ ଥିବା ବେଳେ ତାଙ୍କ ପଛକୁ ରବିଚନ୍ଦ୍ରନ ଅଶ୍ବିନ ଅଛନ୍ତି। ରବୀନ୍ଦ୍ର ଜାଡ଼େଜା ସପ୍ତମ ସ୍ଥାନରେ ରହି ଶୀର୍ଷ ୧୦ ଜଣଙ୍କ ମଧ୍ୟରେ ତୃତୀୟ ଭାରତୀୟ ହୋଇପାରିଛନ୍ତି।

ସୌଜନ୍ୟ – ସମ୍ବାଦ