ଆଜି ଆସିବ ସମ୍ଭାଲ ଘଟଣାର ସୁପ୍ରିମ ରାୟ । ମୁଖ୍ୟ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର କରିବେ ଶୁଣାଣି

କନକ ବ୍ୟୁରୋ : ଆଜି ଆସିବ ସମ୍ଭାଲ ଘଟଣାର ସୁପ୍ରିମ ରାୟ । ଜାମା ମସଜିଦ କମିଟି ନିମ୍ନ ଅଦାଲତଙ୍କ ସର୍ଭେ ଆଦେଶକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛି । ମୁଖ୍ୟ ବିଚାରପତି ଜଷ୍ଟିସ ସଞ୍ଜୀବ ଖାନ୍ନାଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିବେ । ସମ୍ଭାଲ ମସଜିଦ୍ ବିବାଦ ମାମଲାରେ ଶାହି ଜାମା ମସଜିଦ୍ କମିଟି ପକ୍ଷରୁ ଦାୟର ଆବେଦନର ଶୁଣାଣି ଆଜି ସୁପ୍ରିମକୋର୍ଟରେ ହେବ । ନିମ୍ନ ଅଦାଲତଙ୍କ ନିଷ୍ପତ୍ତି ଉପରେ ତୁରନ୍ତ ରୋକ ଲଗାଇବାକୁ ମୁସଲମାନ ପକ୍ଷ ଦାବି କରିଛନ୍ତି । ଏହା ଏକ ଅସାଧାରଣ ମାମଲା ବୋଲି ଆବେଦନରେ ଦର୍ଶାଯାଇଛି । ତେଣୁ ନିମ୍ନ ଅଦାଲତଙ୍କ ନିଷ୍ପତ୍ତି ଉପରେ ଅଦାଲତ ତୁରନ୍ତ ରୋକ୍ ଲଗାଇବା ଦରକାର । ଏକ ଟିମ୍ ଉତ୍ତରପ୍ରଦେଶର ସମ୍ଭାଲ ଜିଲ୍ଲାରେ ଥିବା ଜାମା ମସଜିଦ୍ ସର୍ଭେ କରିବାକୁ ଯାଇଥିଲେ । ଯାହା ପରେ ହିଂସା କାଣ୍ଡ ଘଟିଥିଲା ।

ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ସଞ୍ଜୀବ ଖାନ୍ନାଙ୍କୁ ନେଇ ଗଠିତ ଖଣ୍ଡପୀଠ ଆଜି ଏହି ମାମଲାର ଶୁଣାଣି କରିବେ । ନଭେମ୍ବର ୧୯ ତାରିଖରେ ସମ୍ଭାଲରେ ଅଦାଲତଙ୍କ ନିର୍ଦ୍ଦେଶକ୍ରମେ ପ୍ରଥମ ସର୍ଭେ କରାଯାଇଥିଲା । ସେବେଠାରୁ ଉତ୍ତେଜନାର ବାତାବରଣ ସୃଷ୍ଟି ହୋଇଥିଲା । ଏନେଇ କୋର୍ଟରେ ଏକ ପିଟିସନ ଦାଖଲ କରାଯାଇଥିଲା । ଦାବି କରାଯାଇଥିଲା ଯେ ସମ୍ଭାଲରେ ଯେଉଁ ସ୍ଥାନରେ ଜାମା ମସଜିଦ୍ ନିର୍ମାଣ ହୋଇଛି ସେଠାରେ ପୂର୍ବରୁ ମନ୍ଦିର ଥିଲା । ରବିବାର ସର୍ଭେ ଟିମ୍ ପୁଣି ଥରେ ସର୍ଭେ ପାଇଁ ଏଠାକୁ ଯାଇଥିଲେ । କିନ୍ତୁ ଭିଡ଼ ଜମିବାରୁ ଲୋକେ ପୁଲିସ ଉପରକୁ ପଥର ଫିଙ୍ଗିଥିଲେ । ଯାହା ପରେ ହିଂସା କାଣ୍ଡ ଘଟିଥିଲା । ଏହି ସମୟରେ ପୁଲିସ ଓ ବିକ୍ଷୋଭକାରୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା । ଯେଉଁଥିରେ ୫ ଜଣଙ୍କ ମୃତ୍ୟୁ ହୋଇଥିଲା । ଏଥିରେ ୨୫ ଜଣ ଆହତ ହୋଇଥିଲେ । ସବ୍ ଇନ୍ସପେକ୍ଟର ଦୀପକ ରାଠୀଙ୍କ ଅଭିଯୋଗ କ୍ରମେ ଏହି ହିଂସା ମାମଲାରେ ପ୍ରଥମ ଏଫ୍ଆଇଆର୍ ରୁଜୁ ହୋଇଥିଲା । ଏହି ମାମଲାରେ ପ୍ରାୟ ୮୦ ଅଜ୍ଞାତ ଅଭିଯୁକ୍ତଙ୍କ ନାମ ରହିଛି। ଏହି ଲୋକମାନେ ଭିଡ଼କୁ ଉସକାଇଥିବା ଅଭିଯୋଗ ହୋଇଛି ।
ସୌଜନ୍ୟ-କନକ