ଇସ୍ରାଏଲ-ତୁର୍କୀ ଯୁଦ୍ଧମୁହାଁ: ଏର୍ଦୋଗନଙ୍କ ଯୋଗୁ ପରିସ୍ଥିତି ଉତ୍ତେଜନାପୂର୍ଣ୍ଣ

ତେଲ ଅଭିବ: ଗାଜା ଏବଂ ଲେବାନନ ପରେ ଇସ୍ରାଏଲ ଏବଂ ତୁର୍କୀ ମଧ୍ୟରେ ସମ୍ପର୍କ ତିକ୍ତ ହେବାରେ ଲାଗିଛି। ସିରିଆରେ ତୁର୍କୀ ସମର୍ଥିତ ଏଚଟିଏସ ବାହିନୀ ବିଦ୍ରୋହୀଙ୍କୁ କାବୁ କରିବା ପରେ ବର୍ତ୍ତମାନ ତୁର୍କୀ ସୈନ୍ୟଙ୍କ ସଂଖ୍ୟା ସିରିଆରେ ରଣନୀତିଗତ ଭାବରେ ବୃଦ୍ଧି ହେବାରେ ଲାଗିଛି। ତୁର୍କୀ ସୈନ୍ୟ ଏବଂ ତାଙ୍କର ସହାୟକ ଗୋଷ୍ଠୀ ସିରିଆରେ କୁର୍ଦ୍ଦମାନଙ୍କ ଉପରେ ଆକ୍ରମଣ ଜାରି ରଖିଛନ୍ତି।

କୁର୍ଦ୍ଦଙ୍କର ସୁରକ୍ଷା ପାଇଁ ୨୦୦୦ ଆମେରିକୀୟ ସୈନିକ ନିୟୋଜିତ ହୋଇଥିଲେ। କୁର୍ଦ୍ଦମାନେ ବର୍ତ୍ତମାନ ଇସ୍ରାଏଲରୁ ସାହାଯ୍ୟ ମାଗିଛନ୍ତି। ଗାଜାରେ ଇସ୍ରାଏଲର ଆକ୍ରମଣ ପରେ ତୁର୍କୀ ସହିତ ଇସ୍ରାଏଲର ସମ୍ପର୍କ ଅତି ଖରାପ ହେବାରେ ଲାଗିଥିଲା।

ସିରିଆର ସଙ୍କଟଜନକ ସ୍ଥିତି ପରେ ଦୁଇ ଦେଶ ମଧ୍ୟରେ ପ୍ରତ୍ୟକ୍ଷ ସାମରିକ ବିବାଦର ବିପଦ ସୃଷ୍ଟି ହେବାରେ ଲାଗିଛି। ତୁର୍କୀ ରାଷ୍ଟ୍ରପତି ରିସେପ୍ ତାଇପ ଏର୍ଦୋଗନ୍ ଇସ୍ରାଏଲ ବିରୋଧୀ ବିବୃତି ଦେଇ ନିଜ ଦେଶରେ ଉତ୍ତେଜନାମୂଳକ ପରିବେଶ ସୃଷ୍ଟି କରୁଛନ୍ତି।

ତୁର୍କୀ କହିଛି ଯେ, କୁର୍ଦ୍ଦମାନେ ଦେଶର ସୁରକ୍ଷା ପାଇଁ ବିପଦ କାରଣ ସେମାନେ ଏକ ପୃଥକ ଦେଶ ଗଠନ କରିବାକୁ ଚାହୁଁଛନ୍ତି। ଏଥିରେ ତୁର୍କୀ ଅଞ୍ଚଳ ମଧ୍ୟ ଅନ୍ତର୍ଭୁକ୍ତ କରିବାର ଯୋଜନା ଅଛି। ଇତିମଧ୍ୟରେ ବୁଧବାର ତୁର୍କୀ ଲୋକେ ଇସ୍ତାନବୁଲରେ ଇସ୍ରାଏଲ ବିରୋଧରେ ପ୍ରଦର୍ଶନ କରିଥିଲେ ଏବଂ ହମସକୁ ସମର୍ଥନ କରିଥିଲେ। ଗାଜା ଯୁଦ୍ଧ ଆରମ୍ଭରୁ ସମଗ୍ର ମଧ୍ୟପ୍ରାଚ୍ୟର ଭୌଗୋଳିକ ଦୃଶ୍ୟ ପରିବର୍ତ୍ତନ ହେଉଛି।

ଇସ୍ରାଏଲର ତେଲ ଅଭିବ ବିଶ୍ୱବିଦ୍ୟାଳୟର ତୁର୍କୀ ବ୍ୟାପାର ଉପରେ ବିଶେଷଜ୍ଞ ଡକ୍ଟର ହେଟନ୍ କୋହେନ୍ କହିଛନ୍ତି ଯେ, ପ୍ରଥମେ ଏର୍ଦୋଗନ ଅନୁଭବ କରିଥିଲେ, ହମାସ ବିରୁଦ୍ଧରେ ଇସ୍ରାଏଲର ଆକ୍ରମଣ ଅନ୍ୟ ଏକ ବିବାଦ। ତେବେ କିଛି ସପ୍ତାହ ପରେ ତୁର୍କୀ ହୃଦୟଙ୍ଗମ କଲା ଯେ, ଇସ୍ରାଏଲ ହମାସ ବିରୁଦ୍ଧରେ ସମ୍ପୂର୍ଣ୍ଣ ଯୁଦ୍ଧ ଆରମ୍ଭ କରିଛି।

କୋହେନ କହିଛନ୍ତି, ଏର୍ଦୋଗନ ମଧ୍ୟ ସମାନ ମୁସଲିମ ଭାଇଚାରା ଧାରଣା ଦ୍ୱାରା ପ୍ରେରିତ, ଯାହା ହମାସକୁ ପ୍ରେରଣା ଯୋଗାଉଛି। ଇସ୍ରାଏଲ ସହିତ ସମ୍ପର୍କକୁ ନଷ୍ଟ କରିଦେଇଥିବା ଏର୍ଦୋଗନ କହିଛନ୍ତି, ସିରିଆର କୁର୍ଦ୍ଦମାନଙ୍କ ସହ ଇସ୍ରାଏଲର ଗୁପ୍ତ ବନ୍ଧୁତା ରହିଛି। କୁର୍ଦ୍ଦମାନଙ୍କ ସାହାଯ୍ୟରେ ତୁର୍କୀକୁ ଇସ୍ରାଏଲ ଏକ ଉପଯୁକ୍ତ ଉତ୍ତର ଦେଇପାରେ।

ବଶର ଅଲ-ଅସଦ ସରକାରଙ୍କ ପତନ ପରେ ତୁର୍କୀ ସିରିଆରେ ଏକ ବଡ଼ ସୁଯୋଗ ଦେଖୁଛି। ସିରିଆ ଏବଂ ଇସ୍ରାଏଲର ସୀମା ମିଳିତ ହେଲେ ଭବିଷ୍ୟତରେ ଇହୁଦୀ ରାଷ୍ଟ୍ର ପାଇଁ ବିପଦ ସୃଷ୍ଟି କରିପାରେ। ସେ କହିଛନ୍ତି ଯେ, ସିରିଆ ଏବଂ ଇସ୍ରାଏଲର ସୀମା ଦୀର୍ଘ ବର୍ଷ ଧରି ଶାନ୍ତିପୂର୍ଣ୍ଣ ଥିଲା କିନ୍ତୁ ବର୍ତ୍ତମାନ ତୁର୍କୀ ଇସ୍ରାଏଲ୍ ସୀମା ନିକଟରେ ପହଞ୍ଚିବା ପରେ ଏଠାରେ ମଧ୍ୟ ଉତ୍ତେଜନା ଦେଖାଦେଇପାରେ।

ତୁର୍କୀ ସମ୍ବନ୍ଧୀୟ ଇସ୍ରାଏଲର ଅନ୍ୟ ଜଣେ ବିଶେଷଜ୍ଞ ପ୍ରଫେସର ଇଫ୍ରାଟ ଆଭିଭ କହିଛନ୍ତି ଯେ, ଭବିଷ୍ୟତରେ ଇସ୍ରାଏଲ ଏବଂ ତୁର୍କୀ ମଧ୍ୟରେ ସାମରିକ ବିବାଦ ହୋଇପାରେ ବୋଲି ବିପଦ ରହିଛି। ଏହି ଅଞ୍ଚଳରେ ଏଭଳି ସବୁ ପ୍ରକାର ଘଟଣା ଘଟିଥିବାରୁ ଏହା ଅପ୍ରତ୍ୟାଶିତ ବୋଲି ସେ କହିଛନ୍ତି।

ବିଶେଷଜ୍ଞମାନେ କହିଛନ୍ତି, ଗତ ଦଶନ୍ଧି ଧରି ତୁର୍କୀ ଏବଂ ଇସ୍ରାଏଲ୍ ମଧ୍ୟରେ ସମ୍ପର୍କ ଅତ୍ୟନ୍ତ ତିକ୍ତ ଥିଲା। ବର୍ତ୍ତମାନ ତୁର୍କୀ ଇସ୍ରାଏଲର ଦ୍ୱାରସ୍ଥ ହୋଇଛି। ଏହି ସମୟରେ, ଇଜିପ୍ଟର ବୈଦେଶିକ ମନ୍ତ୍ରୀ ବଦର ଅବଦେଲତି ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନଙ୍କ ସହ ଫୋନରେ କଥା ହୋଇଥିଲେ। ଏହି ବାର୍ତ୍ତାଳାପରେ ସେ ଗାଜା ଷ୍ଟ୍ରିପ ଏବଂ ସିରିଆର ପରିସ୍ଥିତି ବିଷୟରେ ଆଲୋଚନା କରିଥିଲେ। ଇଜିପ୍ଟର ବୈଦେଶିକ ମନ୍ତ୍ରଣାଳୟ ଏହି ସୂଚନା ଦେଇଛି।

ଶନିବାର ରାତିରେ ହୋଇଥିବା ଆଲୋଚନା ସମୟରେ ଅବଦେଲତି ଗାଜାରେ ତୁରନ୍ତ ଅସ୍ତ୍ରବିରତି ପାଇଁ ଆଞ୍ଚଳିକ ତଥା ଅନ୍ତର୍ଜାତୀୟ ଉଦ୍ୟମ ଜାରି ରଖିବା ଉପରେ ଗୁରୁତ୍ୱାରୋପ କରିଛନ୍ତି। ସେ ଏହା ମଧ୍ୟ କହିଛନ୍ତି ଯେ କୌଣସି ବାଧା ବିନା ଗାଜାକୁ ମାନବିକ ସହାୟତା ନିଶ୍ଚିତ କରାଯିବା ଆବଶ୍ୟକ।

ଜିନହୁଆ ନ୍ୟୁଜ୍ ଏଜେନ୍ସି ରିପୋର୍ଟ ଅନୁଯାୟୀ, ପାଲେଷ୍ଟାଇନ ଲୋକଙ୍କ ବିରୋଧରେ ଆକ୍ରମଣାତ୍ମକ ନୀତି ବନ୍ଦ କରିବାକୁ ଇଜିପ୍ଟର ବୈଦେଶିକ ମନ୍ତ୍ରୀ ଦାବି କରିଛନ୍ତି। ଗାଜାର ସ୍ୱାସ୍ଥ୍ୟ ଭିତ୍ତିଭୂମି ଏବଂ ଡାକ୍ତରଖାନାକୁ ଟାର୍ଗେଟ କରିବା ପାଇଁ ସେ ଇସ୍ରାଏଲର ରଣନୀତିକୁ ଦୃଢ଼ ବିରୋଧ କରିଥିଲେ।

ହମାସ ଆତଙ୍କବାଦୀଙ୍କ ଆକ୍ରମଣର ଜବାବରେ ଇସ୍ରାଏଲ ୭ ଅକ୍ଟୋବର ୨୦୨୩ରେ ଗାଜା ଉପରେ ଏକ ବଡ଼ ଧରଣର ଆକ୍ରମଣ କରିଥିଲା। ଏହି ଆକ୍ରମଣରେ ପ୍ରାୟ ୧୨୦୦ ଇସ୍ରାଏଲ ଜନସାଧାରଣ ପ୍ରାଣ ହରାଇଥିଲେ ଏବଂ ପ୍ରାୟ ୨୫୦ ଜଣଙ୍କୁ ବନ୍ଧକ ରଖାଯାଇଥିଲା।

ସୌଜନ୍ୟ- ସମ୍ୱାଦ