ଇସ୍ରୋର ପରବର୍ତ୍ତୀ ମୁଖ୍ୟ ଭି ନାରାୟଣନ କିଏ?: ଚନ୍ଦ୍ରଯାନ-୩ ପ୍ରପଲ୍‌ସନ୍‌ର ଆର୍କିଟେକ୍ଟ

ବେଙ୍ଗାଲୁରୁ: ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ)ର ବିଶିଷ୍ଟ ବୈଜ୍ଞାନିକ ଡ. ଭି ନାରାୟଣନ ୨୦୨୫ ଜାନୁଆରି ୧୪ରେ ଏସ୍ ସୋମନାଥଙ୍କ ସ୍ଥାନରେ ପରବର୍ତ୍ତୀ ଅଧ୍ୟକ୍ଷ ହେବାକୁ ଯାଉଛନ୍ତି। ବର୍ତମାନ ସେ ଲିକ୍ୱିଡ୍ ପ୍ରପଲସନ ସିଷ୍ଟମ୍ ସେଣ୍ଟର (ଏଲ୍‌ପିଏସ୍‌ସି)ର ନିର୍ଦ୍ଦେଶକ ଭାବରେ କାର୍ଯ୍ୟ କରୁଛନ୍ତି, ଯେଉଁଠାରେ ସେ ପ୍ରାୟ ଚାରି ଦଶନ୍ଧି ଧରି ଭାରତର ମହାକାଶ ପ୍ରୟାସରେ ଯଥେଷ୍ଟ ଅବଦାନ ଦେଇଛନ୍ତି। ଡକ୍ଟର ନାରାୟଣନ ୧୯୮୪ରେ ଇସ୍ରୋରେ ଯୋଗ ଦେଇଥିଲେ ଏବଂ ତାଙ୍କ କ୍ୟାରିୟରରେ ବିଭିନ୍ନ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଛନ୍ତି। ରକେଟ୍ ଓ ମହାକାଶଯାନ ପ୍ରପଲ୍‌ସନ୍‌ରେ ତାଙ୍କ ଦକ୍ଷତା ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପରେ ପ୍ରମୁଖ ଭୂମିକା ଗ୍ରହଣ କରିଛି।

ଉଲ୍ଲେଖଯୋଗ୍ୟ, ନାରାୟଣନ ଜିଏସ୍‌ଏଲ୍‌ଭି ଏମ୍‌କେ-୩ ଯାନର ସି-୨୫ କ୍ରାୟୋଜେନିକ୍ ପ୍ରୋଜେକ୍ଟ ପାଇଁ ପ୍ରକଳ୍ପ ନିର୍ଦ୍ଦେଶକ ଥିଲେ ଏବଂ ଏହି ଉତ୍‌କ୍ଷେପଣ ଯାନ ପାଇଁ ଏକ ଗୁରୁତ୍ୱପୂର୍ଣ୍ଣ ଉପାଦାନ ସି-୨୫ ଷ୍ଟେଜ୍‌କୁ ସଫଳତାର ସହ ବିକଶିତ କରିବା ପାଇଁ ତାଙ୍କ ଦଳକୁ ନେତୃତ୍ୱ ଦେଇଥିଲେ। ତାଙ୍କ ନେତୃତ୍ୱରେ ଏଲ୍‌ପିଏସ୍‌ସି ବିଭିନ୍ନ ଇସ୍ରୋ ମିସନ ପାଇଁ ୧୮୩ଟି ଲିକ୍ୱିଡ୍ ପ୍ରପଲସନ ସିଷ୍ଟମ୍ ଓ କଣ୍ଟ୍ରୋଲ ପାୱାର ପ୍ଲାଣ୍ଟ ପ୍ରଦାନ କରିଛି, ଯେଉଁଥିରେ ପିଏସ୍‌ଏଲ୍‌ଭି ଓ ଜିଏସ୍‌ଏଲ୍‌ଭି କାର୍ଯ୍ୟକ୍ରମରେ ଗୁରୁତ୍ୱପୂର୍ଣ୍ଣ ଅବଦାନ ରହିଛି। ତାଙ୍କ କାର୍ଯ୍ୟ ଚନ୍ଦ୍ରଯାନ-୨, ଚନ୍ଦ୍ରଯାନ-୩ ଓ ଆଦିତ୍ୟ ମହାକାଶଯାନ ଭଳି ଉଲ୍ଲେଖନୀୟ ଅଭିଯାନରେ ବିସ୍ତାରିତ ହୋଇ ଭାରତର ମହାକାଶ ସାମର୍ଥ୍ୟକୁ ଆଗକୁ ବଢ଼ାଇଛି ଏବଂ  ତାଙ୍କର ବହୁମୁଖୀ ପ୍ରତିଭା ଓ ପ୍ରତିବଦ୍ଧତାକୁ ପ୍ରଦର୍ଶିତ କରିଛି।

ଡକ୍ଟର ନାରାୟଣନ   ଏରୋସ୍ପେସ୍ ଇଞ୍ଜିନିୟରିଂରେ ପିଏଚ୍‌ଡି କରିବା ସହ ଆଇଆଇଟି ଖଡଗପୁରରୁ ପ୍ରଥମ ସ୍ଥାନ ହାସଲ କରି ଏମ୍‌ଟେକ୍ ହାସଲ କରିଛନ୍ତି। ଆଇଆଇଟି ଖଡଗପୁରରୁ ରୌପ୍ୟ ପଦକ, ଭାରତୀୟ ମହାକାଶଚାରୀ ସୋସାଇଟି ପକ୍ଷରୁ ସ୍ୱର୍ଣ୍ଣ ପଦକ   ସମେତ ଅନେକ ସମ୍ମାନଜନକ ପୁରସ୍କାରରେ ତାଙ୍କର ଶିକ୍ଷାଗତ ଉତ୍କର୍ଷ ସ୍ୱୀକୃତି ପାଇଛି। ମାନବ ମହାକାଶ ଯାତ୍ରା ଉପରେ ଧ୍ୟାନ ଦେବା ଓ ପରବର୍ତ୍ତୀ ପିଢ଼ିର ଉତ୍‌କ୍ଷେପଣ ଯାନ ବିକଶିତ କରିବା ଡକ୍ଟର ନାରାୟଣନଙ୍କ ଲକ୍ଷ୍ୟ ରହିଛି। ଦୁଇ ବର୍ଷ ପାଇଁ ଭାରତୀୟ ମହାକାଶ ଏଜେନ୍ସିର ମୁଖ୍ୟ ଭାବରେ ଡ. ନାରାୟଣନ ଚନ୍ଦ୍ରଯାନ-୪, ଗଗନଯାନ ମିସନ, ଶୁକ୍ରଯାନ ମିସନ, ମଙ୍ଗଳଯାନ-୨ ସମେତ ଭାରତର ଅନେକ ପ୍ରମୁଖ ମିସନର ବିକାଶ ଏବଂ ପୁନଃବ୍ୟବହାରଯୋଗ୍ୟ ଉତ୍‌କ୍ଷେପଣ ଯାନର ବିକାଶରେ ପ୍ରମୁଖ ଭୂମିକା ଗ୍ରହଣ କରିବେ।

ସୌଜନ୍ୟ – ସମ୍ୱାଦ