ଏଇ ଭାରତରେ

କୁହାଯାଏ ଜ୍ଞାନ ଅର୍ଜନ କରିବାର କୌଣସି ନିର୍ଦ୍ଦିଷ୍ଟ ବୟସ ନ ଥାଏ। ସେଥିପାଇଁ ତ ୮୧ ବର୍ଷ ବୟସରେ ବି ପୁଣି ଥରେ ପାଠ ପଢ଼ିବା ଆରମ୍ଭ କରିଛନ୍ତି ସତ୍‌ପାଲ ଅରୋରା। ରାଜସ୍ଥାନ ଚିତ୍ତୋରଗଡ଼ର ପ୍ରତାପଗଡ଼ ଗ୍ରାମରେ ତାଙ୍କ ଘର। କିଛି ଦିନ ତଳେ ସେ ଏଲ୍‌ଏଲ୍‌ବି ଡିଗ୍ରି କରିବା ପାଇଁ କଲେଜରେ ନାମ ଲେଖାଇଛନ୍ତି। ୮୧ ବର୍ଷୀୟ ସତ୍‌ପାଲ ଏବେ ଅନ୍ୟ ଛାତ୍ରୀଛାତ୍ରଙ୍କ ସହିତ ଏକାଠି ବସି ନିୟମିତ କ୍ଲାସ କରୁଛନ୍ତି। ପାଠ ବିଷୟରେ ଅନ୍ୟ ଛାତ୍ରଙ୍କ ସହିତ ଚର୍ଚ୍ଚା ବି କରୁଛନ୍ତି। ନୂଆ ପିଢିର ପିଲାଙ୍କ ସହିତ ବସି ପାଠ ପଢ଼ିବା ପାଇଁ ତାଙ୍କର ଆଦୌ ସଙ୍କୋଚ ନାହିଁ। ୪୦ ବର୍ଷ ପରେ ପୁଣି ଥରେ ପାଠ ପଢ଼ା ଆରମ୍ଭ କରି ସେ ବେଶ୍‌ ଉତ୍ସାହିତ ଅଛନ୍ତି। ସତ୍‌ପାଲଙ୍କୁ କଲେଜରେ ପଢୁଥିବାର ଦେଖି ଅନ୍ୟ ଛାତ୍ର ତଥା ଷ୍ଟାଫ୍‌ମାନେ ବି ବେଶ୍‌ ଉତ୍ସାହିତ ଅଛନ୍ତି। ଡିଗ୍ରୀ କରିବା ପୂର୍ବରୁ ସତ୍‌ପାଲ ପ୍ରଥମେ ତାଙ୍କର ଜଣେ ଅଧ୍ୟାପକ ବନ୍ଧୁଙ୍କ ସହ ପରାମର୍ଶ କରିବା ପରେ ନାମ ଲେଖାଇଛନ୍ତି। ତାଙ୍କ କହିବା ଅନୁସାରେ ବୟସ କେବେ ହେଲେ କୌଣସି କାମରେ ବାଧା ସୃଷ୍ଟି କରିପାରେ ନାହିଁ। ମନର ଉତ୍ସାହ ଥିଲେ ସବୁ କାମ କରିହେବ। ସବୁ ମଣିଷ ପ୍ରତି ମୁହୂର୍ତ୍ତରେ ନୂଆ କିଛି ଶିଖିବା ପାଇଁ ଚେଷ୍ଟା ଜାରି ରଖିବା ଦରକାର। ତେବେ ତାଙ୍କର ଏଭଳି ଏକ ପ୍ରୟାସ ଏବେ ଅନ୍ୟମାନଙ୍କ ପାଇଁ ପ୍ରେରଣାଦାୟକ ହୋଇପାରିଛି।

ସୌଜନ୍ୟ- ଧରିତ୍ରୀ