ଭୁବନେଶ୍ବର: ଓଡ଼ିଶା ଝିଅ ଜ୍ୟୋସ୍ନା ଶବର‌ କତରର ଦୋହାଠାରେ ଚାଲିଥିବା ଏସୀୟ ଯୁବ ଭାରୋତ୍ତୋଳନରେ ଏସୀୟ ରେକର୍ଡ ସହ ସ୍ବର୍ଣ୍ଣ ପଦକ ଜିତିଛନ୍ତି। ୪୦ କିଲୋଗ୍ରାମ ବାଳିକା ଯୁବ ବର୍ଗରେ ଖେଳିଥିବା ଜ୍ୟୋସ୍ନା ସ୍ନାଚ୍‌ରେ ୬୦ କିଲୋଗ୍ରାମ ଏବଂ କ୍ଲିନ୍ ଆଣ୍ଡ୍ ଜର୍କରେ ୭୫ କିଲୋଗ୍ରାମ ସହ ମୋଟ ଉପରେ ୧୩୫ କିଲୋଗ୍ରାମ ଉତ୍ତୋଳନ କରିଥିଲେ। ମୋଟ ଉପରେ ଜ୍ୟୋସ୍ନା ଏସୀୟ କୀର୍ତ୍ତିମାନ ପ୍ରତିଷ୍ଠା କରିଥ‌ିଲେ। ଅନ୍ୟତମ ଓଡ଼ିଆ ଝିଅ ପ୍ରୀତିସ୍ମିତା ଭୋଇ ୪୫ କିଲୋଗ୍ରାମ ଯୁବ ବାଳିକା ବର୍ଗରେ ଖେଳି ପଞ୍ଚମ ସ୍ଥାନରେ ରହିଥିଲେ ମଧ୍ୟ କ୍ଲିନ୍ ଆଣ୍ଡ୍ ଜର୍କ (୮୫ କିଲୋଗ୍ରାମ)ରେ ରୌପ୍ୟ ପଦକ ପାଇଥିଲେ। ସ୍ନାଚ୍‌ରେ ସେ ୬୦ କିଲୋଗ୍ରାମ ଉତ୍ତୋଳନ କରିଥିଲେ।

ଏହି ବର୍ଗରେ ଭାରତର ପାୟଲ ସ୍ନାଚ୍‌ରେ ୭୦ କିଲୋଗ୍ରାମ ଏବଂ କ୍ଲିନ୍ ଆଣ୍ଡ୍ ଜର୍କରେ ୮୫ କିଲୋଗ୍ରାମ ସହ ସ୍ବର୍ଣ୍ଣ ପଦକ ଜିତିଥିଲେ। ପାୟଲ ମଧ୍ୟ ୪୫ କିଲୋଗ୍ରାମ କନିଷ୍ଠ ବର୍ଗରେ ସମାନ ଓଜନ (୭୦+୮୫) ଉତ୍ତୋଳନ କରି କାଂସ୍ୟ ଜିତିଥିଲେ। ଜ୍ୟୋସ୍ନା ଓ ପ୍ରୀତିସ୍ମିତାଙ୍କୁ ଓଡ଼ିଶା ଭାରୋତ୍ତୋଳନ ସଂଘ ସଭାପତି ଇଂ ଚିତ୍ତରଂଜନ ସ୍ବାଇଁ ଅଭିନନ୍ଦନ ଜଣାଇଛନ୍ତି। ପ୍ରଥମ ଦିନରେ ଭାରତୀୟ ଲିଫ୍ଟରମାନେ ୨ ସ୍ବର୍ଣ୍ଣ, ୨ ରୌପ୍ୟ ଓ ଗୋଟିଏ କାଂସ୍ୟ ସହ ମୋଟ ୫ ପଦକ ଜିତିଛନ୍ତି।