ଏହି କାରଣରୁ ରଦ୍ଦ ହୋଇପାରେ ଆଇପିଏଲର ପ୍ରଥମ ମ୍ୟାଚ୍

କୋଲକାତା: ଆସନ୍ତାକାଲିଠୁ ଆରମ୍ଭ ହେବାକୁ ଯାଉଛି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)। କୋଲକାତା ନାଇଟ୍ ରାଇଡର୍ସ ଶନିବାର (୨୨ ମାର୍ଚ୍ଚ) ସିଜିନର ପ୍ରଥମ ମ୍ୟାଚ୍‌ରେ ବିରାଟ କୋହଲିଙ୍କ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ଭେଟିବାକୁ ଯାଉଛି। ଉଦଘାଟନୀ ଉତ୍ସବ ପାଇଁ ସବୁ ପ୍ରସ୍ତୁତି ଶେଷ ହୋଇସାରିଛି, ଯେଉଁଥିରେ ଦିଶା ପଟାନୀ ଏବଂ ଶ୍ରେୟା ଘୋଷାଲଙ୍କ ଭଳି କଳାକାରମାନେ ନୃତ୍ୟ ଓ ସଙ୍ଗୀତ ପରିବେଷଣ କରିବେ।

ଉଦଘାଟନୀ ଉତ୍ସବର ମାତ୍ର ଗୋଟିଏ ଦିନ ପୂର୍ବରୁ, କୋଲକାତାରୁ ଏକ ଆଶ୍ଚର୍ଯ୍ୟଜନକ ଖବର ଆସିଛି। ପାଣିପାଗ ବିଭାଗ ଅରେଞ୍ଜ ଆଲର୍ଟ ଜାରି କରିଥିବାରୁ ଏହି ସିଜିନର ପ୍ରଥମ ମ୍ୟାଚ୍ ସମ୍ପୂର୍ଣ୍ଣ ବାତିଲ ହେବାର ଆଶଙ୍କା ରହିଛି।

ଭାରତୀୟ ପାଣିପାଗ ବିଭାଗ (ଆଇଏମଡି) ଗୁରୁବାରରୁ ରବିବାର ପର୍ଯ୍ୟନ୍ତ ପଶ୍ଚିମବଙ୍ଗରେ ଝଡ଼ ଏବଂ ବର୍ଷା ହେବାର ପୂର୍ବାନୁମାନ କରିଛି। ଆଇପିଏଲ ୨୦୨୫ ମ୍ୟାଚ୍‌ର ପ୍ରଥମ ଦିନ, ମାର୍ଚ୍ଚ ୨୨ ପାଇଁ ଅରେଞ୍ଜ ଆଲର୍ଟ ଜାରି କରାଯାଇଥିବା ବେଳେ ରବିବାର ପାଇଁ ୟେଲୋ ଆଲର୍ଟ ଜାରି କରାଯାଇଛି।

ଶନିବାର କୋଲକାତାରେ ବର୍ଷା ହେବାର ସମ୍ଭାବନା ୭୪%, ମେଘୁଆ ପାଗ ରହିବାର ସମ୍ଭାବନା ୯୭% ରହିଛି। ସନ୍ଧ୍ୟାରେ ବର୍ଷା ହେବାର ସମ୍ଭାବନା ୯୦% ପର୍ଯ୍ୟନ୍ତ ପହଞ୍ଚିବ ବୋଲି କୁହାଯାଉଛି। ତେଣୁ, ଆଇପିଏଲର ୧୮ତମ ସଂସ୍କରଣର ପ୍ରଥମ ଦିନରେ ଇଡେନ ଗାର୍ଡେନରେ ପ୍ରବଳ ବର୍ଷା ହେବା ପ୍ରାୟ ନିଶ୍ଚିତ। ତେଣୁ କେକେଆର ଏବଂ ଆରସିବି ଫଳାଫଳ ପାଇବା ପାଇଁ ଯଥେଷ୍ଟ ଓଭର ଖେଳିପାରିବେ କି ନାହିଁ ତାହା ବର୍ତ୍ତମାନ କହିବା କଷ୍ଟକର।

ସୌଜନ୍ୟ-ସମ୍ୱାଦ