ଓଡ଼ିଆ ସିନେମା ‘ପରବ୍‌’ ଓ ‘ଅକ୍ସିଜେନ୍‌’ ରିଲିଜ୍‌

ଭୁବନେଶ୍ୱର, ୨୦/୧୨: ଶୁକ୍ରବାର ଫ୍ରାଇଡେ ରିଲିଜ୍‌ ଅବସରରେ ମୁକ୍ତିଲାଭ କରୁଛି ଦୁଇ ଓଡ଼ିଆ ସିନେମା ‘ପରବ୍‌’ ଓ ‘ଅକ୍ସିଜେନ୍‌’ । ଉଭୟର ପ୍ରିମିୟର୍‌ କଳାକାରମାନଙ୍କ ସହିତ ଭୁବନେଶ୍ୱରରେ ଅନୁଷ୍ଠିତ ହେବ । ଜାତୀୟ ପୁରସ୍କାରପ୍ରାପ୍ତ ‘ଦମନ’ର ଅପୂର୍ବ ସଫଳତା ପରେ ଜେପି ମୋସନ୍‌ ପିକ୍‌ଚର୍ସ ବ୍ୟାନରରେ ପ୍ରଯୋଜକ  ଦିପେନ୍ଦ୍ର ସାମଲ ନିର୍ମାଣ କରିଛନ୍ତି ‘ପରବ୍‌’ । ଯାହା  ଶୁକ୍ରବାର ୫୨ଟି ସିନେମା ହଲ୍‌ରେ ୧୧୫ଟି ସ୍କ୍ରିନ୍‌ରେ ମୁକ୍ତିଲାଭ କରିବ ।

ଓଡ଼ିଶା ଓ ଆନ୍ଧ୍ର ରାଜ୍ୟ ମଧ୍ୟରେ ପୂର୍ବରୁ କିପରି ବିବାଦ ରହିଥିଲା ଓ କି ପ୍ରକାରର  ପରିସ୍ଥିତି ରାଜ୍ୟବାସୀଙ୍କୁ ସହିବାକୁ ପଡ଼ିଥିଲା ତାହା  ହିଁ ଫିଲ୍ମର କାହାଣୀ ରହିଛି । ଏଥିରେ ଅଭିନେତା  ସିଦ୍ଧାନ୍ତ ମହାପାତ୍ର, ଅଭିନେତ୍ରୀ ଅନୁ ଚୌଧୁରୀ, ଦୀପନ୍ୱୀତ ଦାଶ ମହାପାତ୍ର, ଅଭିନେତ୍ରୀ ସୂର୍ଯ୍ୟମୟୀ  ମହାପାତ୍ର, ବରିଷ୍ଠ ଅଭିନେତା ଚୌଧୁରୀ ଜୟ  ପ୍ରକାଶ ଦାସଙ୍କ ସମେତ ଅନେକ ପରିଚିତ  କଳାକାର ଅଭିନୟ କରିଛନ୍ତି । ସିନେମା ସହ ଜଡ଼ିତ  ପୂରା ଟିମ୍‌ ସଫଳତା ନେଇ ଆଶାବାଦୀ ଥିବାବେଳେ ଏଥିରୁ ଆୟ ଟଙ୍କାରୁ କିଛି ଅଂଶ ସମାଜ କଲ୍ୟାଣ  ଲାଗି ଦାନ କରାଯିବ ବୋଲି ପ୍ରଯୋଜନା ସଂସ୍ଥା ପକ୍ଷରୁ ମିଡିଆ ପ୍ଲାନର୍‌ ପ୍ରଣୟ ଜେଠୀ ସୂଚନା  ଦେଇଛନ୍ତି ।

ସେହିପରି ଅମ୍ଲଜାନର ଆବଶ୍ୟକତାକୁ ନେଇ  ଆର୍‌ପି ପ୍ରଡକ୍ସନ୍ସ ବ୍ୟାନରରେ ପ୍ରଥମ ଥର ତିଆରି  ହୋଇଛି ଓଡ଼ିଆ ଫିଲ୍ମ ‘ଅକ୍ସିଜେନ୍‌’ । ଏହା ସମ୍ପୂର୍ଣ୍ଣ  ମନୋରଞ୍ଜନଭିତ୍ତିକ ନୂଆ କଣ୍ଟେଣ୍ଟର ଫିଲ୍ମଟିଏ ।  ସିନେମାଟି ରାଜ୍ୟର ୧୫ରୁ ଅଧିକ ହଲ୍‌ରେ  ମୁକ୍ତିଲାଭ କରୁଛି । ଫିଲ୍ମର ମୁଖ୍ୟ ଭୂମିକାରେ  ସମ୍ବିତ, ତମନ୍ନା ଏବଂ ବବି ମିଶ୍ର ଅଭିନୟ କରିଛନ୍ତି । ତାଙ୍କ ସହିତ ବାବୁ ପ୍ରଧାନ, ଡିସ୍କୋ ରେଡ୍ଡୀ, ତାନିଆ,  ଥିନ୍‌, ଉମାକାନ୍ତ ମୁଦୁଲି, ନିଖିଳେଶ ଘୋଷ, କ୍ରିଷ୍ଣା,  ଶ୍ରାବଣୀ, ରଶ୍ମି ପାଢ଼ୀ, ସୀମା, କମଲ, ପୃଥ୍ୱୀରାଜ,  ପ୍ରସନ୍ନ ସାହୁ ଓ ଜଗନ୍ନାଥ ପ୍ରମୁଖ ବିଭିନ୍ନ ଚରିତ୍ରରେ  ପରଦାରେ ଦେଖାଦେବେ। କାହାଣୀର ପ୍ରତିଟି  ଚରିତ୍ରଙ୍କୁ ଜୀବନ୍ତ କରିବାର ପ୍ରୟାସ କରିଛନ୍ତି  ନିର୍ଦ୍ଦେଶକ । କଳାକାର ମାନଙ୍କର ଦମ୍‌ଦାର୍‌ ଅଭିନୟ  ସାଙ୍ଗକୁ ଫିଲ୍ମର ଗୀତସବୁ ବହୁତ ମଧୁର ଏବଂ  ଉଚ୍ଚକୋଟୀର ହୋଇଛି ।

ଗୀତସବୁ ପ୍ରତି ଓଡ଼ିଆ  ଲୋକଙ୍କ ଘରେ ବାଜିବ ବୋଲି ପ୍ରଯୋଜକ ଶିବ  ପ୍ରସାଦ ପଣ୍ଡା ଓ ସୁକେଶି ପଣ୍ଡା ଆଶା ରଖିଛନ୍ତି ।  କାହାଣୀ ଏବଂ ସଂଳାପ ଡ. ରଶ୍ମି ରଞ୍ଜନ ପଣ୍ଡା  ଲେଖିଥିବା ବେଳେ, ସଙ୍ଗୀତ ନିର୍ଦ୍ଦେଶନା ଦେଇଛନ୍ତି  ଅଭିଜିତ୍‌ ମଜୁମ୍‌ଦାର୍‌ । ଗୀତ ଲେଖିଛନ୍ତି ଡା. ନିର୍ମଳ ନାୟକ, ତପୁ ନାୟକ ଓ ସତ୍ୟରଞ୍ଜନ ବଳ ଏବଂ  ଗାଇଛନ୍ତି ହ୍ୟୁମାନ୍‌ ସାଗର, ତାରିକ୍‌ ଅଜିଜ୍‌,  ଅଭିଜିତ୍‌ ମଜୁମ୍‌ଦାର୍‌, ସତ୍ୟଜିତ୍‌ ପ୍ରଧାନ, ସ୍ମୃତି,  ନେହା ନିହାରିକା ଓ ସୋନମ୍‌ । ଫିଲ୍ମର ନିର୍ଦ୍ଦେଶନା  ଦେଇଛନ୍ତି ପିନୁ ନାୟକ ବୋଲି ପ୍ରଚାର, ପ୍ରସାର  ଦାୟିତ୍ୱରେ ଥିବା ଅମରେଶ କହିଛନ୍ତି ।

ସୌଜନ୍ୟ-ପ୍ରମେୟ