ଓୟୁଏଟିରେ ଛାତ୍ର-ଅଣଛାତ୍ର ସଂଘର୍ଷ: ବାଇକ୍‌ ସାଇଡ୍‌ମରାରୁ ପିଟାପିଟି, ଛାତ୍ରାବାସରୁ ୨ ଅଣଛାତ୍ରଙ୍କୁ ମୁକାଳିଲା ପୁଲିସ

ଭୁବନେଶ୍ବର: ଆଜି ରାତି ପ୍ରାୟ ୯ଟା ବେଳେ ଓୟୁଏଟି ଭେଟେରିନାରି କଲେଜର ଛାତ୍ର ଓ ସ୍ଥାନୀୟ ଅଣଛାତ୍ରଙ୍କ ମଧ୍ୟରେ ସଂଘର୍ଷ ଘଟିଛି। ବାଇକ୍‌ ସାଇଡ୍‌ମରାକୁ କେନ୍ଦ୍ର କରି ଘଟିଥିବା ଏହି ଗଣ୍ଡଗୋଳରେ ଉଭୟ ପକ୍ଷର ୪ଜଣ ଆହତ ହୋଇଛନ୍ତି। କଲେଜ ଛାତ୍ରମାନେ ରାସ୍ତାରୁ ଉଠାଇ ନେଇଥିବା ୨ ଅଣଛାତ୍ରଙ୍କୁ ଖଣ୍ଡଗିରି ଥାନା ପୁଲିସ ଉଦ୍ଧାର କରିଛି ଏବଂ ଉଭୟ ପକ୍ଷରୁ ୪ଜଣଙ୍କୁ ଥାନାରେ ଅଟକ ରଖାଯାଇଛି। ଏନେଇ ଉଭୟ ପକ୍ଷ ଥାନାରେ ଅଭିଯୋଗ କରିଥିବା ଜଣାପଡ଼ିଛି।

ଆଗକୁ ଭେଟେରିନାରି କଲେଜର ବାର୍ଷିକୋତ୍ସବ ଥିବାରୁ ଛାତ୍ରମାନେ ପ୍ରସ୍ତୁତିରେ ଲାଗିଥିଲେ। ନାଟକ ରିହର୍ସାଲ୍‌ କରିବାକୁ ଆସିଥିବା ୨ ଛାତ୍ର ଛାତ୍ରାବାସକୁ ଫେରିବା ବାଟରେ ୪ଜଣ ଅଣଛାତ୍ରଙ୍କ ସହ ମୁହାଁମୁହିଁ ହୋଇଥିଲା। ବାଇକ୍‌ ସାଇଡ୍‌ମରାକୁ କେନ୍ଦ୍ର କରି ପ୍ରଥମେ ବଚସା ହୋଇଥିଲା। ଛାତ୍ରମାନଙ୍କ ଅଭିଯୋଗ ଅନୁସାରେ ଅଣଛାତ୍ରମାନେ ସେମାନଙ୍କୁ ଗାଳିଗୁଲଜ କରିବା ସହିତ ବିଭିନ୍ନ ପ୍ରକାର ଧମକ ଦେଇଥିଲେ। ଏମିତିକି ସେମାନଙ୍କୁ ଧକ୍କା ମାରିବା ସହ ହଷ୍ଟେଲ ପରିସରରେ ପଶି ପିଟିବେ ବୋଲି ଅଣଛାତ୍ରମାନେ କହିଥିଲେ। ଦୁଇ ଛ‌ାତ୍ର ହଷ୍ଟେଲକୁ ଫେରି ଛାତ୍ରସଂଘର ସଭାପତିଙ୍କୁ ଜଣାଇଥିଲେ। ଦୁଇ ସହପାଠୀଙ୍କୁ ମାଡ଼ ମରାଯାଇଥିବା ଖବର ପ୍ରଚାର ହୋଇଯିବା ପରେ ଛାତ୍ରମାନଙ୍କ ଭିତରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା।

ଛାତ୍ରମାନେ ସଂଘବଦ୍ଧ ଭାବେ କଲେଜ ବାହାରକୁ ଆସି ଅଣଛାତ୍ରମାନଙ୍କୁ ଖୋଜିଥିଲେ। କିନ୍ତୁ ସେତେବେଳକୁ ଅଣଛାତ୍ରମାନେ ସେଠାରୁ ଚାଲିଯାଇଥିଲେ। ଗଣ୍ଡଗୋଳ କରିଥିବା ଅରଛାତ୍ରଙ୍କୁ ନ ପାଇ ଛାତ୍ରମାନେ କ୍ୟାମ୍ପସ୍‌କୁ ଫେରିବାକୁ ବାହାରିଥିଲେ। କିନ୍ତୁ ଠିକ୍‌ ଏତିକିବେଳେ ଗଣ୍ଡଗୋଳରେ ସମ୍ପୃକ୍ତ ୨ ଅଣଛାତ୍ର ଅଭିଜିତ ଜେନା ଓ ଶାନ୍ତିସ୍ବରୂପ ସେଠାରେ ପହଞ୍ଚିଥିଲେ। ତେଣୁ କ୍ୟାମ୍ପସ୍‌କୁ ଫେରିବାକୁ ବାହାରିଥିବା ଛାତ୍ରମାନେ ସେହି ୨ଜଣଙ୍କୁ ଘେରି ଯାଇଥିଲେ ଏବଂ କ୍ୟାମ୍ପସ୍‌ ଭିତରକୁ ଉଠାଇ ନେଇଥିଲେ। ଖବର ପାଇ ଖଣ୍ଡଗିରି ଥାନା ପୁଲିସ କଲେଜ କ୍ୟାମ୍ପସ୍‌ରେ ପହଞ୍ଚି ଉତ୍ତ୍ୟକ୍ତ ଛାତ୍ରମାନଙ୍କ କବଳରୁ ଅଭିଜିତ ଓ ଶାନ୍ତିସ୍ବରୂପକୁ ଉଦ୍ଧାର କରିଥିଲା। ଏଥିସହିତ ପୁଲିସ ୨ଛାତ୍ରଙ୍କୁ ମଧ୍ୟ ଥାନାକୁ ଡକାଇଥିଲା। ପ୍ରଥମେ ଏହି ମାମଲାର ଆ ପୋସ ସମାଧାନ ହେବ ବୋଲି ଉଭୟ ପକ୍ଷ ରାଜି ହୋଇଥିଲେ। କିନ୍ତୁ ପରେ ଉଭୟ ପକ୍ଷ ଲିଖିତ ଅଭିଯୋଗ କରିଥିଲେ।

ସୌଜନ୍ୟ-ସମ୍ୱାଦ