କାର୍ଯ୍ୟସ୍ଥଳୀରେ ଚାପମୁକ୍ତ ରହିବେ କେମିତି

କର୍ମକ୍ଷେତ୍ରରେ ଚାପର ମୁକାବିଲା କରିବା ପାଇଁ କିଛି ବ୍ୟାବହାରିକ ତଥା ପ୍ରଭାବୀ ଉପାୟ ବାବଦରେ ଆଲୋଚନା କରିବା। ଚାପ ଦୂର କରିବା ଲାଗି ନିୟମିତ ବ୍ୟବଧାନରେ ସାମୟିକ ବିରତି ନିଅନ୍ତୁ। ଯେତେ କାର୍ଯ୍ୟବ୍ୟସ୍ତ ଥିଲେ ବି କିଛି ସମୟ କାର୍ଯ୍ୟରୁ ଦୂରେଇ ରହିବା ଦ୍ବାରା ମନରେ ସତେଜପଣ ପୁଣି ଜାଗିଉଠିଥାଏ। ଏଥିପାଇଁ ପୋମୋଡୋରୋ କୌଶଳ ଆପଣେଇପାରିବେ, ଯହିଁରେ ପ୍ରତି ୨୫ ମିନିଟ୍‌ କାମ ପରେ ୫ ମିନିଟ୍‌ ପାଇଁ ବିରତି ନେବାକୁ ପଡ଼ିଥାଏ। ଏହି କାର୍ଯ୍ୟ-ବିରତି ଚକ୍ର ମନକୁ କ୍ଳାନ୍ତ ହେବାକୁ ଦିଏ ନାହିଁ। କାର୍ଯ୍ୟଭାରରେ ଅତିଷ୍ଠ ଲାଗିଲେ ନମ୍ର ଭାବରେ ସହକର୍ମୀଙ୍କ ସହ ସେ ସମ୍ପର୍କରେ କଥା ହୁଅନ୍ତୁ। ନିଜ ଉଦ୍‌ବେଗକୁ ଶୀଘ୍ର ପ୍ରକାଶ କରିବା ଦ୍ବାରା ବେଳେବେଳେ ସକାରାତ୍ମକ ଫଳ ମିଳିଥାଏ।

ନିଜ ଶରୀରର ଯତ୍ନ ନେବା ଦ୍ବାରା ମଧ୍ୟ ଚାପ ଦୂର କରିହେବ। ଡିହାଇଡ୍ରେସନ୍‌ ଯୋଗୁଁ କ୍ଳାନ୍ତ ଓ କ୍ରୋଧିତ ଅନୁଭୂତ ହୁଏ, ତେଣୁ ନିୟମିତ ପାଣି ପିଇ ଶରୀରକୁ ଯଥାସମ୍ଭବ ଆର୍ଦ୍ର ରଖନ୍ତୁ।
କର୍ମକ୍ଷେତ୍ରରେ ସାମାଜିକ କାର୍ଯ୍ୟକଳାପରେ ସାମିଲ ହେବା ଦ୍ବାରା ମଧ୍ୟ ଚାପ ଲାଘବ ହୁଏ। ସର୍ବୋପରି କାର୍ଯ୍ୟ ଓ ଜୀବନଶୈଳୀ ମଧ୍ୟରେ ସନ୍ତୁଳନ ମାନସିକ ସୁସ୍ଥତା ପାଇଁ ଜରୁରି। ଅଫିସ୍‌ ସମୟ ପରେ କାର୍ଯ୍ୟ ବାବଦରେ ଚିନ୍ତା ବନ୍ଦ କରିଦିଅନ୍ତୁ। ନିୟମିତ ଅବସର ସମୟରେ ନିଜ ସଉକରେ ମନୋନିବେଶ କରି ମଧ୍ୟ ଚାପମୁକ୍ତ ରହିପାରିବେ।

ସୌଜନ୍ୟ-ସମ୍ୱାଦ