କୁମ୍ଭମେଳା ଯାତ୍ରା ଯୋଜନା ଉପରେ ଷ୍ଟିଭ୍ ଜବ୍ସଙ୍କ ଚିଠି ୪.୩୨ କୋଟି ଟଙ୍କାରେ ବିକ୍ରି

ପ୍ରୟାଗରାଜ: ସ୍ୱର୍ଗତ ଷ୍ଟିଭ୍ ଜବ୍ସଙ୍କ ପତ୍ନୀ ଲରେନ୍ ପାୱେଲ ଜବ୍ସ ବର୍ତ୍ତମାନ ମହାକୁମ୍ଭ ମେଳା ୨୦୨୫ ପାଇଁ ଭାରତରେ ଅଛନ୍ତି, ଯେଉଁଠାରେ ତାଙ୍କୁ ‘କମଳା’ ନାମ ଦିଆଯାଇଛି। ଇତିମଧ୍ୟରେ ଆପଲର ସ୍ୱର୍ଗତ ସହପ୍ରତିଷ୍ଠାତାଙ୍କ ଏକ ହାତଲେଖା ଚିଠି ଏବେ ଚର୍ଚ୍ଚାର ବିଷୟ ପାଲଟିଛି। ୧୯୭୪ ମସିହାରେ ଲିଖିତ ଏହି ଚିଠିରେ କୁମ୍ଭମେଳା ପାଇଁ ଷ୍ଟିଭ୍ ଜବ୍ସଙ୍କ ଭାରତ ଗସ୍ତ ଯୋଜନା ବିଷୟରେ ଉଲ୍ଲେଖ କରାଯାଇଛି। ନିକଟରେ ବୋନହାମ୍ସ ଏହାକୁ ୫୦୦,୩୧୨ ଡଲାର (୪.୩୨ କୋଟି ଟଙ୍କା)ରେ ନିଲାମ କରିଥିଲା।

ଷ୍ଟିଭ୍ ଜବ୍ସଙ୍କ ୧୯ତମ ଜନ୍ମଦିନର ଠିକ୍ ଗୋଟିଏ ଦିନ ପୂର୍ବରୁ ପୋଷ୍ଟ୍ ହୋଇଥିବା ଏହି ଚିଠି ତାଙ୍କ ପିଲାଦିନର ବନ୍ଧୁ ଟିମ୍ ବ୍ରାଉନଙ୍କ ଉଦ୍ଦେଶ୍ୟରେ ଲେଖାଯାଇଛି। ଏହା ତାଙ୍କ ଆଧ୍ୟାତ୍ମିକ ଅଭୀପ୍ସାର ଏକ ବିରଳ ଝଲକ ପ୍ରଦାନ କରୁଛି। ଏଥିରେ ଜବ୍ସ ‘ଜେନ୍ ବୌଦ୍ଧ ଧର୍ମ’କୁ ପ୍ରତିଫଳିତ କରିଛନ୍ତି ଏବଂ କୁମ୍ଭ ମେଳା ପାଇଁ ଭାରତ ଆସିବା ପାଇଁ ତାଙ୍କର ଇଚ୍ଛା ପ୍ରକାଶ କରିଛନ୍ତି। ବ୍ରାଉନଙ୍କ ଏକ ଚିଠିର ଜବାବରେ ଜବ୍ସ ଦୁଃଖରେ ଲେଖିଛନ୍ତି ଯେ ସେ ଅନେକ ଥର କାନ୍ଦିଥିଲେ। ଏପ୍ରିଲରେ ଆରମ୍ଭ ହେବାକୁ ଥିବା କୁମ୍ଭମେଳାରେ ଯୋଗ ଦେବାକୁ ସେ ଭାରତ ଯିବାକୁ ଚାହାନ୍ତି। ସେ ମାର୍ଚ୍ଚ ମାସରେ କେବେ ବି ଯିବେ, ତାହା ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ ବୋଲି ଜବ୍ସ ଲେଖିଥିଲେ। ହିନ୍ଦୁଧର୍ମ ଦ୍ୱାରା ଗଭୀର ଭାବରେ ପ୍ରଭାବିତ ହୋଇ ସେ ଚିଠି ଶେଷରେ ‘ଶାନ୍ତି, ଷ୍ଟିଭ୍ ଜବ୍ସ’ ବୋଲି ଲେଖିଥିଲେ।

ପରେ ଷ୍ଟିଭ୍ ତାଙ୍କ ଭାରତ ଗସ୍ତ ବିଷୟରେ ଲେଖିଛନ୍ତି, ସେ ପ୍ରଥମେ ଉତ୍ତରାଖଣ୍ଡରେ ଥିବା ନିମ କରୋଲି ବାବାଙ୍କ ଆଶ୍ରମ ପରିଦର୍ଶନ କରିବାକୁ ଯୋଜନା କରିଥିଲେ। ତେବେ ନୈନିତାଲରେ ପହଞ୍ଚିବା ପରେ ସେ ଜାଣିବାକୁ ପାଇଲେ ଯେ ନିମ କରୋଲି ବାବାଙ୍କର ପୂର୍ବ ବର୍ଷ ମୃତ୍ୟୁ ଘଟିଥିଲା। ନିମ କରୋଲି ବାବାଙ୍କ ଶିକ୍ଷାରୁ ସାନ୍ତ୍ୱନା ପାଇ ଜବ୍ସ  ଏକ ଆଶ୍ରମରେ ରହିଥିଲେ। ସେ ସାତ ମାସ ଭାରତରେ ବିତାଇଥିଲେ ଏବଂ ଏହାର ସଂସ୍କୃତି ଓ ଆଧ୍ୟାତ୍ମିକତାରେ ନିଜକୁ ସମ୍ପୂର୍ଣ୍ଣ ଭାବରେ ହଜାଇ ଦେଇଥିଲେ। ଜବ୍ସ ଯେତେବେଳେ ଆମେରିକା ଫେରିଲେ, ତାଙ୍କର ପରିବର୍ତ୍ତନ ସ୍ପଷ୍ଟ ଭାବରେ ଦେଖାଗଲା। ତାଙ୍କ ପିତାମାତା ତାଙ୍କୁ ଚିହ୍ନି ପାରି ନ ଥିଲେ। ସେ ଲେଖିଛନ୍ତି, ମୋର ମୁଣ୍ଡନ ହୋଇଥିଲା, ମୁଁ ଭାରତୀୟ ସୂତା ପୋଷାକ ପିନ୍ଧିଥିଲି ଏବଂ ମୋ ଚର୍ମ ଚକୋଲେଟ୍ ପରି ବାଦାମୀ-ଲାଲ ହୋଇଯାଇଥିଲା। ଜବ୍ସ ସାଧୁଙ୍କ କମଳା ରଙ୍ଗର ପୋଷାକ ମଧ୍ୟ ଗ୍ରହଣ କରିଥିଲେ, ଯାହା ତାଙ୍କ ଆଧ୍ୟାତ୍ମିକ ଯାତ୍ରାର ଗଭୀର ପ୍ରଭାବକୁ ପ୍ରତିଫଳିତ କରିଥିଲା।

ଏବେ ଷ୍ଟିଭଙ୍କ ପତ୍ନୀ ଲରେନ୍ ପାୱେଲ ଜବ୍ସ ମହାକୁମ୍ଭ ମେଳା ୨୦୨୫ରେ ଯୋଗ ଦେଇ ତାଙ୍କର ଏକ ଦୀର୍ଘଦିନର ଇଚ୍ଛା ପୂରଣ କରିଛନ୍ତି। ଦ୍ୱିତୀୟ ଦିନରେ ଆଲର୍ଜି ହେବା ସତ୍ତ୍ୱେ ସେ ଗଙ୍ଗାନଦୀରେ ସ୍ନାନ କରିବାକୁ ଯୋଜନା କରିଛନ୍ତି। ତାଙ୍କ ଗୁରୁ ସ୍ୱାମୀ କୈଳାସାନନ୍ଦ ଗିରିଙ୍କ ଦ୍ୱାରା ହିନ୍ଦୁ ନାମ ‘କମଳା’ ପାଇଥିବା ଲରେନ ୪୦ ଜଣିଆ ଟିମ୍ ସହ ପ୍ରୟାଗରାଜରେ ପହଞ୍ଚିଥିଲେ। ସେ ଧ୍ୟାନ, କ୍ରିୟାଯୋଗ ଓ ପ୍ରାଣାୟାମ ଭଳି ଆଧ୍ୟାତ୍ମିକ ଅଭ୍ୟାସରେ ନିୟୋଜିତ ଅଛନ୍ତି। ମହାକୁମ୍ଭକୁ ତାଙ୍କର ଗସ୍ତ ଭାରତୀୟ ପରମ୍ପରା ପ୍ରତି ତାଙ୍କର ଗଭୀର ସମ୍ମାନ ଏବଂ ତାଙ୍କର ବ୍ୟକ୍ତିଗତ ଆଧ୍ୟାତ୍ମିକ ଅନୁସନ୍ଧାନକୁ ସୂଚାଇଥାଏ।

ସୌଜନ୍ୟ-ସମ୍ୱାଦ