ସାଇବର୍ ଠକ ହଜାର କୋଟିର ମାଲିକ

ସାରା ଦେଶରେ ଅନଲାଇନ୍ ନିବେଶ କେଳେଙ୍କାରୀ ପଛର ଅନ୍ୟତମ ଦୁଇ ମୁଖ୍ୟ କାର୍ପଟଦାର କୁହାଯାଉଥିବା ଅନ୍ତର୍ଜାତୀୟ ସାଇବର୍ ଲୁଟେରା ଦୁଇ ଭାଇ ହେଉଛନ୍ତି ସୟଦ ସମଦ୍ ଓ ସୟଦ ସଲିମ। ଗୁଜୁରାଟ ଅହମଦାବାଦର ଏହି ଦୁଇ ଭାଇ ଓଡ଼ିଶା ସମେତ ସାରା ଦେଶରୁ ୧ ହଜାର କୋଟିରୁ ଉର୍ଦ୍ଧ୍ବ ଟଙ୍କା ଲୁଟି ନେଇଛନ୍ତି। ଦୁଇ ଭାଇ ଏବେ ଓଡ଼ିଶା କ୍ରାଇମବ୍ରାଞ୍ଚ ସମେତ ସାରା ଦେଶରେ ମୋଷ୍ଟ ଵାଣ୍ଟେଡ ତାଲିକାରେ ରହିଛନ୍ତି। ଅନ୍‌ଲାଇନରେ ଅର୍ଥ ନିବେଶ ଆଳରେ ସାଇବର୍ ଅପରାଧୀମାନେ ନକଲି ଟ୍ରେଡିଂ ଆପ୍ଲିକେସନ ଖୋଲି ନିବେଶକଙ୍କ ଟଙ୍କା ଠକି ନେଉଛନ୍ତି। କ୍ରାଇମବ୍ରାଞ୍ଚର ସାଇବର୍ ଥାନା ସମେତ ରାଜ୍ୟର ମୋଟ ୧୫ ସାଇବର୍ ଥାନାରେ ସମାନ୍ତରାଳ ଭାବେ ମାମଲା ରୁଜୁ ହୋଇଛି। ହରିୟାନା, ଗୁଜୁରାଟ, ରାଜସ୍ଥାନରେ ମଧ୍ୟ ମାମଲା ରହିଛି। ତେବେ ଧାମରା ବନ୍ଦରର ମାନବ ସମ୍ବଳ ଅଧିକାରୀ ଭୁବନେଶ୍ବର ଲିଙ୍ଗରାଜ ଥାନା ଅଞ୍ଚଳର ବାସିନ୍ଦା ସତ୍ୟଜିତ ରଥଙ୍କୁ ଅନ୍‌ଲାଇନ୍ ଟ୍ରେଡିଂରେ ଆମେରିକୀୟ ଡଲାର୍ ରୋଜଗାର କରିବାର ଲୋଭ ଦେଖାଇ ଏହି ଗ୍ୟାଙ୍ଗ୍ ତାଙ୍କ ଠାରୁ ୬୦ ଲକ୍ଷ ୯୫ ହଜାର ଟଙ୍କା ଲୁଟି ନେଇଥିଲେ। ମାମଲାର ତଦନ୍ତ ସମୟରେ କ୍ରାଇମବ୍ରାଞ୍ଚ ଦୁଇ ଭାଇଙ୍କ ଠିକଣା ପାଇଛି। ମେ ୭ ତାରିଖରେ ଅହମଦାବାଦ ଭେଜଲପୁର ଥାନା ଅନ୍ତର୍ଗତ ଫତେୱାଡ଼ିର ଫକିର ଅଲଫଜ ବିଶମିଲ୍ଲା, ଶେଖ ହୁମାପରବିନ୍ ରଫିକ୍, ରଫିକ୍ ଅବଦୁଲମଜିଦ ଶେଖ, ଅହେମଦଖାନ୍ ସରଦାରଖାନ ବାଲୋଚକୁ ଗିରଫ କରିବା ପରେ ଏହି ଦୁଇ କାର୍ପଟଦାରଙ୍କ ଚେହେରା ସାମନାକୁ ଆସିଥିଲା। ମାଷ୍ଟରମାଇଣ୍ଡ୍‌ ସୟଦ ସମଦ୍ ଅହମଦାବାଦର ବାସିନ୍ଦା ହୋଇଥିବା ବେଳେ ସେ ଏବେ ମୁମ୍ବାଇରେ ରହୁଛି। ତା’ ସାନ ଭାଇ ସୟଦ ସଲିମ୍ ଦୁବାଇରେ ରହୁଛି। ଦୁବାଇରେ ଥିବା ସାନ ଭାଇ ସଲିମ୍ ଘର କରି ସ୍ଥାୟୀ ବାସିନ୍ଦା ହୋଇ ରହିଥିବା ବେଳେ ସେ ସେଠାରେ ନକଲି ଅନ୍‌ଲାଇନ୍ ଟ୍ରେଡିଂ ଆପ୍ଲିକେସନ୍ ପ୍ରସ୍ତୁତ କରୁଛି। ବଡ଼ ଭାଇ ସମଦ୍ ଭାରତରୁ ନିବେଶ କେଳେଙ୍କାରୀ ମାଧ୍ୟମରେ ଟଙ୍କା ସଂଗ୍ରହ କରୁଛି। ଦୁଇ ଭାଇ ସାରା ଦେଶରୁ ୧ ହଜାର କୋଟିରୁ ଉର୍ଦ୍ଧ୍ବ ଟଙ୍କାର ଠକେଇ କରିଥିବା କ୍ରାଇମବ୍ରାଞ୍ଚ ଆକଳନ କରୁଛି। ଏହି ମାମଲାରେ ଉପରୋକ୍ତ ଦୁଇ ଭାଇ, ମହାରାଷ୍ଟ୍ର ପୁନେର ୭ ଜଣ ଓ ଦିଲ୍ଲୀର ୨ ଜଣ ଏବେ ବି ଫେରାର ଅଛନ୍ତି। ୨୦୨୩ ଓ ୨୦୨୪ରେ ଏଭଳି ଅନ୍‌ଲାଇନ୍‌ରେ ଅର୍ଥ ନିବେଶ ଠକେଇ କାରବାରରେ ଓଡ଼ିଶାରୁ ୨୫ କୋଟି ୫ ଲକ୍ଷ ଟଙ୍କା ସାଇବର୍ ଠକ ଲୁଟି ସାରିଥିବା ସାଇବର୍ ଥାନା ପୁଲିସ ପକ୍ଷରୁ ସୂଚନା ମିଳିଛି।