କ୍ରିପ୍ଟୋ ନିବେଶ ଆଳରେ ୬ କୋଟି ୧୬ ଲକ୍ଷ ଠକେଇ: ଗୁଜରାଟରୁ ୫ ଜଣଙ୍କୁ ଗିରଫ କଲା କ୍ରାଇମ୍‌ବ୍ରାଞ୍ଚ

କଟକ: କ୍ରିପ୍ଟୋ ମୁଦ୍ରାରେ ନିବେଶ କରି ଅଧିକ ଲାଭ ପାଇବା ଲୋଭରେ ଫସିଛନ୍ତି ବ୍ରହ୍ମପୁରର ଜଣେ ବଡ଼ ସୁନା ବ୍ୟବସାୟୀ। ଗୁଜରାଟର ଏକ ଠକ ଗ୍ୟାଙ୍ଗ୍ ତାଙ୍କ ନିକଟରୁ ୬ କୋଟି ୧୬ ଲକ୍ଷ ୩୭ ହଜାର ୮୪ ଟଙ୍କା ଲୁଟି ନେଇଛନ୍ତି। ଏଥିରେ ସଂପୃକ୍ତ ଗୁଜରାଟର ଏକ ସାଇବର୍ ଅପରାଧୀ ଗ୍ୟାଙ୍ଗ୍‌ର ୫ ଜଣଙ୍କୁ କ୍ରାଇମ୍‌ବ୍ରାଞ୍ଚ ଗିରଫ କରିଛି। ସେମାନଙ୍କ ନିକଟରୁ ମୋବାଇଲ୍ ଫୋନ୍, ସିମ୍‌କାର୍ଡ, ଆଧାର, ପାନ୍‌କାର୍ଡ, ବ୍ୟାଙ୍କ ପାସ୍‌ବୁକ, ଚେକ୍ ବହି, ଡେବିଟ୍ କାର୍ଡ ଇତ୍ୟାଦି ଜବତ କରାଯିବା ସହିତ ବ୍ୟାଙ୍କ ଆକାଉଣ୍ଟ୍‌କୁ ଫ୍ରିଜ୍‌ କରିଦିଆଯାଇଛି।ସୂଚନା ଅନୁଯାୟୀ, ବ୍ରହ୍ମପୁରର ଜଣେ ସୁନା ବ୍ୟବସାୟୀଙ୍କ ଫେସ୍‌ବୁକ ମାଧ୍ୟମରେ ସଞ୍ଜନା ଶ୍ରୀନିବାସନଙ୍କ ସହିତ ପରିଚୟ ହୋଇଥିଲା। ସଞ୍ଜନା ନିଜକୁ ହଂଗକଂଗରେ ଥିବା ଆଇବିଏମ୍‌ର ସଫଟ୍‌ୱେର୍‌ ଡେଭଲପ୍‌ର ବୋଲି ପରିଚୟ ଦେଇ ଜାପାନର ଏକ ଟ୍ରେଡିଂ କମ୍ପାନି ‘ଜୈଫ୍’ ମାଧ୍ୟମରେ କ୍ରିପ୍ଟୋ ମୁଦ୍ରାରେ ନିବେଶ କରିବାକୁ ସେ ପରାମର୍ଶ ଦେଇଥିଲା। ୧୨ଟି ଭାରତୀୟ ବ୍ୟାଙ୍କ ଆକାଉଣ୍ଟରେ ସେ ଏହି ଅର୍ଥ ଜମା କରିଥିଲେ। ଟଙ୍କା ଉଠାଣ ବେଳେ ଅତିରିକ୍ତ ୮୯ ଲକ୍ଷ ଟଙ୍କା ଜମା କରିବାକୁ କୁହାଯାଇଥିଲା। ଠକେଇର ଶିକାର ହୋଇଥିବା ଜାଣି ସେ କ୍ରାଇମ୍‌ବ୍ରାଞ୍ଚ ସାଇବର୍ ଥାନାରେ ଏତଲା ଦେଇଥିଲେ। ଡିଏସ୍‌ପି ରତ୍ନପ୍ରଭା ଶତପଥୀଙ୍କ ନେତୃତ୍ବରେ ଗଠିତ୍‌ ଟିମ୍‌ ସୁରଟରୁ ମୁଖ୍ୟ ଅଭିଯୁକ୍ତ ସଭାୟା ରବି କୁମନଭାଇଙ୍କ ସମେତ ସେଜଲ ରବି କୁମାର ସଭାୟା, ସଭାୟା କୁମନ ଭାଇ, ପାରସ ଧୀରୁଭାଇ ଜେସାନି, ଧର୍ମେଶ ନାନୁଭାଇ ସାଭଲିୟାଙ୍କୁ ଗିରଫ କରିଛି।  ସୁରଟ କୋର୍ଟରେ ହାଜର କରିବା ପରେ ଓଡ଼ିଶାକୁ ଟ୍ରାନ୍‌ଜିଟ୍ ରିମାଣ୍ଡରେ ଅଣାଯାଉଛି।

ସୌଜନ୍ୟ-ସମ୍ୱାଦ