ଖାଲଖମାରେ ଭର୍ତ୍ତି ୧୬ନମ୍ବର ଜାତୀୟ ରାଜପଥ

ବାଲିଅନ୍ତା ବଜାର: ହଂସପାଳ ଛକ ନିକଟରେ ୧୬ନମ୍ବର ଜାତୀୟ ରାଜପଥ ଖାଲଖମାରେ ଭର୍ତ୍ତି ହୋଇଛି। ଯାହାଫଳରେ ପ୍ରତ୍ୟେକ ଦିନ ଏଠାରେ ଦୁର୍ଘଟଣା ବୃଦ୍ଧି ପାଇବାରେ ଲାଗିଛି। ସ୍ଥାନୀୟ ଜନସାଧାରଣ ବାରମ୍ବାର ଅଭିଯୋଗ କରିଥିଲେ ବି ଜାତୀୟ ରାଜପଥ କର୍ତ୍ତୃପକ୍ଷ (ଏନ୍‌ଏଚ୍‌ଏଆଇ) ମରାମତି ପାଇଁ ଆଗ୍ରହ ଦେଖାଉ ନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ହଂସପାଳ ଛକର ଉଭୟ ପାର୍ଶ୍ୱ ରାସ୍ତାଗୁଡ଼ିକ ମରଣଯନ୍ତା ପାଲଟିଥିବା ବେଳେ ଏହାର ଶୀଘ୍ର ମରାମତି ନ କଲେ ୧୬ ନମ୍ବର ଜାତୀୟ ରାଜପଥ ଅବରୋଧ କରିବେ ବୋଲି ସ୍ଥାନୀୟ ବାସିନ୍ଦା ଚେତାବନୀ ଦେଇଛନ୍ତି।

ଦେଖାଯାଇଛି ଯେ, ହଂସପାଳ ଛକ ଅଣ୍ଡରପାସ୍‌ ସଂଲଗ୍ନ ଜାତୀୟ ରାଜପଥ ଖାଲଖମାରେ ପରିପୂର୍ଣ୍ଣ। ରାସ୍ତାରେ ବଡ଼ବଡ଼ ଖାଲ ଥିବାରୁ ରାସ୍ତା ମଝିରେ ଏନ୍‌ଏଚ୍‌ଏଆଇ ସାଇନ୍‌ ବୋର୍ଡ ଲଗାଇଛି। ରାସ୍ତା ଖରାପ ଅଛି, ଗାଡ଼ି ଧୀରେ ଚଳାଇବାକୁ ବୋର୍ଡରେ ଲେଖାଯାଇଛି। ହେଲେ ଏହି ସମସ୍ୟା ଆଜି କିମ୍ବା କାଲିର ନୁହେଁ, ମାସ ମାସ ଧରି ରାସ୍ତାର ଅବସ୍ଥା ବିଗିଡ଼ିବାରେ ଲାଗିଛି। ପ୍ରତିଦିନ ଖାଲରେ ପଡ଼ି ଅନେକ ଲୋକ ଆହତ ହେବା ସହ ଦୁର୍ଘଟଣାରେ ମୃତ୍ୟୁବରଣ କରୁଛନ୍ତି। ଏନେଇ କେନ୍ଦ୍ର ସରକାର ଓ ଏନ୍‌ଏଚ୍‌ଏଆଇଙ୍କୁ ସ୍ଥାନୀୟବାସିନ୍ଦା ଅନେକ ଥର ଅଭିଯୋଗ କଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି। ଅସରାଏ ବର୍ଷା ହେଲେ ରାସ୍ତାରେ ପାଣି ଜମି ରହୁଛି। ଖାଲୁଆ ସ୍ଥାନ ଜାଣି ନପାରି ଲୋକେ ଦୁର୍ଘଟଣାରେ ପଡୁଛନ୍ତି। ଫଳରେ ଲୋକମାନେ ବିପଦପୂର୍ଣ୍ଣ ଭାବରେ ରାସ୍ତା ପାରି ହେବାକୁ ବାଧ୍ୟ ହେଉଛନ୍ତି। ତେଣୁ ଆଣ୍ଡରପାସ୍‌ର ବର୍ଷାଜଳ ନିଷ୍କାସନ, ଖାଲଖମା ରାସ୍ତାର ମରାମତି କାର୍ଯ୍ୟ ବର୍ଷା ଦିନ ପୂର୍ବରୁ ସାରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।

ସୌଜନ୍ୟ-ସମ୍ୱାଦ