ଖ୍ରୀଷ୍ଟଧର୍ମଗୁରୁ ବଜିନ୍ଦରଙ୍କୁ ଦୁଷ୍କର୍ମ ମାମଲାରେ ଆଜୀବନ କାରାଦଣ୍ଡ

ଚଣ୍ଡିଗଡ଼: ଦୁଷ୍କର୍ମ ମାମଲାରେ ଖ୍ରୀଷ୍ଟିଆନ ଧର୍ମଗୁରୁ ପାଦ୍ରୀ ବଜିନ୍ଦର ସିଂହଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଛି। ମୋହାଲି ଜିଲ୍ଲା ଅଦାଲତ ଏହି ଆଦେଶ ଦେଇଛନ୍ତି। ତିନି ଦିନ ତଳେ ମୋହାଲି କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ, ଯାହା ପରେ ତାଙ୍କୁ ପଟିଆଲା ଜେଲକୁ ପଠାଇ ଦିଆଯାଇଥିଲା। ଜଣେ ମହିଳାଙ୍କ ଅଭିଯୋଗକୁ ଭିତ୍ତି କରି ଜିରକପୁର ଥାନାରେ ୨୦୧୮ରେ ମାମଲା ରୁଜୁ ହୋଇଥିଲା। ଅଭିଯୋଗକାରିଣୀ କହିଛନ୍ତି ଯେ ବଜିନ୍ଦର ସିଂହ ତାଙ୍କୁ ବିଦେଶ ନେବାକୁ ପ୍ରଲୋଭନ ଦେଖାଇ ମୋହାଲିର ସେକ୍ଟର ୬୩ସ୍ଥିତ ତାଙ୍କ ବାସଭବନରେ ଦୁଷ୍କର୍ମ କରିଥିଲେ। ଯଦି ସେ ତାଙ୍କ କଥାରେ ରାଜି ନ ହୁଅନ୍ତି ତେବେ ସେ ରେକର୍ଡ ଭିଡିଓକୁ ସୋସିଆଲ ମିଡିଆରେ ପୋଷ୍ଟ କରିଦେବେ ବୋଲି ଧମକ ଦେଇଥିବା ମହିଳା ଜଣକ ଅଭିଯୋଗ କରିଛନ୍ତି।

ଫେବ୍ରୁଆରି ୨୮ତାରିଖରେ ଦାୟର ହୋଇଥିବା ଅନ୍ୟ ଏକ ଯୌନ ନିର୍ଯାତନା ମାମଲାରେ ପାଦ୍ରୀ ତଦନ୍ତର ସମ୍ମୁଖୀନ ହେଉଥିବା ବେଳେ ଏହି ଦଣ୍ଡାଦେଶ ଆସିଛି। ଜଣେ ୨୨ ବର୍ଷୀୟା ମହିଳା ତାଙ୍କ ବିରୋଧରେ ଆଣିଥିବା ନିର୍ଯାତନା ଅଭିଯୋଗର ତଦନ୍ତ ପାଇଁ କପୁରତାଲା ପୁଲିସ ତିନି ଜଣିଆ ସ୍ୱତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଗଠନ କରିଛି। ସିଂହ ତାଙ୍କ ବିରୋଧରେ ଆସିଥିବା ଅଭିଯୋଗକୁ ଭିତ୍ତିହୀନ କହି ଖଣ୍ଡନ କରିଥିଲେ। କିଛି ଦିନ ତଳେ ପାଦ୍ରୀଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା, ଯେଉଁଥିରେ ସେ ଜଣେ ମହିଳାଙ୍କ ସହ ଯୁକ୍ତିତର୍କ କରି ତାଙ୍କୁ ଚାପୁଡ଼ା ମାରୁଥିବା ଦେଖିବାକୁ ମିଳିଥିଲା।

ସୌଜନ୍ୟ-ସମ୍ୱାଦ