ଗ୍ରାଉଣ୍ଡ ଜିରୋରେ ‘ସମ୍ବାଦ’ ବିଷ ବଳୟରେ ଟିହିଁକିପାଲି

ବରଗଡ଼/ଭେଡ଼େନ: ନିରୋଗ ଜୀବନ ପାଇଁ ବିଶୁଦ୍ଧ ବାୟୁ ଓ ବିଶୁଦ୍ଧ ପାଣି ନିହାତି ଜରୁରି। ଏହା ପ୍ରତ୍ୟେକ ମଣିଷର ମୌଳିକ ଆବଶ୍ୟକତା ମଧ୍ୟ। କିନ୍ତୁ ବେଆଇନ ଖଣି ଖନନ ସାଙ୍ଗକୁ କୀଟନାଶକର ବହୁଳ ବ୍ୟବହାର ଫଳରେ ମାଟି, ପାଣି, ପବନ ଜହର ପାଲଟିଛି। ଆଉ ଏ ପାଣି ପିଇ କିଡ୍‌ନି ରୋଗରେ ଅଦିନରେ ଯାଉଛି ଜୀବନ। ସ୍ଥିତି ବର୍ତ୍ତମାନ ଏମିତି ଯେ ବରଗଡ଼ ଜିଲ୍ଲାର ବିଭିନ୍ନ ଗାଁରେ ଏହି ପ୍ରାଣଘାତୀ ରୋଗର ଆତଙ୍କ। ସମ୍ବଲପୁର ବିଶ୍ୱବିଦ୍ୟାଳୟର ଗବେଷଣାରୁ ଏହା ସାମନାକୁ ଆସିବା ପରେ ଗ୍ରାଉଣ୍ଡ ଜିରୋରୁ ବାସ୍ତବ ସ୍ଥିତି ପରଖିଛି ‘ସମ୍ବାଦ’ ଟିମ୍‌। ୧୭ଟି ହଟ୍‌ସ୍ପଟ୍‌ ପଞ୍ଚାୟତ ଭିତରୁ ଭେଡ଼େନ୍‌ ବ୍ଲକ୍‌ ମହୁଲପାଲି ପଞ୍ଚାୟତର ସ୍ଥିତି ଜଟିଳ ଥିବା ଦେଖିବାକୁ ମିଳିଛି। ରୋଗୀଙ୍କ ନିକଟକୁ ଔଷଧ ପହଞ୍ଚୁ ନଥିବା ବେଳେ ବିଶୁଦ୍ଧ ପିଇବା ପାଣି ମଧ୍ୟ ପାଉନାହାନ୍ତି। ଫଳରେ ରୋଗୀ ସଂଖ୍ୟା ଦିନକୁ ଦିନ ବଢ଼ିଚାଲିଛି। ପ୍ରଶାସନ ଏ ସବୁ ରିପୋର୍ଟ ପାଇଥିଲେ ସୁଦ୍ଧା ନିରବ, ନିଷ୍କ୍ରିୟ।

ବଢ଼ିଚାଲିଛି କିଡ୍‌ନି ରୋଗୀଙ୍କ ସଂଖ୍ୟା 
ପ୍ରତି ୧୦୦ ଜଣରେ ୭ କିଡ୍‌ନି ରୋଗୀ

ମହୁଲପାଲି ପଞ୍ଚାୟତ ଅନ୍ତର୍ଗତ ଟିହିଁକିପାଲି ଗାଁ’କୁ ପଶୁ ପଶୁ ଲୋକଙ୍କ ମୁହଁରୁ ଶୁଣିବାକୁ ମିଳିଥିଲା କିଡ୍‌ନି ରୋଗ କଥା। ଗ୍ରାମର ଜୟକୁମାର ଛୁରିଆ, ଅରୁଣ ପେରା, ମନବୋଧ ପେରା, ରାମ ପେରାଙ୍କ ସ୍ବାସ୍ଥ୍ୟାବସ୍ଥା ବୁଝିବା ସମୟରେ ଗାଁ ପୋଖରୀ ଦେଖିଯିବାକୁ ଲୋକେ ପରାମର୍ଶ ଦେଇଥିଲେ। କେମିତି ନିକଟସ୍ଥ କ୍ରସର୍‌ରୁ ପଥର ଗୁଣ୍ଡ ଆସି ଗାଁ ପୋଖରୀରେ ପଡୁଛି ତାହା ଦେଖାଇଥିଲେ। ଏପରିକି ଗାଁକୁ ସଂଯୋଗ କରୁଥିବା ରାସ୍ତା କଡ଼ରେ ଥିବା ପଥର ସବୁକୁ ବେଆଇନ ଭାବରେ ପ୍ରତ୍ୟେକ ଦିନ ବ୍ଲାଷ୍ଟିଂ କରାଯାଉଛି ବୋଲି ଅଭିଯୋଗ ଆଣିଥିଲେ ଗ୍ରାମବାସୀ। ଗୋଚର ଜମିର ପଥରକୁ ବି ଛାଡ଼ୁ ନଥିବା ସ୍ଥାନୀୟ ମହୁଲପାଲି ସରପଞ୍ଚ ବିଜୟ କର୍ମୀ କହିବା ସହ ଦୁଇ ଜଣ ପଥର ମାଫିଆଙ୍କ ଏହା କାରନାମା ବୋଲି ପ୍ରକାଶ କରିଥିଲେ। ଗାଁ ଲୋକଙ୍କ କହିବା କଥା, ପଥର କ୍ୱାରି ଓ କ୍ରସର୍‌ ନଥିବା ସମୟରେ ଗାଁରେ ଜଣେ, ଅଧେଙ୍କୁ ଛାଡ଼ିଦେଲେ କିଡ୍‌ନି ରୋଗୀ ପ୍ରାୟ ନଥିଲେ। ଏହା ହେବା ପରେ ରୋଗୀ ସଂଖ୍ୟା ହୁ ହୁ ହୋଇ ବଢ଼ିଥିଲା। ରିପୋର୍ଟ ଅନୁସାରେ, ଗାଁର ଶହେ ଜଣଙ୍କ ଭିତରେ ୭ ଜଣ କିଡ୍‌ନି ରୋଗୀ। ପ୍ରଶାସନ ନାମକୁମାତ୍ର ନଳୂକପଗୁଡ଼ିକରେ ଫ୍ଲୋରାଇଡ୍‌ମୁକ୍ତ କରିବା ଯନ୍ତ୍ର ଲଗାଇଛି। ହେଲେ ତାହା କାମ କରୁନି। ନଦୀରୁ ବିଶୁଦ୍ଧ ପାଣି ଯୋଗାଣ ପାଇଁ ଗାଁରେ ପାଇପ୍‌ ଲାଗିଛି। ମାତ୍ର ପାଇପ୍‌ ଫାଟିଯିବାରୁ ଗାଁକୁ ପାଣି ଆସୁନି। ସେହିପରି ଗାଁରେ କୃଷି କ୍ଷେତ୍ରରେ ବ୍ୟବହୃତ ରାସାୟନିକ ସାର ଓ କୀଟନାଶକର ବ୍ୟବହାର ମଧ୍ୟ କିଡ୍‌ନି ରୋଗର ଅନ୍ୟ ଏକ କାରଣ ବୋଲି ଗବେଷକ ମତ ରଖିଛନ୍ତି। ମୋଟାମୋଟି ଗାଁରେ ଏ ପର୍ଯ୍ୟନ୍ତ ୨୦ରୁ ଅଧିକ ଜଣଙ୍କ କିଡ୍‌ନି ରୋଗରେ ମୃତ୍ୟୁ ହୋଇ ସାରିଥିବା ଏବଂ ପ୍ରାୟ ୫୦ ଜଣ କିଡ୍‌ନି ରୋଗୀ ରହିଥିବା ଗ୍ରାମବାସୀ କହିଛନ୍ତି। ଗାଁ ଆରମ୍ଭରୁ ଡାହାଣ ପାର୍ଶ୍ୱରେ ଥିବା କ୍ରସର୍‌ ପ୍ରତ୍ୟହ ରାତିରେ ଚାଲୁଛି ବୋଲି ଗାଁ ଲୋକ କହିଛନ୍ତି। କିନ୍ତୁ କ୍ରସର୍‌ ମାଲିକ ଉମେଶ ପ୍ରଧାନ ତାଙ୍କ କ୍ରସର ଚାଲୁନଥିବା କହିଛନ୍ତି। ଗାଁରେ ବିନା ଅନୁମତିରେ କିଏ ପଥର ବ୍ଲାଷ୍ଟିଂ କରୁଛନ୍ତି ତାହାର ତଦନ୍ତ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଲୋକେ ମତ ରଖିଛନ୍ତି। ଏ ନେଇ ଖଣି ଅଧିକାରୀଙ୍କୁ ଯୋଗାଯୋଗ କରିବାରୁ ବେଆଇନ୍‌ ବ୍ଲାଷ୍ଟିଂ ଓ କ୍ରସର୍‌ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି।

ସୌଜନ୍ୟ-ସମ୍ୱାଦ