ଘାଟିକିଆ ବିଏମ୍‌ସି ବଜାର ପାଇଁ ଆଜି ଲଟେରି: ତୃତୀୟ ଥର ଆବଣ୍ଟନ

ଭୁବନେଶ୍ୱର: ପୂର୍ବରୁ ଦୁଇ ଦୁଇ ଥର ଆବଣ୍ଟନ ନେଇ ହୋଇଥିବା ଯାବତୀୟ ଯୋଜନା ଫେଲ୍‌ ମାରିବା ପରେ ତୃତୀୟ ଥର ପାଇଁ ଆବଣ୍ଟନ ହେବାକୁ ଯାଉଛି ବିଏମ୍‌ସିର ଘାଟିକିଆ ବଜାର। ସୋମବାର ଲଟେରି ଜରିଆରେ ହିତାଧିକାରୀ ଚୟନ କରାଯିବ ବୋଲି ବିଏମ୍‌ସି ବିଜ୍ଞପ୍ତି ଜାରି କରିଛି। ବିଧାନସଭା ଚାଲିଥିବା ବେଳେ ବଏମ୍‌ସିର ମାସିକ ବୈଠକ ବସୁନାହିଁ। କିନ୍ତୁ ଏବେ ଦାୟିତ୍ବରେ ଥିବା ଅଧିକାରୀ ଏହି ଦୋକାନ ବାଣ୍ଟିବା ପାଇଁ ଧୃଷ୍ଟତା ଦେଖାଇଛନ୍ତି। ବର୍ଷ ବର୍ଷ ଧରି ପଡ଼ି ରହିଥିବା ଦୋକାନ ଘର ବାଣ୍ଟିବା ପାଇଁ ଦୁଇ ଦୁଇ ଥର ଉଦ୍ୟମ ଫେଲ୍‌ ମାରିବା ପରେ ନୂଆ କରି ଦାୟିତ୍ବ ନେଇଥିବା ଅଧିକାରୀ କାହିଁକି ଏତେ ତରବର ସେ ନେଇ ପ୍ରଶ୍ନ ଉଠିଛି।

ତୃତୀୟ ଥର ଆବଣ୍ଟନ
ବିଧାନସଭା ଚାଲିଥିବା ବେଳେ ବାଣ୍ଟିବେ

ଘାଟିକିଆ ବିଏମ୍‌ସି ବଜାରରେ ୨୨ଟି କିଓସ୍କ ଓ ୪୦ ପିଣ୍ଡି (କ୍ୟାନୋପି ସେଡ୍‌) ନିର୍ମାଣ ହୋଇଛି। ନିୟମ ମୁତାବକ ଏଭଳି ନୂଆ ନିର୍ମାଣ ହେଲେ ପ୍ରଥମେ ସେହି ଅଞ୍ଚଳର ବ୍ୟବସାୟୀଙ୍କୁ ସେଠାରେ ଦୋକାନ ଯୋଗାଇ ଦେବା ନିୟମ ରହିଛି। ଆବଶ୍ୟକ ପଡ଼ିଲେ ଅନ୍ୟ ଜାଗାରୁ ବ୍ୟବସାୟୀଙ୍କୁ ଆଣିବା କଥା। କିନ୍ତୁ ପ୍ରଥମେ ବିଏମ୍‌ସି ୫ କିମି ଦୂର ସିଆରପି ଛକରୁ ବ୍ୟବସାୟୀଙ୍କୁ ଆଣି ଏଠାରେ ବସାଇବା ପାଇଁ ଯୋଜନା କରିଥିଲା। ଦୂର ଯୋଗୁ ବ୍ୟବସାୟୀମାନେ ଆସିଲେ ନାହିଁ। ଏହା ଫେଲ୍‌ ମାରିବା ପରେ ଅନ୍ୟ ସ୍ଥାନରୁ ବାଛି ବାଛି ଆଣିବା ପାଇଁ ଯୋଜନା କଲେ। ହେଲେ ସେଥିରେ ବି ସଫଳ ହେଲେନି। ଏହି ଦୁଇ ଥର ବିଏମ୍‌ସି ଯେଉଁ ଯୋଜନା କରିଥିଲା ତାହା ଫେଲ୍‌ ମାରିବା ପରେ ନୂଆ କରି ଆବଣ୍ଟନ କରିବାକୁ ‌ଯୋଜନା ହୋଇଥିଲା। ପୂର୍ବରୁ ଅଚଳ ହୋଇ ପଡ଼ି ରହିଥିବା ଟାଉନ୍‌ ଭେଣ୍ଡିଂ କମିଟିର ଜଣେ ସଦସ୍ୟ ଏହି ପ୍ରକ୍ରିୟା ଭିତରେ ପ୍ରବେଶ କରିଥିଲେ। ସେ ୬୨ ବ୍ୟବସାୟୀଙ୍କ ତାଲିକା ଦେଇଥିଲେ। ସେହି ତାଲିକା ଆଧାରରେ ବାଣ୍ଟି ଦେବାପାଇଁ ବିଏମ୍‌ସି ରାଜି ହୋଇ ଯାଇଥିଲା। ଏହି ତାଲିକାକୁ ନେଇ ବିଏମ୍‌ସି ଆପତ୍ତି/ପ୍ରସ୍ତାବ ଆହ୍ବାନ କରିଥିଲା। ଅବଧି ଶେଷ ହେବା ପରେ ଆସନ୍ତାକାଲି ଏହାକୁ ଆବଣ୍ଟନ କରିଦେବାକୁ ଯୋଜନା ହୋଇଛି। ତେବେ ବିଧାନସଭା ଚାଲିଥିବା ବେଳେ ତରବରରେ ବାଣ୍ଟିଦେବା ପଛରେ ମନ୍ଦ ଉଦ୍ଦେଶ୍ୟ ଥିବା ଅଭିଯୋଗ ହୋଇଛି।

ସୂଚନାଯୋଗ୍ୟ, ବିଏମ୍‌ସି ପ୍ରସ୍ତୁତ କରିଥିବା ତାଲିକାରେ ଖଣ୍ଡଗିରିବାରି, ଖଣ୍ଡଗିରି ଛକ, ବିପୁଲ ଗାର୍ଡେନ୍‌ ଛକ, ଜୟଦେବ ବାଟିକା, ନାକା ଗେଟ୍‌, କଳିଙ୍ଗନଗର, ସିଇଟି କଲେଜ୍‌ ରୋଡ୍‌ ପ୍ରଭୃତି ଅଞ୍ଚଳରୁ ୬୨ ଜଣ ବ୍ୟବସାୟୀ ରହିଛନ୍ତି। ଏଥିରେ ମଧ୍ୟ ପାତରଅନ୍ତର ହୋଇଥିବା ଅଭିଯୋଗ ହୋଇଛି। କିଏ ସର୍ଭେ କଲା? ୬୨ ଜାଗା ଖାଲି ଅଛି, ଠିକ୍‌ ୬୨ ବ୍ୟବସାୟୀ ଚିହ୍ନଟ ହେଲେ କିଭଳି? ଏଭଳି ଅନେକ ପ୍ରଶ୍ନ ଏହି ପ୍ରକ୍ରିୟାକୁ ବିବାଦୀୟ କରିଛି।

ସୌଜନ୍ୟ-ସମ୍ୱାଦ