ଜାତୀୟ ବାଳିକା ହକି: ଓଡ଼ିଶାକୁ କାଂସ୍ୟ

ଭୁବନେଶ୍ବର: ତେଲେଙ୍ଗାନାରେ ଆୟୋଜିତ ଚତୁର୍ଦ୍ଦଶ ଜାତୀୟ ଉପକନିଷ୍ଠ ବାଳିକା ହକିରେ ଓଡ଼ିଶା କାଂସ୍ୟ ପଦକ ଜିତିଛି। ଶୁକ୍ରବାର ତୃତୀୟ ସ୍ଥାନ ଲାଗି ହୋଇଥିବା ମୁକାବିଲାରେ ଓଡ଼ିଶା ୪-୩ ଗୋଲ୍‌ରେ ମିଜୋରାମକୁ ହରାଇଛି। ଅଞ୍ଜନା ଖାଖା (୪ ମିନିଟ୍‌)ଙ୍କ ଗୋଲ୍‌ରେ ଓଡ଼ିଶା ପ୍ରାରମ୍ଭିକ ଅଗ୍ରଣୀ ନେଇଥିଲା। ଏହାପରେ ପ୍ରିୟଙ୍କା ମିଞ୍ଜ (୯, ୧୨, ୧୨ ମିନିଟ୍‌) ହ୍ୟାଟ୍ରିକ୍‌ ଅର୍ଜନ କରି ପ୍ରଥମ କ୍ବାର୍ଟରରେ ଓଡ଼ିଶାକୁ ୪-୦ରେ ଆଗରେ ରଖିଥିଲେ। ଦ୍ବିତୀୟ କ୍ବାର୍ଟରରେ ମିଜୋରାମର ମାଙ୍ଗଲାମସାଙ୍ଗ (୨୮)‌ ଗୋଟିଏ ଗୋଲ୍‌ ଶୁଝିଥିଲେ।

ଦ୍ବିତୀୟାର୍ଦ୍ଧରେ ଭାନଲାଲରିନଲୁଇ (୩୬, ୫୨ ମିନିଟ୍‌) ଆଉ ଦୁଇ ଗୋଲ୍‌ ଶୁଝି ପରାଜୟ ବ୍ୟବଧାନକୁ କମ୍‌ କରିଥିଲେ। ଫାଇନାଲ୍‌ରେ ଝାଡ଼ଖଣ୍ଡ ୧-୦ ଗୋଲ୍‌‌ରେ ମଧ୍ୟପ୍ରଦେଶକୁ ହରାଇ ବିଜେତା ହୋଇଛି। ଉଦ୍‌ଯାପନୀ ଉତ୍ସବ‌ରେ ତେଲେଙ୍ଗାନା ମୁଖ୍ୟମନ୍ତ୍ରୀ ରେବାନ୍ତ ରେଡ୍ଡୀ ଯୋଗ ଦେଇ ବିଜେତା ଦଳକୁ ୩ଲକ୍ଷ, ଉପବିଜେତା ଦଳକୁ ୨ଲକ୍ଷ ଏବଂ ତୃତୀୟ ସ୍ଥାନ ଦଖଲ କରିଥିବା ଓଡ଼ିଶାକୁ ୧ଲକ୍ଷ ଟଙ୍କା ପୁରସ୍କାର ରାଶି ପ୍ରଦାନ କରିଛନ୍ତି।

ସୌଜନ୍ୟ-ସମ୍ୱାଦ