ଜାପାନରେ ‘ମେଗାକ୍ବେକ୍’ର ପୂର୍ବାନୁମାନ: ୩ ଲକ୍ଷ ମୃତ୍ୟୁ ହୋଇପାରେ

ଟୋକିଓ: ଜାପାନରେ ‘ମେଗାକ୍ବେକ୍’ (ପ୍ରଳୟଙ୍କରୀ ଭୂକମ୍ପ) ଓ ପରବର୍ତ୍ତୀ ସୁନାମି ଯୋଗୁଁ ୨,୯୮,୦୦୦ ଲୋକଙ୍କ ମୃତ୍ୟୁ ହୋଇପାରେ ଏବଂ ୨ ଟ୍ରିଲିୟନ ଡଲାର ପର୍ଯ୍ୟନ୍ତ କ୍ଷୟକ୍ଷତି ହୋଇପାରେ ବୋଲି ସରକାର ସୋମବାର ଏକ ନୂତନ ଆକଳନରେ କହିଛନ୍ତି। ଦକ୍ଷିଣ ଜାପାନରେ ୨୦୨୪ରେ ୭.୧ ତୀବ୍ରତାର ଭୂମିକମ୍ପ ଅନୁଭୂତ ହେବା ପରେ ଏହି ସତର୍କ ସୂଚନା ଜାରି କରାଯାଇଛି। ସମ୍ଭାବ୍ୟ ‘ମେଗାକ୍ବେକ୍’ ପରିସ୍ଥିତିରେ ୧.୨୩ ନିୟୁତ ଲୋକ ବା ମୋଟ ଜନସଂଖ୍ୟାର ୧୦ ପ୍ରତିଶତ ସ୍ଥାନାନ୍ତର ହେବାର ସମ୍ଭାବନା ରହିଛି ବୋଲି ଜାପାନ ସରକାର ଉଲ୍ଲେଖ କରିଛନ୍ତି। ଜାପାନ ୨୦୨୪ ଅଗଷ୍ଟରେ ପ୍ରଥମ ଥର ପାଇଁ ନାନକାଇ ଟ୍ରଫ୍‌ରେ ସମ୍ଭାବ୍ୟ ମେଗାକ୍ବେକ୍ ପାଇଁ ଆଡଭାଇଜରୀ ଜାରି କରିଥିଲା, ଯାହା କି ସିଜୁଓକାଠାରୁ କ୍ୟୁଶୁ ପର୍ଯ୍ୟନ୍ତ ୯୦୦ କିଲୋମିଟର ସମୁଦ୍ର ତଳେ ରହିଛି। ୨୦୧୧ର ପ୍ରଳୟଙ୍କର ଭୂକମ୍ପ, ସୁନାମି ଏବଂ ଫୁକୁସିମା ପରମାଣୁ ବିପର୍ଯ୍ୟୟ ପରେ ଏହି ମେଗାକ୍ବେକ୍ ଉପଦେଶାବଳୀ ପ୍ରସ୍ତୁତ କରାଯାଇଥିଲା। ଟୋକିଓର ତତ୍ପରତା ଟ୍ରଫ୍‌ର ଅସ୍ଥିର ଟେକ୍ଟୋନିକ୍ କାର୍ଯ୍ୟକଳାପରୁ ଉତ୍ପନ୍ନ ହୋଇଛି, ଯେଉଁଠାରେ ଫିଲିପିନ ସି ପ୍ଲେଟ୍ ୟୁରେସିଆନ୍ ପ୍ଲେଟ୍ ତଳେ ଅବସ୍ଥିତ, ଯାହା ୯.୧ ତୀବ୍ରତା ପର୍ଯ୍ୟନ୍ତ ଭୂମିକମ୍ପ ସୃଷ୍ଟି କରିବାରେ ସକ୍ଷମ।

ଟୋକିଓ କାହିଁକି ମହାକମ୍ପନକୁ ଭୟ କରୁଛି?- ଜାପାନ ସରକାରଙ୍କ ଆକଳନ ଅନୁଯାୟୀ ଆସନ୍ତା ୩୦ ବର୍ଷ ମଧ୍ୟରେ ନାନକାଇ ଟ୍ରଫ୍‌ରେ ୮-୯ ତୀବ୍ରତାର ଭୂକମ୍ପ ହେବାର ସମ୍ଭାବନା ୭୦-୮୦% ରହିଛି। ଐତିହାସିକ ଢାଞ୍ଚାରେ ଏଠାରେ ପ୍ରତି ୧୦୦-୨୦୦ ବର୍ଷରେ ମେଗାକ୍ବେକ୍‌ର ପୁନରାବୃତ୍ତି ଦେଖାଯାଏ, ଯାହା କି ୧୯୪୬ରେ ଶେଷ ବଡ଼ ଘଟଣା ଥିଲା। ଏଭଳି ଭୂକମ୍ପ ଯୋଗୁଁ କିଛି ମିନିଟ୍ ମଧ୍ୟରେ ୩୦-୩୪ ମିଟର ପର୍ଯ୍ୟନ୍ତ ସୁନାମି ଆସିପାରେ, ଯାହା ଶିଜୁଓକା, କୋଚି ଓ ୱାକାୟାମା ଭଳି ଉପକୂଳବର୍ତ୍ତୀ ଅଞ୍ଚଳକୁ ଧ୍ୱଂସ କରିଦେଇପାରେ। ଟୋକିଓର ସଦ୍ୟ ଆକଳନ- ୨୦୧୪ରେ ୩,୨୩,୦୦୦ ମୃତ୍ୟୁର ପୂର୍ବାନୁମାନ କରାଯାଇଥିଲା, ଯାହାକୁ ଏବେ ସଂଶୋଧନ କରାଯାଇଛି। ସଂଶୋଧିତ ଆକଳନ ଅନୁସାରେ ସୁନାମି ପାଇଁ ୨,୧୫,୦୦୦, କୋଠା ଭୁଶୁଡ଼ିବା ଯୋଗୁ ୭୩,୦୦୦ ଏବଂ ଅଗ୍ନିକାଣ୍ଡ ଯୋଗୁଁ ୯,୦୦୦ ପର୍ଯ୍ୟନ୍ତ ମୃତ୍ୟୁ ହୋଇପାରେ ବୋଲି ପୂର୍ବାନୁମାନ କରାଯାଇଛି।

ନାନକାଇ ଟ୍ରଫ୍‌ କାହିଁକି ବିପଜ୍ଜନକ?-ଶତାବ୍ଦୀ ଧରି ଜମା ହୋଇଥିବା ନାନକାଇ ଟ୍ରଫ୍‌ର ଟେକ୍ଟୋନିକ୍ ଷ୍ଟ୍ରେନ୍ କ୍ରମାଗତ ମେଗାକ୍ବେକ୍‌ର ସମ୍ଭାବନା ହେତୁ ବିପଦ ସୃଷ୍ଟି କରିଛି। ଟୋହୋକୁ ଓ କିୟୋଟୋ ୟୁନିଭର୍ସିଟିର ଗବେଷଣାରୁ ଜଣାପଡିଛି ଯେ ଏଠାରେ ୭ରୁ ଅଧିକ ତୀବ୍ରତାର ଭୂମିକମ୍ପ ଏକ ସପ୍ତାହ ମଧ୍ୟରେ ସ୍ୱାଭାବିକଠାରୁ ୧୦୦-୩,୬୦୦ ଗୁଣ ଅଧିକ ପଶ୍ଚାତ୍ କମ୍ପନର ସମ୍ଭାବନା ବଢାଇଥାଏ। ଟୋକିଓର ପଶ୍ଚିମରେ ଥିବା ଶିଜୁଓକାଠାରୁ କ୍ୟୁଶୁ ଦ୍ୱୀପର ଦକ୍ଷିଣ ମୁଣ୍ଡ ପର୍ଯ୍ୟନ୍ତ ୮୦୦ କିଲୋମିଟର ସମୁଦ୍ର ତଳେ ଥିବା ଏହି ଖାଲ ରହିଛି। ଏଠାରେ ଫିଲିପିନ୍ସ ସାଗରର ମହାସାଗରୀୟ ଟେକ୍ଟୋନିକ୍ ପ୍ଲେଟ୍ ଜାପାନ ବସିଥିବା ମହାଦେଶୀୟ ପ୍ଲେଟ୍ ତଳେ ‘ସବ୍‌ଡକ୍ଟିଂ’ ହେଉଛି ଅର୍ଥାତ୍ ଧୀରେ ଧୀରେ ଖସୁଛି। ପ୍ଲେଟ୍‌ଗୁଡ଼ିକ ଚାଲିବା ସମୟରେ ଅଟକି ଯାଏ ଏବଂ ମୁକ୍ତ ହେବା ପରେ ନିର୍ଗତ ହେଉଥିବା ବିପୁଳ ପରିମାଣର ଶକ୍ତି ସଞ୍ଚୟ କରିଥାଏ, ଯାହା ସମ୍ଭାବ୍ୟ ଭୟଙ୍କର ଭୂମିକମ୍ପ ସୃଷ୍ଟି କରିଥାଏ। ୨୦୧୧ରେ ହୋଇଥିବା ତୋହୋକୁ ଭୂମିକମ୍ପରେ ୧୮,୦୦୦ ଲୋକଙ୍କ ମୃତ୍ୟୁ ହେବା ସହ ଫୁକୁସିମା ପରମାଣୁ ସଙ୍କଟ ସୃଷ୍ଟି କରିଥିଲା। ଉତ୍ତର-ପୂର୍ବ ଜାପାନର ଏକ ଆଣବିକ ଶକ୍ତି କେନ୍ଦ୍ରରେ ଏହି ୯ ତୀବ୍ରତାର ଭୂମିକମ୍ପରେ ତିନୋଟି ରିଆକ୍ଟର ତରଳି ଭୁଶୁଡ଼ି ପଡ଼ିବାରୁ ୧୫,୦୦୦ରୁ ଅଧିକ ଲୋକ ପ୍ରାଣ ହରାଇଥିଲେ।

ସୌଜନ୍ୟ-ସମ୍ୱାଦ