ଡିନର ପାର୍ଟିରେ ଇଣ୍ଡୋନେସିଆ ରାଷ୍ଟ୍ରପତିଙ୍କ କଥା ଶୁଣି କାହିଁକି ହସିଲେ ମୋଦି

ନୂଆଦିଲ୍ଲୀ,୨୭।୧: ରବିବାର ସାରେ ଇଣ୍ଡୋନେସିଆର ରାଷ୍ଟ୍ରପତି ପ୍ରବୋଓ ସୁବିୟାଣ୍ଟୋଙ୍କ ସମ୍ମାନାର୍ଥେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏକ ରାତ୍ରୀଭୋଜନର ଆୟୋଜନ କରିଥିଲେ। ଏହି ରାତ୍ରୀଭୋଜନ କାର୍ଯ୍ୟକ୍ରମରେ ଇଣ୍ଡୋନେସିଆର ରାଷ୍ଟ୍ରପତି ପ୍ରବୋଓ ସୁବିଆଣ୍ଟୋ ଏପରି କିଛି କଥା କହିଥିଲେ ଯାହା ଶୁଣି ପ୍ରଧାନମନ୍ତ୍ରୀ ମୋଦି ସମେତ ସେଠାରେ ଥିବା ସମସ୍ତ ବିଶିଷ୍ଟ ବ୍ୟକ୍ତି ହସି ପକାଇଥିଲେ। ଇଣ୍ଡୋନେସିଆ ରାଷ୍ଟ୍ରପତି ଭାରତ ଏବଂ ଇଣ୍ଡୋନେସିଆ ମଧ୍ୟରେ ପ୍ରାଚୀନ ସମ୍ପର୍କ ବିଷୟରେ ମଧ୍ୟ କହିଥିଲେ ଏବଂ କହିଥିଲେ ଯେ ଆମ ଭାଷାର ଅନେକ ଗୁରୁତ୍ୱପୂର୍ଣ୍ଣ ଶବ୍ଦ ସଂସ୍କୃତ ଭାଷାରୁ ଆସିଛି।
ରାତ୍ରୀଭୋଜନ ସମୟରେ ଇଣ୍ଡୋନେସିଆର ରାଷ୍ଟ୍ରପତି ପ୍ରବୋଓ ସୁବିୟାଣ୍ଟୋ କହିଥିଲେ ଯେ ‘ଭାରତ ଏବଂ ଇଣ୍ଡୋନେସିଆ ମଧ୍ୟରେ ପାରସ୍ପରିକ ସମ୍ପର୍କର ଇତିହାସ ବହୁତ ପୁରୁଣା।’ ଉଭୟ ଦେଶର ସଭ୍ୟତା ମଧ୍ୟରେ ଏକ ସମ୍ପର୍କ ରହିଛି। ଆମର ଅନେକ ନାମ ମଧ୍ୟ ସଂସ୍କୃତ ଭାଷାରୁ ଆସିଛି। ପ୍ରାଚୀନ ଭାରତୀୟ ସଭ୍ୟତାର ପ୍ରଭାବ ଆମ ଦୈନନ୍ଦିନ ଜୀବନରେ ମଧ୍ୟ ରହିଛି। ଆମର ଜିନ ମଧ୍ୟ ସମାନ। ଇଣ୍ଡୋନେସିଆର ରାଷ୍ଟ୍ରପତି କହିଥିଲେ, ‘କିଛି ସପ୍ତାହ ପୂର୍ବରୁ ମୁଁ ମୋର ଜେନେଟିକ୍ସ ସିକୋଏନ୍ସିଂ ଏବଂ ଡିଏନଏ ପରୀକ୍ଷା କରାଇଥିଲି।’ ମୋତେ କୁହାଗଲା ଯେ ମୋର ଡିଏନଏ ଭାରତୀୟ। ସମସ୍ତେ ଜାଣନ୍ତି ଯେ ମୁଁ ଭାରତୀୟ ସଙ୍ଗୀତ ଶୁଣିବା ମାତ୍ରେ ନାଚିବା ଆରମ୍ଭ କରିଦିଏ।
ସୁବିୟାଣ୍ଟୋ କହିଥିଲେ ଯେ ମୁଁ ଏଠାକୁ (ଭାରତ) ଆସି ଗର୍ବିତ। ମୁଁ ଜଣେ ପ୍ରକୃତ ରାଜନେତା ନୁହେଁ, କିମ୍ବା ମୁଁ ଜଣେ ଭଲ କୂଟନୀତିଜ୍ଞ ନୁହେଁ, ମୁଁ ଯାହା କହୁଛି, ମୁଁ ତାହା ମୋ ହୃଦୟରୁ କହୁଛି। ମୁଁ ଏଠାକୁ ଆସିବାର ମାତ୍ର କିଛି ଦିନ ହୋଇଛି, କିନ୍ତୁ ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ୱ ଏବଂ ତାଙ୍କ ସମର୍ପଣରୁ ମୁଁ ବହୁତ କିଛି ଶିଖିଛି। ଦାରିଦ୍ର୍ୟ ଦୂରୀକରଣ ଏବଂ ଅବହେଳିତ ଲୋକଙ୍କୁ ସାହାଯ୍ୟ କରିବା ପାଇଁ ତାଙ୍କର ଉତ୍ସର୍ଗୀକୃତତା ଆମ ପାଇଁ ପ୍ରେରଣାଦାୟକ। ଇଣ୍ଡୋନେସିଆ ଭାରତର ସମୃଦ୍ଧି, ଶାନ୍ତି କାମନା କରିଛି ଏବଂ ଭାରତ ଏବଂ ଇଣ୍ଡୋନେସିଆ ମଧ୍ୟରେ ସମ୍ପର୍କ ଆହୁରି ମଜବୁତ ହେବ ବୋଲି ଆଶା ପ୍ରକାଶ କରିଛି। ଇଣ୍ଡୋନେସିଆର ରାଷ୍ଟ୍ରପତି ଭାରତର ୭୬ତମ ଗଣତନ୍ତ୍ର ଦିବସ ସମାରୋହରେ ମୁଖ୍ୟ ଅତିଥି ଭାବରେ ଯୋଗ ଦେଇଥିଲେ।

ସୌଜନ୍ୟ-ଧରିତ୍ରୀ