ଡ୍ୟୁଟି ଛାଡି ଘରକୁ ପଳାଇଲେ ଆଇପିଏସ ଅଧିକାରୀ, ନିଲମ୍ବନ କଲେ ନିର୍ବାଚନ ଆୟୋଗ

ନୂଆଦିଲ୍ଲୀ: ଆଇପିଏସ୍ ଅଧିକାରୀ କିଶନ ସହାୟ ମୀନାଙ୍କୁ ନିର୍ବାଚନ ଆୟୋଗ ନିଲମ୍ବିତ କରିଛନ୍ତି। କିଶନ ସହାୟ ମୀନା ରାଜସ୍ଥାନ କ୍ୟାଡରର ୨୦୦୪ ବ୍ୟାଚ୍ ଆଇପିଏସ୍ ଅଧିକାରୀ। ନିର୍ବାଚନ ଆୟୋଗଙ୍କୁ ନ ଜଣାଇ ନିର୍ବାଚନ ଡ୍ୟୁଟି ଛାଡି ସେ ତାଙ୍କ ଘର ଜୟପୁରକୁ ପଳାଇଯାଇଥିବାରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଜି (୧୩ ନଭେମ୍ବର) ଝାଡ଼ଖଣ୍ଡ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ପାଇଁ ମତଦାନ ଚାଲିଛି।

ମିଳିଥିବା ସୂଚନା ମୁତାବକ କିଶନ ସହାୟ ମୀନାଙ୍କୁ ଝାଡଖଣ୍ଡରେ ନିର୍ବାଚନ ଆୟୋଗ ଦାୟିତ୍ୱ ଦେଇଥିଲେ, କିନ୍ତୁ ସେ ନିର୍ବାଚନ ଆୟୋଗଙ୍କୁ ନ ଜଣାଇ ଝାଡଖଣ୍ଡରୁ ଜୟପୁରକୁ ଫେରିଆସିଥିଲେ। ଏହି କାରଣରୁ ନିର୍ବାଚନ ଆୟୋଗ କିଶନ ସହାୟ ମୀନାଙ୍କୁ ନିଲମ୍ବିତ କରିଛନ୍ତି। କାର୍ଯ୍ୟରେ ଅବହେଳା ପାଇଁ କିଶନ ସହାୟ ମୀନାଙ୍କୁ ଏକ କାରଣଦର୍ଶାଅ ନୋଟିସ ମଧ୍ୟ ଦିଆଯିବ | ନିର୍ବାଚନ ଆୟୋଗ ରାଜସ୍ଥାନ ସରକାରଙ୍କୁ ଲେଖିଥିବା ଚିଠିରେ ଲେଖିଛନ୍ତି ଯେ ଝାଡ଼ଖଣ୍ଡରେ ଆୟୋଜିତ ହେବାକୁ ଥିବା ବିଧାନସଭା ନିର୍ବାଚନ ପାଇଁ କିଶନ ସହାୟ ମୀନାଙ୍କୁ ସିସାଇ, ଗୁଲମା ଏବଂ ବିଷ୍ଣୁପୁର ବିଧାନସଭା ଆସନ ପାଇଁ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରାଯାଇଥିଲା ।

ସେ ୨୮ ଅକ୍ଟୋବରରେ ନିର୍ବାଚନ ଆୟୋଗଙ୍କୁ ନ ଜଣାଇ ନିଜ ପୋଷ୍ଟିଂ ସ୍ଥାନ ଛାଡି ରାଜସ୍ଥାନ ପଳାଇ ଆସିଥିଲେ | ଅକ୍ଟୋବର ୨୧ରେ ତାଙ୍କ ନାମ ରାଜସ୍ଥାନ ସରକାର ସୁପାରିଶ କରିଥିଲେ। ଏହା ପରେ ତାଙ୍କୁ ନିଯୁକ୍ତ କରାଯାଇଥିଲା। ସେ ଆୟୋଗଙ୍କ ଅନୁମତି ବିନା ଜୟପୁର ଚାଲିଯାଇଥିଲେ। ଚାକିରିରେ ଅବହେଳା ହେତୁ ତାଙ୍କୁ ନିଲମ୍ବିତ କରାଯାଇଛି ବୋଲି ନିର୍ବାଚନ ଆୟୋଗଙ୍କ ପକ୍ଷରୁ ଜଣାଇଦିଆଯାଇଛି | କିଶନ ସହାୟ ମୀନା ମୁଖ୍ୟତଃ ରାଜସ୍ଥାନର ଅଲୱାର ବାସିନ୍ଦା। ବର୍ତ୍ତମାନ ସେ ରାଜସ୍ଥାନର ମାନବ ଅଧିକାର ୟୁନିଟରେ ପୁଲିସର ମହାନିର୍ଦ୍ଦେଶକ ଭାବରେ କାର୍ଯ୍ୟ କରୁଥିଲେ।
ସୌଜନ୍ୟ-ସମ୍ୱାଦ