ଥିଏଟରରେ ଅଧାରୁ ଶେଷ ହୋଇଗଲା ‘ପୁଷ୍ପା-୨’ ଫିଲ୍ମ, ଟଙ୍କା ଫେରସ୍ତ କରିବାକୁ ଦାବିକଲେ ଦର୍ଶକ

ମୁମ୍ବାଇ ୧୧/୧୨: ଡିସେମ୍ବର ୫ ତାରିଖରେ ରିଲିଜ୍‌ ହୋଇଥିବା ଅଲ୍ଲୁ ଅର୍ଜୁନ, ରଶ୍ମିକା ମନ୍ଦାନାଙ୍କ ଫିଲ୍ମ ‘ପୁଷ୍ପା-୨’ ବକ୍ସ ଅଫିସ୍‌ରେ ଜବରଦସ୍ତ ସଫଳତା ହାସଲ କରିଛି । ତେବେ କୋଚିର ସିନେପୋଲିସ୍‌ ସେଣ୍ଟର ସ୍କେ୍ୱାୟାର ମଲ୍‌ ଥିଏଟରରେ ଗତ ଶୁକ୍ରବାର ଏହାର ଶୋ’ ଚାଲିଥିବାବେଳେ ମଧ୍ୟାନ୍ତରରେ ହିଁ ଫିଲ୍ମଟି ଶେଷ ହୋଇଯାଇଥିଲା । ଏହା ଦେଖି ଦର୍ଶକମାନେ ରାଗି ଯାଇଥିଲେ । କିଛି ଲୋକ ଟଙ୍କା ଫେରାଇବାକୁ ଅଡ଼ି ବସିଥିଲେ ।

ରିପୋର୍ଟ ଅନୁସାରେ, ଥିଏଟରରେ ଶୁକ୍ରବାର ସନ୍ଧ୍ୟା ୬.୩୦ରେ ‘ପୁଷ୍ପା-୨’ର ଶୋ’ ଚାଲିଥିଲା । ଇଣ୍ଟରଭାଲ ବା ମଧ୍ୟାନ୍ତର ସମୟରେ ଫିଲ୍ମ ଶେଷ ହେବା ସମୟର ଦୃଶ୍ୟ ପ୍ରଦର୍ଶିତ ହୋଇଥିଲା । ଏହା ଦେଖି ଦର୍ଶକମାନେ ୩ଘଣ୍ଟା ୨୦ ମିନିଟ୍‌ ଅବଧିର ଫିଲ୍ମର ପ୍ରଥମ ଭାଗ ନୁହେଁ, ଦ୍ୱିତୀୟ ଭାଗ ସେମାନଙ୍କୁ ଦେଖାଯାଇଥିବା ବୁଝିଯାଇଥିଲେ । ଏପରିସ୍ଥଳେ କିଛି ଦର୍ଶକ ଥିଏଟର ପରିଚାଳନା କର୍ତ୍ତୃପକ୍ଷଙ୍କ ଏହି ଭୁଲ୍‌ ଲାଗି ଟଙ୍କା ଫେରସ୍ତ ମାଗିଥିବାବେଳେ ଅନ୍ୟମାନେ ଫିଲ୍ମର ପ୍ରଥମ ଭାଗ ଦେଖାଇବା ଉପରେ ଜୋର୍‌ ଦେଇଥିଲେ । ସେମାନଙ୍କ ଦାବି ଆଗରେ ଶେଷରେ ମୁଣ୍ଡ ନୁଆଁଇଥିଲେ ଥିଏଟର ପରିଚାଳନା କର୍ତ୍ତୃପକ୍ଷ । ରାତି ପ୍ରାୟ ୯ଟାରେ ଫିଲ୍ମର ପ୍ରଥମ ଭାଗକୁ ଦେଖାଯାଇଥିଲା । ସେତେବେଳେ କିନ୍ତୁ ଥିଏଟରରେ ମାତ୍ର ୧୦ ଜଣ ଦର୍ଶକ ଥିଲେ । ସେହିପରି ଥିଏଟର କର୍ତ୍ତୃପକ୍ଷ ଦର୍ଶକଙ୍କୁ ଟଙ୍କା ଫେରାଇବାକୁ ପ୍ରତିଶ୍ରୁତି ଦେଇଥିବା ଜଣାପଡି଼ଛି ।

ସୌଜନ୍ୟ-ପ୍ରମେୟ