ଦିଲ୍ଲୀରେ ବେଆଇନ ଇମିଗ୍ରେସନ ରୢାକେଟ୍‌ର ପର୍ଦ୍ଦାଫାସ: ୫ ବାଂଲାଦେଶୀଙ୍କ ସହ ୧୧ ଗିରଫ

ନୂଆଦିଲ୍ଲୀ: ସଙ୍ଗମ ବିହାର ହତ୍ୟାକାଣ୍ଡର ତଦନ୍ତ ପରେ ଦିଲ୍ଲୀ ପୁଲିସ ବାଂଲାଦେଶୀ ନାଗରିକଙ୍କୁ ନେଇ ଏକ ବେଆଇନ ଇମିଗ୍ରେସନ ରୢାକେଟର ପର୍ଦ୍ଦାଫାସ କରିଛି। ଏହି ମାମଲାରେ ୫ ଜଣ ବାଂଲାଦେଶୀ ନାଗରିକଙ୍କୁ ଗିରଫ କରାଯାଇଛି। ଏଥି ସହ ଆଉ ୬ ଜଣଙ୍କୁ ନକଲି କାଗଜପତ୍ର ପ୍ରସ୍ତୁତି ଅଭିଯୋଗରେ ଗିରଫ କରାଯାଇଛି ବୋଲି ଦକ୍ଷିଣ ଜିଲ୍ଲାର ଡିସିପି ଅଙ୍କିତ ଚୌହାନ ପ୍ରକାଶ କରିଛନ୍ତି। ହତ୍ୟାକାଣ୍ଡର ଶିକାର ହୋଇଥିବା ସେଟନ୍ ଶେଖ୍ ନକଲି ଆଧାର କାର୍ଡ ତିଆରିରେ ବାଂଲାଦେଶୀ ପ୍ରବାସୀଙ୍କୁ ସାହାଯ୍ୟ କରୁଥିବା ଜାଣିବା ପରେ ଏହି ସଫଳତା ମିଳିଥିଲା। ଶେଖ୍‌ଙ୍କ ସହଯୋଗୀଙ୍କ ଉପରେ ସନ୍ଦେହ ହେବାରୁ ସେମାନଙ୍କୁ ଜେରା କରାଯାଇଥିଲା, ଯେଉଁମାନେ ଆର୍ଥିକ ବିବାଦ ଓ ବ୍ୟକ୍ତିଗତ କଳହରୁ ଏହି ହତ୍ୟାକାଣ୍ଡ ଘଟାଇଥିବା ସ୍ୱୀକାର କରିଛନ୍ତି। ଚଢ଼ାଉ ବେଳେ ପୁଲିସ ୨୧ଟି ନକଲି ଆଧାର କାର୍ଡ, ୬ଟି ପ୍ୟାନ୍ କାର୍ଡ ଓ ୪ଟି ଭୋଟର ପରିଚୟପତ୍ର ଜବତ କରିଛି।

୨୦୨୨ ମସିହାରୁ ରଜତ ମିଶ୍ର ନାମକ ଜଣେ ବ୍ୟକ୍ତିଙ୍କ ଦ୍ୱାରା ପରିଚାଳିତ ଜନତା ପ୍ରିଣ୍ଟ୍ ନାମକ ଏକ ୱେବ୍‌ସାଇଟ୍‌ର ସମ୍ପୃକ୍ତି ଥିବା ଅଧିକ ତଦନ୍ତରୁ ଜଣାପଡ଼ିଥିଲା। ଏହି ପ୍ଲାଟଫର୍ମ ମାତ୍ର ୨୦ ଟଙ୍କାରେ ନକଲି କାଗଜପତ୍ର ତିଆରି କରି ଯୋଗାଉଥିବା ଅଭିଯୋଗ ହୋଇଛି। ଗିରଫ ବ୍ୟକ୍ତିଙ୍କ ମଧ୍ୟରେ ଅଛନ୍ତି ସିଣ୍ଡିକେଟକୁ ସହଯୋଗ କରୁଥିବା ମୁନ୍ନି ଦେବୀ। ଅଧିକାରୀମାନେ ପ୍ରକାଶ କରିଛନ୍ତି ଯେ ଏହି ସଂଗଠିତ ନେଟୱାର୍କ ବାଂଲାଦେଶୀ ପ୍ରବାସୀମାନଙ୍କୁ ଜଙ୍ଗଲ ମାର୍ଗ ଦେଇ ଭାରତରେ ପ୍ରବେଶ କରିବାରେ ସାହାଯ୍ୟ କରିବା ସହ ସେମାନଙ୍କୁ ନକଲି ଆଇଡି, ସିମ୍ କାର୍ଡ ଓ ଆର୍ଥିକ ସହାୟତା ପ୍ରଦାନ କରୁଥିଲା। ପୁଲିସ ଟିମ୍ ମଧ୍ୟ ସୀମାପାର ସଂଯୋଗର ଅନୁସନ୍ଧାନ କରୁଛି ଏବଂ ଜାଲ୍ ଭୋଟର କାର୍ଡ ନିର୍ବାଚନୀ ଠକେଇରେ ବ୍ୟବହୃତ ହୋଇଛି କି ନାହିଁ, ତାହାର ତଦନ୍ତ ଚାଲିଛି।

ସୌଜନ୍ୟ-ସମ୍ୱାଦ