ଦୁବାଇ ସମେତ ୪ ଦେଶକୁ ଯିବ ଓଡ଼ିଶାର ସୁବାସିତ ଚାଉଳ, ରାଜ୍ୟର ଚାଷୀ ପାଇବେ କେଜି ପ୍ରତି ୪୦ ଟଙ୍କା ପର୍ଯ୍ୟନ୍ତ ଲାଭ

ଭୁବନେଶ୍ୱର,୦୪/୦୧: ଦୁବାଇ ସମେତ ୪ ଦେଶକୁ ଯିବ ଓଡ଼ିଶାର ସୁବାସିତ ଚାଉଳ । ଓଡ଼ିଶାର କଳା ଜିରା, ଚିନି କାମିନୀ, କେତକୀ ଜୁହା, ପିମ୍ପୁଡି  ବାସ, ପାଟଣି, ଗୀତାଞ୍ଜଳି, ବାସୁଆଭୋଗ  ଆଦି ସୁଗନ୍ଧ ଚାଉଳର ବିଦେଶରେ ପ୍ରବଳ ଚାହିଦା ରହିଛି । ତେଣୁ ଏହି  ସବୁ ଚାଉଳ ଅଧିକରୁ ଅଧିକ ବିଦେଶକୁ  ରପ୍ତାନୀ କରାଯିବ । ଓଡ଼ିଶାରେ ଏହି  ଚାଉଳ କେଜି ପ୍ରତି ଶହେ ଟଙ୍କାରେ ବିକ୍ରି  ହେଉଥିବା ବିଦେଶରେ ଏହା ୧୨୫ରୁ  ୧୪୦ ଟଙ୍କାରେ ବିକ୍ରି ହେବ । ଏହି ଚାଉଳ ଚାଷୀଙ୍କ ଘରୁ ବିଦେଶକୁ ନେବାର ଖର୍ଚ୍ଚ ମଧ୍ୟ ବିଦେଶୀ କମ୍ପାନୀ ବହନ କରିବ । ଏହି ସୁବାସିତ ଚାଉଳ ଓଡ଼ିଶାରୁ ଦୁବାଇକୁ ପଠାଇବା  ପାଇଁ କୃଷି ଓଡ଼ିଶାର ପ୍ରଥମ ଦିନରେ ୨ଟି କମ୍ପାନୀ  ସହିତ ବୁଝାମଣାପତ୍ର(ଏମ୍‌ଓୟୁ) ସ୍ୱାକ୍ଷର ହୋଇଛି ।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ଉପମୁଖ୍ୟମନ୍ତ୍ରୀ  କନକବର୍ଦ୍ଧନ ସିଂହଦେଓ ଓ ରାଜସ୍ୱ ମନ୍ତ୍ରୀ ସୁରେଶ  ପୂଜାରୀଙ୍କ ଉପସ୍ଥିତିରେ ଦୁବାଇର ଏଗଜିମା ସଲ୍ୟୁସନ୍‌  ଓ ୟୁନିଫି ସଲ୍ୟୁସନ୍‌ ସହ ବୁଝାମଣାପତ୍ର ସ୍ୱାକ୍ଷର କରିଛି  ଓଡ଼ିଶାର କନକ ବାୟୋ ସାଇନ୍ସ ଆଣ୍ଡ ରିସର୍ଚ୍ଚ ପ୍ରାଇଭେଟ୍‌ ଲିମିଟେଡ୍‌ । ଏକ୍ସଜିମା ସଲ୍ୟୁସନ୍‌ ୨୦୦୦ରୁ ୨୫୦୦  ମେଟ୍ରିକ ଟନ୍‌ ସୁଗନ୍ଧିତ ଚାଉଳ ନେବ । ସେହିପରି  ୟୁନିଫି ସଲ୍ୟୁସନ୍‌ ୩୦୦୦ରୁ ୩୫୦୦ ମେଟ୍ରିକ ଟନ୍‌  ସୁବାସିତ ଚାଉଳ ନେବ ।

ସେହିପରି ବ୍ରିଟେନ୍‌, ସାଇପ୍ରସ୍‌ ଓ ମରିସସ୍‌କୁ  ମଧ୍ୟ ସୁବାସିତ ଚାଉଳ ରପ୍ତାନୀ କରାଯିବ । ବ୍ରିଟେନ୍‌ ଓ  ସାଇପ୍ରସକୁ ୬ ହଜାର ମେଟ୍ରିକ ଟନ୍‌ ଓ ମରିସସ୍‌କୁ  ୩ ହଜାର ମେଟ୍ରିକ ଟନ୍‌ ସୁଗନ୍ଧିତ ଚାଉଳ ରପ୍ତାନି  କରିବ ଓଡ଼ିଶାର କନକ ବାୟୋ ସାଇନ୍ସ ଆଣ୍ଡ ରିସର୍ଚ୍ଚ  ପ୍ରାଇଭେଟ୍‌ ଲିମିଟେଡ୍‌ । କମ୍ପାନୀର ପରିଚାଳନା  ନିର୍ଦ୍ଦେଶକ ଡ. ଦୀପକ କୁମାର ସାହୁ ଏହି ସୂଚନା  ଦେଇଛନ୍ତି ।

ଡ. ସାହୁ କହିଛନ୍ତି, ବ୍ରିଟେନ୍‌ ଓ ସାଇପ୍ରସ  କମ୍ପାନୀ ସହ ଆସନ୍ତାକାଲି ଓ ୭ ତାରିଖରେ  ମରିସସ୍‌ର କମ୍ପାନୀ ସହ ବୁଝାମଣାପତ୍ର ସ୍ୱାକ୍ଷର  ହେବ । ଚଳିତବର୍ଷ ମୋଟ ୨୦ ହଜାର ମେଟ୍ରିକ ଟନ୍‌  ସୁବାସିତ ଚାଉଳ ବିଦେଶକୁ ରପ୍ତାନୀ କରାଯିବାକୁ  ଲକ୍ଷ୍ୟ ରହିଛି । କଫି ଓ ବିଭିନ୍ନ ପ୍ରକାରର ଔଷଧୀୟ  ବୃକ୍ଷ ମଧ୍ୟ ରପ୍ତାନି କରାଯିବ । ବିଦେଶରେ କେବଳ  ଜୈବିକ ପଦ୍ଧତିରେ ଉତ୍ପାଦିତ ଦ୍ରବ୍ୟର ଚାହିଦା  ରହିଛି । ତେଣୁ ସେହି ଚାଉଳ ଚାଷ କଲେ ଭଲ  ଦାମ ମିଳିବା ସହିତ ରପ୍ତାନୀ ହେଲେ ଚାଷୀ ଉପକୃତ  ହେବେ ବୋଲି ଡ. ସାହୁ କହିଛନ୍ତି ।

ସୌଜନ୍ୟ-ପ୍ରମେୟ