ଦେବଗଡ଼, କେନ୍ଦୁଝରରେ ସୁନା ଠାବ

ଭୁବନେଶ୍ବର: ଦେବଗଡ଼ ଓ କେନ୍ଦୁଝର ଜିଲ୍ଲାରେ ସୁନା ଥିବାର ସନ୍ଧାନ ମିଳିଥିବା ନେଇ ବିଧାନସଭାରେ ଇସ୍ପାତ ଓ ଖଣି ମନ୍ତ୍ରୀ ବିଭୁତି ଭୂଷଣ ଜେନା ସୂଚନା ଦେଇଛନ୍ତି। ବ୍ୟାପକ ଅନୁସନ୍ଧାନ ଜାରି ରହିଥିବାରୁ ଏହି ଅଞ୍ଚଳରେ ସୁନା ଗଚ୍ଛିତ ଥିବା ଜଣାପଡ଼ିଛି ବୋଲି ସେ କହିଛନ୍ତି। ଦେବଗଡ଼ ଜିଲ୍ଲାର ଅଡସ-ରାମପଲି ଓ କେନ୍ଦୁଝରର ଗୋପୁର-ଗଜିପୁର ଅଞ୍ଚଳରେ ସୁନା ରହିଛି। ଭାରତୀୟ ଭୂବୈଜ୍ଞାନିକ ସର୍ବେକ୍ଷଣ (ଜିଏସ୍‌ଆଇ) ପକ୍ଷରୁ ଅଡସ-ରାମପଲିରେ ଜି୨-ସ୍ତର ଅନ୍ବେଷଣ ସମ୍ପନ୍ନ କରାଯାଇଛି। ସେଥିରୁ ଉତ୍ସାହଜନକ ଫଳ ମିଳିଛି। ସେହିପରି, ଜି୩-ସ୍ତର ଅନ୍ବେଷଣ ବେଳେ ଉତ୍ସାହଜନକ ତଥ୍ୟ ମିଳିବାରୁ ଗୋପୁର-ଗଜିପୁର ଅଞ୍ଚଳରେ ଜି୨-ସ୍ତର ଅନ୍ବେଷଣ ଜାରି ରହିଛି ବୋଲି ମନ୍ତ୍ରୀ ସୂଚନା ଦେଇଛନ୍ତି। ଏହି ଦୁଇ କ୍ଷେତ୍ରର ପୂର୍ଣ୍ଣ ସମ୍ଭାବନାକୁ ଚିହ୍ନଟ କରିବା ଲାଗି ଜିଏସ୍‌ଆଇ ଓ ଖଣି ନିର୍ଦ୍ଦେଶାଳୟ ଅନ୍ବେଷଣ ଜାରି ରଖିଛନ୍ତି।