ନୂଆଦିଲ୍ଲୀ: ଦେଶବ୍ୟାପୀ ୬୮ କୋଟିରୁ ଅଧିକ ଇମେଲ୍ ଆକାଉଣ୍ଟ ଏବଂ ପାସୱାର୍ଡ ଲିକ୍ ହେବା ଘଟଣା ସାମ୍ନାକୁ ଆସିଛି । ଏହି ଖବର ମିଳିବା ପରେ, ମଧ୍ୟପ୍ରଦେଶ ସାଇବର ସେଲ୍ ସତର୍କ ହୋଇଯାଇଛି। ଅନେକ ତଦନ୍ତ ସଂସ୍ଥା ମଧ୍ୟ ସତର୍କ ହୋଇଯାଇଛନ୍ତି। ମଧ୍ୟପ୍ରଦେଶ ରାଜ୍ୟ ସାଇବର ସେଲ୍ ଏକ ନିର୍ଦ୍ଦେଶାବଳୀ ଜାରି କରି କହିଛି ଯେ, ଇମେଲ୍ ବ୍ୟବହାରକାରୀମାନେ ସେମାନଙ୍କର ପାସୱାର୍ଡ ପୁନଃ ସେଟ୍ କରନ୍ତୁ।
ଦେଶରେ ଯେଉଁ 68 କୋଟି ଇମେଲ୍ ପାସୱାର୍ଡ ଲିକ୍ ହୋଇଛି ବୋଲି କୁହାଯାଉଛି, ସେଗୁଡ଼ିକ ମଧ୍ୟରୁ ଅଧିକାଂଶ ଇମେଲ୍ ମଧ୍ୟପ୍ରଦେଶର ବୋଲି ଜଣାପଡ଼ିଛି । ସାଇବର ସେଲର ପରାମର୍ଶଦାତା କହିଛନ୍ତି ଯେ, ଇମେଲ ଆକାଉଣ୍ଟ ହ୍ୟାକିଂ କରି ସାଇବର ଠକମାନେ ଇଣ୍ଟରନେଟ୍ ବ୍ୟାଙ୍କିଂ, ଡିଜିଟାଲ୍ ୱାଲେଟ୍ ଏବଂ ଅନ୍ୟାନ୍ୟ ଆପ୍ ଭଳି ଅନ୍ୟାନ୍ୟ ସୋସିଆଲ ମିଡିଆ ଆକାଉଣ୍ଟଗୁଡ଼ିକୁ ମଧ୍ୟ ଆକ୍ସେସ୍ କରିପାରିବେ। ଏହାକୁ ଏଡାଇବା ପାଇଁ, ତୁରନ୍ତ ଆପଣଙ୍କର ପାସୱାର୍ଡ ପୁଣି ଥରେ ସେଟ୍ କରନ୍ତୁ। ସମୟ ଅନୁଯାୟୀ ପାସୱାର୍ଡ ପରିବର୍ତ୍ତନ , ଟୁ-ଷ୍ଟେପ ଅଥେଣ୍ଟିକେସନ ଏବଂ ବିଭିନ୍ନ ସେବା ପାଇଁ ଭିନ୍ନ ଭିନ୍ନ ପାସୱାର୍ଡ ରଖିବା ଗୁରୁତ୍ବପୂର୍ଣ୍ଣ ।
ପ୍ରତ୍ୟେକ ୱେବସାଇଟ୍ କିମ୍ବା ଆପ୍ ପାଇଁ ଭିନ୍ନ ଭିନ୍ନ ପାସୱାର୍ଡ ରଖିବାକୁ ପରାମର୍ଶ ଦିଆଯାଇଛି । ସାଇବର ସେଲର ନିର୍ଦ୍ଦେଶାବଳୀରେ କୁହାଯାଇଛି, ସନ୍ଦେହଜନକ ଇମେଲ୍, SMS, ଲିଙ୍କ୍ ଉପରେ କ୍ଲିକ୍ କରନ୍ତୁ ନାହିଁ। ଅଜଣା ଆପ୍ କିମ୍ବା ୱେବସାଇଟ୍ରେ ଲଗ୍ ଇନ୍ କରନ୍ତୁ ନାହିଁ। ଏକାଧିକ ଆକାଉଣ୍ଟ ପାଇଁ ସମାନ ପାସୱାର୍ଡ ରଖନ୍ତୁ ନାହିଁ। ସନ୍ଦେହଜନକ ଇମେଲ୍, ଲିଙ୍କ୍ ଉପରେ କ୍ଲିକ୍ କରନ୍ତୁନି । ସାଇବର ଠକେଇ କ୍ଷେତ୍ରରେ, ସାଇବର ହେଲ୍ପଲାଇନ୍ ସହିତ ଯୋଗାଯୋଗ କରନ୍ତୁ।
ସାଇବର ଠକମାନେ ନୂଆ ନୂଆ କୌଶଳ କରି ଠକୁଛନ୍ତି। ଡିଜିଟାଲ ଆରେଷ୍ଟ, ଲୋନ୍ ଆପ୍ ଠକେଇ ଘଟଣା ବୃଦ୍ଧି ପାଉଛି। ବୟସ୍କ ବ୍ୟକ୍ତିମାନେ ସାଇବର ଅପରାଧୀଙ୍କ ସବୁଠାରୁ ବଡ଼ ଟାର୍ଗେଟ। ଡକ୍ୟୁମେଣ୍ଟ, ଉପହାର, ଲିଙ୍କ୍ ଅପଡେଟ୍ କରି ଠକମାନେ ତଥ୍ୟ ଚୋରି କରି ଆକାଉଣ୍ଟ ଖାଲି କରୁଛନ୍ତି। ଏହା ବ୍ୟତୀତ ସେୟାର ବଜାର, ଅନଲାଇନ୍ ବାଣିଜ୍ୟ, ଓ୍ବାର୍କ ଫ୍ରମ ହୋମ୍, ଅନଲାଇନ୍ ପାର୍ସଲ ବାହାନାରେ ଠକେଇ ମଧ୍ୟ ହେଉଛି। ଏପରି ଅନେକ ମାମଲା ମଧ୍ୟ ସାମ୍ନାକୁ ଆସିଛି, ଯେଉଁଥିରେ OTP ନ ମାଗି ଆକାଉଣ୍ଟରୁ ଟଙ୍କା ଉଠାଯାଇଛି ।
ସୌଜନ୍ୟ ସମ୍ବାଦ
