ଦେହ ପାଇଁ ଭଲ ଖଜୁରୀ ଗୁଡ଼

ଗୁଡ଼ ତ’ ଶରୀର ପାଇଁ ହିତକ‌ାରୀ। କିନ୍ତୁ ଖଜୁରୀ ଗୁଡ଼ ଶରୀର ପାଇଁ ଅମୃତ ସମାନ। ଏହାର ସ୍ବାଦ ବି ଅତୁଳନୀୟ। ଖାଦ୍ୟ ଖାଇସାରିବା ପରେ ଖଜୁରୀ ଗୁଡ଼ ଖାଇବା ଦ୍ବାରା ଏହା ପାଚନ କ୍ରିୟାରେ ସାହାଯ୍ୟ କରିଥାଏ। ମହାରାଷ୍ଟ୍ର ଓ ରାଜସ୍ଥାନରେ ଆଗରୁ ଖରା ଦିନେ ଅତିଥି ଅଭ୍ୟର୍ଥନା ପାଇଁ ଖଜୁରୀ ଗୁଡ଼ ସର୍ବତ ପରଷା ଯାଉଥିଲା। ଖଜୁରୀ ଗୁଡ଼ ଖଣିଜ ଉପାଦାନ ଓ ଭିଟାମିନ୍‌ରେ ଭରପୂର। ଏହା ପାଚନ କ୍ରିୟାରେ ସାହାଯ୍ୟ କରିବ‌ା ସହ ଶରୀରର ତାପମାତ୍ରାକୁ ବି ନିୟନ୍ତ୍ରଣ କରିଥାଏ। ଗର୍ଭାବସ୍ଥାରେ ଖଜୁରୀ ଗୁଡ଼ ବେଶ୍‌ ଉପକାରୀ ବୋଲି କୁହାଯାଏ।

ଏବେ ଚିନି ପ୍ରସ୍ତୁତ ମିଠା ସ୍ବାସ୍ଥ୍ୟ ପ୍ରତି ହାନିକାରକ ହୋଇଥିବା ବେଳେ ଖଜୁରୀ ଗୁଡ଼ରୁ ପ୍ରସ୍ତୁତ ମିଠାର ଉପକାରିତା ଯୋଗୁଁ ଏହା ଏବେ ବି ଚାହିଦାରେ ରହିଛି। ଶୀତ ଦିନେ ବିଶେଷ କରି ଏହି ଗୁଡ଼ ମିଳୁଥିବା ବେଳେ ଏଥିରେ ପ୍ରଚୁର ପରିମାଣରେ ଲୌହସାର, ମ୍ୟାଗ୍‌ନେସିୟମ୍‌, ମାଙ୍ଗାନିଜ୍‌, କ୍ୟାଲ୍‌ସିୟମ୍‌, ଜିଙ୍କ୍ ଓ ପୋଟାସିୟମ୍‌ ରହିଥାଏ। ଲୌହସାରରେ ପରିପୂର୍ଣ୍ଣ ଏହି ଗୁଡ଼ ରକ୍ତରେ ହିମୋଗ୍ଲୋବିନ୍‌ ସ୍ତରକୁ ପରିଚାଳନା କରିବାରେ ସାହାଯ୍ୟ କରିଥାଏ। ଥଣ୍ଡା, କାଶ ଓ ତଣ୍ଟି ଦରଜ ପାଇଁ ଏହା ଉପକାରୀ। ମହିଳାଙ୍କ ଋତୁସ୍ରାବ ସମୟରେ ହେଉଥିବା ପେଟ ଯନ୍ତ୍ରଣାରୁ ବି ଏହା ମୁକ୍ତି ଦେଇଥ‌ାଏ। ମାଇଗ୍ରେନ୍ ସମସ୍ୟା ଦୂର କରିବାରେ ସାହାଯ୍ୟ କରିବା ସହ ଶରୀରକୁ ଶକ୍ତି ଯୋଗାଏ। ବଙ୍ଗୀୟମାନେ ଏଥିରୁ ଖଜୁରୀ ଗୁଡ଼ ସନ୍ଦେସ, ପାଏସ୍‌, ରସଗୋଲା ଓ ମୁଆ ଭଳି ଅନେକ ସ୍ବାଦିଷ୍ଟ ମିଠା ପ୍ରସ୍ତୁତ କରିଥା’ନ୍ତି।

ସୌଜନ୍ୟ-ସମ୍ୱାଦ