ଧଉଳିରେ ବଢ଼ିଲେଣି ପର୍ଯ୍ୟଟକ ଜମିଲାଣି ବଣଭୋଜିର ଆସର

ଧଉଳି: ଆରମ୍ଭ ହୋଇଯାଇଛି ପର୍ଯ୍ୟଟନ ଋତୁ। ସେନେଇ ଧଉଳିରେ ପର୍ଯ୍ୟଟକମାନଙ୍କ ବେଶ୍ ଗହଳି ଚହଳି ଆରମ୍ଭ ହୋଇଗଲାଣି। ବିଶେଷ କରି ପଶ୍ଚିମବଙ୍ଗ ତଥା ରାଜ୍ୟ ବାହାରର ବହୁ ସଂଖ୍ୟାରେ ପର୍ଯ୍ୟଟକ ଭିଡ଼ ଜମାଇଲେଣି। ସେହିପରି ଧଉଳିରେ ଭୋଜି କରିବା ପାଇଁ ମଧ୍ୟ ବହୁ ସଂଖ୍ୟାରେ ପିକ୍‌ନିକ୍‌ ପାର୍ଟିଙ୍କ ଭିଡ଼ ଲାଗୁଥିବା ଦେଖିବାକୁ ମିଳିଛି। ଧଉଳି ଗ୍ରାମ ପଞ୍ଚାୟତ ପରିସର, ଶାନ୍ତି ପାର୍କ ଏବଂ ଧଉଳି ବସଷ୍ଟାଣ୍ଡ୍‌ ଅଞ୍ଚଳରେ ଥିବା ସବୁ ଭୋଜିପିଣ୍ଡିରେ ଭୋଜିଭାତ ଚାଲୁଛି। ବହୁ ଯୁବବର୍ଗଙ୍କ ଠାରୁ ସରକାରୀ ଏବଂ ବେସରକାରୀ ଅନୁଷ୍ଠାନ ଏବଂ ବ୍ୟକ୍ତିବିଶେଷ ପରିବାର ଓ ସଂପର୍କୀୟଙ୍କ ସହିତ ଆସି ଭୋଜିଭାତରେ ମସଗୁଲ ହେଉଛନ୍ତି। ବ୍ୟାନର୍‌ ଟାଣି ମ୍ୟୁଜିକ୍‌ ବଜାଇ ନାଚ ଗୀତରେ ଖୁସି ମନାଉଛନ୍ତି।

ଧଉଳି ରାଜଧାନୀ ଭୁବନେଶ୍ବର ନିକଟବର୍ତ୍ତୀ ହୋଇଥିବା ବେଳେ ଏବଂ ଏଠାରେ ଭୋଜି ନେଇ ସବୁ ପ୍ରକାର ସୁବିଧା ସୁଯୋଗ ରହିଛି। ବଣ ପାହାଡ଼ ଘେରା ବିସ୍ତୀର୍ଣ୍ଣ ପ୍ରାକୃତିକ ପରିବେଶ ସାଙ୍ଗକୁ ଧଉଳି ଶାନ୍ତିସ୍ତୂପର କମନୀୟ ଐତିହ୍ୟ, କିର୍ତ୍ତୀରାଜି ଏବଂ ସଂଧ୍ୟାରେ ଲାଇଟ୍‌ ଆଣ୍ଡ୍‌ ସାଉଣ୍ଡ୍‌ ସୋ’ ଦର୍ଶକମାନଙ୍କୁ ବିମୋହିତ କରିଥାଏ। ଧଉଳି ପଞ୍ଚାୟତ ନିକଟରେ ଛୋଟବଡ଼ କରି ୧୫ଟି ପିଣ୍ଡି ଏବଂ ପାଦଦେଶରେ ବସଷ୍ଟାଣ୍ଡ୍‌ ନିକଟରେ ଆଉ ୧୦ଟି ବଡ଼ ପିଣ୍ଡି ରହିଛି। ଛୋଟ ଖୋଲାପିଣ୍ଡି ପିଛା ୫୦୦, ବଡ଼ ଓ ଅତିବଡ଼ ଟିଣ ଚାଦର ପିଣ୍ଡି ୬୦୦ରୁ ଆରମ୍ଭ କରି ୭୦୦ ଏବଂ ୧୦୦୦ ଟଙ୍କା ଫି’ ରହିଥିବା ଜଣାପଡ଼ିଛି। ଏହାଛଡ଼ା ଧଉଳି ପାଦଦେଶରେ ଧଉଳି ଗାର୍ଡେନ ଭଳି ଆହୁରି ଅନେକ ଘରୋଇ ସଂରକ୍ଷିତ ସ୍ଥାନ ଭୋଜି ପାଇଁ ଭଡ଼ାରେ ମିଳୁଛି। ଆଖପାଖରେ ତେଜରାତି ସାମଗ୍ରୀ ଦୋକାନ ସହ ରୋଷେଇ ସରଞ୍ଜାମ, ରନ୍ଧନ ଗ୍ୟାସ ଟାଙ୍କି ଭଡ଼ାରେ ମିଳୁଛି। ପ୍ରତି ପିଣ୍ଡି ନିକଟରେ ପାଣି ଟ୍ୟାପ୍‌ ସୁବିଧା ରହିଛି। ସେହିପରି ପଞ୍ଚାୟତ କାର୍ଯ୍ୟାଳୟ ନିକଟରେ ପାନ୍ଥିକା ପାର୍ଶ୍ୱରେ ସୁଲଭ ଶୌଚାଳୟ ମଧ୍ୟ ରହିଛି। ପାଦଦେଶ ବସଷ୍ଟାଣ୍ଡ୍‌ ନିକଟରେ ଟଏଲେଟ କମ୍ପ୍ଲେକ୍ସ ମଧ୍ୟ ରହିଛି।

ସୌଜନ୍ୟ-ସମ୍ୱାଦ