ନବୀନ ନିବାସରେ ଅସନ୍ତୋଷ ଉଗାରିଲେ: ସସ୍ମିତଙ୍କୁ ରାଜ୍ୟସଭା ନେତା ପଦରୁ ହଟାଇବାକୁ କହିଲେ

ଭୁବନେଶ୍ବର: ରାଜ୍ୟସଭାରେ ବିଜେଡିର ଆଭିମୁଖ୍ୟକୁ ନେଇ ସାରା ଦେଶରେ ଚର୍ଚ୍ଚା। ଦଳର ଏପରି ନିଷ୍ପତ୍ତି ସମସ୍ତଙ୍କୁ ଚକିତ କରିଛି। ଆରମ୍ଭରୁ ୱକଫ୍‌ ବିଲ୍‌ ବିରୋଧରେ କଠୋର ଆଭିମୁଖ୍ୟ ନେଇଥିବା ଦଳର ସଭାପତି ନବୀନ ପଟ୍ଟନାୟକ କେଉଁ ପରିସ୍ଥିତିରେ ଶେଷ ମୁହୂର୍ତ୍ତରେ ୟୁ-ଟର୍ଣ୍ଣ ନେଲେ, ତାହା ଦଳୀୟ ନେତାମାନେ ବୁଝିପାରୁ ନାହାନ୍ତି। ଏହି ନିଷ୍ପତ୍ତିକୁ ନେଇ ଦଳର ଆଭ୍ୟନ୍ତରୀଣ ରାଜନୀତି ସରଗରମ ହୋଇଛି। ଆଜି ବରିଷ୍ଠ ନେତାମାନେ ଦୁଇଟି ପର୍ଯ୍ୟାୟରେ ଯାଇ ନବୀନଙ୍କୁ ଭେଟି ସେମାନଙ୍କ ଅସନ୍ତୋଷ ଜଣାଇଛନ୍ତି। ନବୀନ ସବୁ ଶୁଣିଥିଲେ ବି କିଛି ଠୋସ୍ ପ୍ରତିକ୍ରିୟା ଦେଇ ନାହାନ୍ତି।

ଆଜି ମଧ୍ୟାହ୍ନରେ ପ୍ରତାପ ଦେବ, ଅରୁଣ ସାହୁ, ପ୍ରତାପ ଜେନା, ଦେବୀପ୍ରସାଦ ମିଶ୍ର ଓ ସଞ୍ଜୟ ଦାସବର୍ମା ନବୀନ ନିବାସ ଯାଇ ନବୀନଙ୍କୁ ସାକ୍ଷାତ କରିଥିଲେ। ରାଜ୍ୟସଭାରେ ବିଜେଡିର ଆଭିମୁଖ୍ୟକୁ ନେଇ ଦଳ ଓ ସଭାପତିଙ୍କ ଭାବମୂର୍ତ୍ତି କ୍ଷୁଣ୍ଣ ହେଉଛି ବୋଲି ସେମାନେ ଜଣାଇଥିଲେ। ରାଜନୈତିକ ସ୍ଥିତି ଜାହିର କରିବାକୁ ଆମକୁ କିଛି ଠୋସ୍‌ ନିଷ୍ପତ୍ତି ନେବାକୁ ପଡ଼ିବ ବୋଲି ସେମାନେ କହିଥିଲେ। ନବୀନ ସେମାନଙ୍କ କଥା ଶୁଣିଥିଲେ ମଧ୍ୟ କିଛି ଉତ୍ତର ଦେଇ ନଥିଲେ। ଏ ସମ୍ପର୍କରେ ଅନୁଧ୍ୟାନ କରିବେ ବୋଲି ସଂକ୍ଷିପ୍ତ ପ୍ରତିକ୍ରିୟା ରଖିଥିଲେ। ବିଜେଡିର ପରାମର୍ଶଦାତା କମିଟିର ଏକ ବୈଠକ ଆଜି ଶଙ୍ଖଭବନରେ ହୋଇଥିଲା। ଏଥିରେ ମଧ୍ୟ ନେତାମାନେ ବିଜେଡିର ୟୁ-ଟର୍ଣ୍ଣକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ। ପୂର୍ବରୁ ଦଳର ସଭାପତି ନିଜର ସ୍ପଷ୍ଟ ଆଭିମୁଖ୍ୟ ରଖିଥିଲା ବେଳେ ‌ଶେଷ ମୁହୂର୍ତ୍ତରେ ତାଙ୍କୁ କିଏ ପ୍ରଭାବିତ କରି ନିଷ୍ପତ୍ତି ବଦଳାଇଲା ବୋଲି ନେତାମାନେ ଆଲୋଚନା କରିଥିଲେ। ସନ୍ଧ୍ୟାରେ ସେମାନେ ମିଳିତ ଭାବେ ନବୀନ ନିବାସ ଯାଇ ସଭାପତିଙ୍କୁ ସାକ୍ଷାତ କରିଥିଲେ। ପ୍ରସନ୍ନ ଆଚାର୍ଯ୍ୟ, ପ୍ରଫୁଲ୍ଲ ସାମଲ, ବଦ୍ରିନାରାୟଣ ପାତ୍ର, ଅଶୋକଚନ୍ଦ୍ର ପଣ୍ଡା, ଦେବୀ ପ୍ରସାଦ ମିଶ୍ର, ପଦ୍ମନାଭ ବେହେରା, ପ୍ରଫୁଲ୍ଲ ମଲ୍ଲିକ, ଶଶୀଭୂଷଣ ବେ‌ହେରା, ନୃସିଂହ ସାହୁ, ଚନ୍ଦ୍ରଶେଖର ସାହୁ ପ୍ରମୁଖ ବରିଷ୍ଠ ନେତା ଏଥିରେ ସାମିଲ ହୋଇଥିଲେ। ବିଜେଡି କିପରି ସାଧାରଣରେ ନିନ୍ଦିତ ହେଉଛି, ତାହାକୁ ଏହି ନେତାମାନେ ବୁଝାଇଥିଲେ। ସସ୍ମିତ ପାତ୍ରଙ୍କ ଭୂମିକାକୁ ନେଇ ଏହି ନେତାମାନେ ସନ୍ଦେହ ପ୍ରକାଶ କରିବା ସହ କାହା ନିର୍ଦ୍ଦେଶରେ ସେ ସାମାଜିକ ଗଣମାଧ୍ୟମରେ ଦଳର ଆଭିମୁଖ୍ୟ ରଖିଲେ ବୋଲି ସେମାନେ ପ୍ରଶ୍ନ କରିଥିଲେ। ଦଳ ଓ ସଭାପତିଙ୍କ ଭାବମୂର୍ତ୍ତି ସୁଧାରିବା ଉପରେ ସେମାନେ ଗୁରୁତ୍ବ ଦେଇଥିଲେ। ସସ୍ମିତଙ୍କୁ ତୁରନ୍ତ ରାଜ୍ୟସଭା ନେତା ପଦବିରୁ ବିଦା କରିବାକୁ ଦାବି ମଧ୍ୟ କରିଥିଲେ। ଏ ସମ୍ପର୍କରେ ଅନୁଧ୍ୟାନ କରିବେ ବୋଲି ନବୀନ ପୁଣି ଧାଡ଼ିକିଆ ଉତ୍ତର ଦେଇଥିଲେ।

ସସ୍ମିତଙ୍କୁ ରାଜ୍ୟସଭା ନେତା ପଦରୁ ହଟାଇବାକୁ କହିଲେ
ଭାବମୂର୍ତ୍ତି ସୁଧାରିବା ଉପରେ ଗୁରୁତ୍ବ ଦେଲେ ବରିଷ୍ଠ

ତେବେ ରାଜ୍ୟସଭାରେ ବିଜେଡି ନିଷ୍ପତ୍ତି ବଦଳିବା ପଛରେ କିଛି ଖେଳ ହୋଇଯାଇଥିବା ସନ୍ଦେହ କରିଛନ୍ତି ବଦ୍ରିନାରାୟଣ ପାତ୍ର। ଅନ୍ୟ ବରିଷ୍ଠ ନେତାମାନେ ମଧ୍ୟ ଏ ନେଇ ଚିନ୍ତାପ୍ରକଟ କରିଛନ୍ତି। ‌ତେବେ ନବୀନଙ୍କ ସହ ୱକଫ୍‌ ବିଲ୍‌ ପ୍ରସଙ୍ଗରେ କ’ଣ ଆଲୋଚନା ହେଲା, ସେ ସମ୍ପର୍କରେ ବରି‌ଷ୍ଠ ନେତାମାନେ ଗଣମାଧ୍ୟମକୁ ସିଧାସଳଖ କିଛି କହିନାହାନ୍ତି। ବିଜେଡିରେ କିଏ ଏପରି ଅନ୍ତର୍ଘାତୀ କାର୍ଯ୍ୟ କରି ନବୀନଙ୍କୁ ପ୍ରଭାବିତ କଲା, ତାହାକୁ ନେଇ ଦଳୀୟ ମହଲରେ ଚର୍ଚ୍ଚା। ଦଳର ସବୁ ସ୍ତରରେ ଅସନ୍ତୋଷ ତୀବ୍ର ହେବାରେ ଲାଗିଛି। ସାମାଜିକ ଗଣମାଧ୍ୟମରେ ନେତାମାନେ ଖୋଲାଖୋଲି ନିଜର ଅସନ୍ତୋଷ ଜାହିର କରୁଛନ୍ତି। ଦୁଇ ଦିନ ତଳେ ବିଧାନସଭାରେ ରାତିତମାମ ବିଜେପି ସରକାର ବିରୋଧରେ ଗର୍ଜନ ତର୍ଜନ କରୁଥିଲେ ବିଜେଡି ବିଧାୟକ। ବିଧାନସଭାରେ ବିଜେଡିର ଏହି ପ୍ରଦର୍ଶନକୁ ନେଇ ଦଳ ପ୍ରଶଂସା ସାଉଁଟୁଥିଲା ବେଳେ ତାହାର ୪୮ ଘଣ୍ଟା ନଯାଉଣୁ ରାଜ୍ୟସଭାରେ ଦଳର ଆଭିମୁଖ୍ୟ ସବୁ ଓଲଟପାଲଟ କରିଦେଲା। ଆଗାମୀ ଦିନରେ ନେତାମାନେ କାହା ଭରସାରେ ବିଜେପି ବିରୋଧରେ ଆଗକୁ ଯିବେ, ତାହାର କୁଳକିନାରା ପାଉ ନାହାନ୍ତି।

ଅପରପକ୍ଷରେ ଭିକେ ପାଣ୍ଡିଆନଙ୍କୁ ବିଜେଡିକୁ ଫେରାଇ ଆଣିବା ପାଇଁ ଚାଲିଥିବା ଭିତିରିଆ ଯୋଜନା କାର୍ଯ୍ୟକାରୀ କରିବାକୁ ଗୋଟିଏ ଗୋଷ୍ଠୀ ଅଣ୍ଟା ଭିଡ଼ିଛନ୍ତି। ଆଜିଠାରୁ ନବୀନ ନିବାସରୁ ବିଭିନ୍ନ ଆଡ଼ୁ ଲୋକ ଆସି ନବୀନଙ୍କୁ ଭେଟି ପାଣ୍ଡିଆନଙ୍କୁ ଫେରାଇ ଆଣିବା ପାଇଁ ଅନୁରୋଧ କରିବାର କାର୍ଯ୍ୟକ୍ରମ ସ୍ଥିର ହୋଇଥିଲା। କିନ୍ତୁ ୱକଫ୍‌ ବିଲକୁ ନେଇ ଅସନ୍ତୋଷ ହଠାତ ବଢ଼ିଯାଇଥିବାରୁ ଏହି ଯୋଜନା କାର୍ଯ୍ୟକାରୀ ହୋଇପାରିନି। ଆଜି କେବଳ ଆସିକାର ଲୋକସଭା ପ୍ରାର୍ଥୀ ରଞ୍ଜିତା ସାହୁଙ୍କ ନେତୃତ୍ବରେ କିଛି ଯୁବକ ନବୀନ ନିବାସ ଆସିଥିଲେ। ସେମାନେ ପାଣ୍ଡିଆନଙ୍କ ସପକ୍ଷରେ ଓକିଲାତି କରିବାକୁ ଆସିଥିବା ନେଇ ଚର୍ଚ୍ଚା ଚାଲିଥିଲା। କିନ୍ତୁ ଗଣମାଧ୍ୟମକୁ ରଞ୍ଜିତା ଏ ସମ୍ପର୍କରେ କିଛି କହି ନଥିଲେ। କବିସୂର୍ଯ୍ୟନଗରର ଯୁବକ ସଂଘ ସଭାପତିଙ୍କୁ ସାକ୍ଷାତ କରିବାକୁ ଆସିଥିବା ସେ କହିଥିଲେ। ପାଣ୍ଡିଆନଙ୍କ ସମ୍ପର୍କ‌ରେ କୌଣସି ମନ୍ତବ୍ୟ ଦେଇ ନଥିଲେ।

ସୌଜନ୍ୟ-ସମ୍ୱାଦ