ନିସାନ-ହୋଣ୍ଡା ମିଶ୍ରଣ ହୋଇପାରେ କଥାବାର୍ତ୍ତା ଚାଲିଛି

ନୂଆଦିଲ୍ଲୀ: ବିଶ୍ବର ଦୁଇ ପ୍ରମୁଖ କାର୍‌ ନିର୍ମାତା ହୋଣ୍ଡା ମୋଟର କମ୍ପାନି ଓ ନିସାନ ମୋଟର କମ୍ପାନି ମଧ୍ୟରେ ମିଶ୍ରଣ ହେବାର ସମ୍ଭାବନା ରହିଛି। ଜାପାନର ପ୍ରମୁଖ କାର୍ ନିର୍ମାତା ଟୟୋଟା ସହ ପ୍ରତିଦ୍ବନ୍ଦ୍ବିତା କରିବା ଲାଗି ଏହି ଦୁଇ କମ୍ପାନି ପରଷ୍ପର ସହ ମିଶିଯିବା ନେଇ କଥାବାର୍ତ୍ତା କରୁଛନ୍ତି। ମିଳିତ ଭାବେ ସେମାନେ ଟୟୋଟାର ଉଚିତ ମୁକାବିଲା କରିପାରିବେ ବୋଲି ଭାବୁଛନ୍ତି। ହୋଣ୍ଡାର ଜଣେ ଅଧିକାରୀଙ୍କ ବୟାନରୁ ଏହି ମିଶ୍ରଣ କଥା ସାମ୍ନାକୁ ଆସିଛି। ତେବେ କେବଳ ମିଶ୍ରଣ ନୁହେଁ, ଉଭୟ ସଂସ୍ଥା ପୁଞ୍ଜି ସହଯୋଗିତା କିମ୍ବା ଏକ ହୋଲ୍‌ଡିଂ କମ୍ପାନି ଗଠନ କରିବା ବିକଳ୍ପ ଉପରେ ମଧ୍ୟ ଆଲୋଚନା କରୁଛନ୍ତି। ଚଳିତ ମାସରେ ଏନେଇ କିଛି ନିର୍ଦ୍ଦିଷ୍ଟ ଆଲୋଚନା ହେବାର ସମ୍ଭାବନା ରହିଛି। ଏହି ସମ୍ଭାବ୍ୟ ମିଶ୍ରଣ ସମ୍ପର୍କରେ ଜାଣିଥିବା ଜଣେ ବ୍ୟକ୍ତି ସୂଚନା ଦେଇଛନ୍ତି ଯେ ଏକ ବଡ଼ ଯୋଜନା ନେଇ କଥାବାର୍ତ୍ତା ଚାଲିଛି। ତାହା ହେଉଛି ଏକ ହୋଲ୍ଡିଂ କମ୍ପାନି ଗଠନ କରାଯିବ, ଯାହା ଅଧୀନରେ ଉଭୟ ସଂସ୍ଥା ପରିଚାଳିତ ହେବେ।

ସୌଜନ୍ୟ-ସମ୍ୱାଦ