ନୂଆ ଅଧିନାୟକ ଖୋଜ: ରୋହିତ

ମୁମ୍ବାଇ: ଅଷ୍ଟ୍ରେଲିଆରେ ଭାରତୀୟ ଦଳର ଦୁର୍ବଳ ପ୍ରଦର୍ଶନର ସମୀକ୍ଷା ବିସିସିଆ‌ଇ ପକ୍ଷରୁ ଶନିବାର କରାଯାଇଛି। ଏହି ଅତି ଗୁରୁତ୍ବପୂର୍ଣ୍ଣ ବୈଠକରେ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ସହ ବିସିସିଆଇର ବହୁ ବରିଷ୍ଠ କର୍ମକର୍ତ୍ତା ଉପସ୍ଥିତ ଥିଲେ। ଏହି ଅବସରରେ ଭାରତୀୟ ଅଧିନାୟକ ରୋହିତ ଶର୍ମା ମଧ୍ୟ ଦଳର ଦୋଷ, ଦୁର୍ବଳତା ଓ ଆବଶ୍ୟକତା ସହ ବ୍ୟକ୍ତିଗତ ଲକ୍ଷ୍ୟ ନେଇ ବିସ୍ତୃତ ଓ ଖୋଲାଖୋଲି ଆଲୋଚନା କରିଥିଲେ। ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ଉପସ୍ଥିତିରେ ଆୟୋଜିତ ବୈଠକରେ ଆଉ କିଛି ମାସ ଦଳର ଅଧିନାୟକ ରହିବାକୁ ରୋହିତ ଇଚ୍ଛା ପ୍ରକାଶ କରିଥିବା ଜଣାପଡ଼ିଛି। ତେବେ ଏବେଠାରୁ ନୂଆ ଅଧିନାୟକ ଖୋଜା ଆରମ୍ଭ କରିଦେବାକୁ ରୋହିତ ବୋର୍ଡ ଅଧିକାରୀଙ୍କୁ ସଙ୍କେତ ଦେଇଛନ୍ତି। ଦ୍ରୁତ ବୋଲର୍ ଯଶପ୍ରୀତ୍ ବୁମ୍‌ରାଙ୍କୁ ରୋହିତଙ୍କ ଉତ୍ତରାଧିକାରୀ ଭାବେ ବାଛିବାକୁ କିଛି ଅଧିକାରୀ କହିଥିଲେ ମଧ୍ୟ ଅନ୍ୟ ଅଧିକାରୀମାନେ ଏଥିରେ ରାଜି ହୋଇ ନଥିଲେ। ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ଯଦିଓ ରୋହିତ ଟେଷ୍ଟ୍ ଦଳର ଅଧିନାୟକ ପଦ ଛାଡ଼ିବାକୁ ଏକପ୍ରକାର ନୀତିଗତ ନିଷ୍ପତ୍ତି ନେଇ ସାରିଛନ୍ତି। ହେଲେ ଦିନିକିଆ ଅଧିନାୟକ ପଦରେ ରହିବାକୁ ଚାହୁଛନ୍ତି। ସୂଚନାଯୋଗ୍ୟ ଯେ ଭାରତ ଚଳିତମାସ ୨୨ ତାରିଖରୁ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟ୍ବେଣ୍ଟି-୨୦ ଶୃଙ୍ଖଳା ଖେଳିବା ପରେ ତିନି ଟିକିଆ ଦିନିକିଆ ଶୃଙ୍ଖଳା ଖେଳିବ। ଏହା ପରେ ଦିନିକିଆ ଫର୍ମାଟ୍‌ରେ ଖେଳାଯିବାକୁ ଥିବା ଚାମ୍ପିଅନ୍ସ ଟ୍ରଫି ଖେଳିବାକୁ ଦୁବାଇ ଯିବ।

ରୋହିତଙ୍କ ୟୁ-ଟର୍ଣ୍ଣ ପରେ ଗମ୍ଭୀର ଖପ୍ପା
ସିଡ୍‌ନି ଟେଷ୍ଟ୍‌ରୁ ଓହରିବା ପୂର୍ବରୁ ଅଧିନାୟକ ରୋହିତ ଶର୍ମା ଏବଂ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ମଧ୍ୟରେ ତାଙ୍କ ଅବସର ନେଇ ଚର୍ଚ୍ଚା ହୋଇଥିଲା। ଏହି ଟେଷ୍ଟ୍ ତାଙ୍କର ଶେଷ ଟେଷ୍ଟ୍ ହେବ ବୋଲି ମଧ୍ୟ ରୋହିତ ଡ୍ରେସିଂ ରୁମ୍‌ରେ ଏକପ୍ରକାର ସ୍ପଷ୍ଟ କରି ଦେଇଥିଲେ। ହେଲେ ପରବର୍ତ୍ତୀ ସାକ୍ଷାତକାରରେ ନିଜ ସ୍ବର ବଦଳାଇ ଦେଇଥିଲେ। ଦଳର ଆବଶ୍ୟକତା ଦୃଷ୍ଟିରୁ କେବଳ ସିଡ୍‌ନି ଟେଷ୍ଟ୍‌ରୁ ଦୂରେଇଛି, ଅବସର ନେଇନି କିମ୍ବା କୁଆଡ଼େ ଯାଉନି ବୋଲି କହିଥିଲେ ସେ। ଯାହା ଗମ୍ଭୀରଙ୍କୁ ବିସ୍ମିତ କରିଥିଲା। ରୋହିତଙ୍କ ଏଭଳି ୟୁ-ଟର୍ଣ୍ଣ ତାଙ୍କୁ ବ୍ୟଥିତ କରିଥିଲା। ଏହି କଥା ଶନିବାରର ବିସିସିଆଇ ବୈଠକରେ ମଧ୍ୟ ଚର୍ଚ୍ଚା ହୋଇଥିବା ଜଣାପଡ଼ିଛି। ଶୁଭେଚ୍ଛୁଙ୍କ ପରାମର୍ଶ ପରେ ସେ ଅବସର ନିଷ୍ପତ୍ତି ବଦଳାଇଥିଲେ ବୋଲି ରୋହିତ ବିସିସିଆଇ ଅଧିକାରୀଙ୍କୁ ବୁଝାଇଥିବା କୁହାଯାଉଛି।

ସୌଜନ୍ୟ-ସମ୍ୱାଦ