ପିଲାଙ୍କ ଆଇକ୍ୟୁ ବଢ଼ାଏ ଭିଡିଓଗେମ୍‌!

ଆଜିର ପିଲାମାନେ ଭିଡିଓଗେମ୍‌ ଖେଳିବାରେ ନିମଗ୍ନ ରହିବାକୁ ଅଭିଭାବକମାନେ ଗ୍ରହଣ କରିପାରୁନାହାନ୍ତି। ସେମାନଙ୍କର ଆଶଙ୍କା ହେଉଛି, ପିଲାମାନେ ଭିଡିଓଗେମ୍‌ ଖେଳିବାରେ ସମୟ ଅପଚୟ କରି ନିଜ ଭବିଷ୍ୟତକୁ ନଷ୍ଟ କରିଦେଉଛନ୍ତି। ମାତ୍ର ବାସ୍ତବରେ ଭିଡିଓଗେମ୍‌ ଖେଳିବା ଦ୍ବାରା କିଛି ପିଲାଙ୍କର ବୁଦ୍ଧିମତ୍ତା ହାର ବା ଇଣ୍ଟେଲିଜେଣ୍ଟ୍‌ କୋସେଣ୍ଟ୍‌ (ଆଇକ୍ୟୁ) ବଢ଼ିଥାଏ ବୋଲି ଏକ ସଦ୍ୟ ଅନୁଧ୍ୟାନରୁ ଜଣାପଡ଼ିଛି।

ଗବେଷକମାନେ ଅନୁଧ୍ୟାନରେ ସାମିଲ ପିଲାଙ୍କର ସାମାଜିକ-ଅର୍ଥନୈତିକ ପୃଷ୍ଠଭୂମି ସମେତ ସେମାନଙ୍କର ବଂଶାନୁକ୍ରମିକ ତଥ୍ୟ ଆଦିକୁ ବିଶ୍ଳେଷଣ କରିଥିଲେ। ତା’ପରେ ପିଲାମାନେ କିପରି ଭିଡିଓଗେମ୍‌ ଖେଳୁଛନ୍ତି ଏବଂ ଟିଭି ଓ ସାମାଜିକ ଗଣମାଧ୍ୟମ ସହ କିପରି ଭାବ ବିନିମୟ କରିପାରୁଛନ୍ତି, ସେସବୁକୁ ତର୍ଜମା କରାଯାଇଥିଲା। ଟିଭି ଦେଖିବା ଓ ସାମାଜିକ ଗଣମାଧ୍ୟମ ବ୍ୟବହାର କରିବା ଦ୍ବାରା ପିଲାଙ୍କ ବୁଦ୍ଧିମତ୍ତା ଉପରେ ବିଶେଷ ପ୍ରଭାବ ପଡୁ ନଥିବା ବେଳେ ଭିଡିଓଗେମ୍‌ ଖେଳିବା ଦ୍ବାରା ବୁଦ୍ଧିମତ୍ତାରେ ଉଲ୍ଲେଖନୀୟ ଉନ୍ନତି ପରିଲକ୍ଷିତ ହୋଇଥିଲା। ଗବେଷକମାନେ ନିଶ୍ଚିତ ହୋଇଛନ୍ତି ଯେ ଭିଡିଓଗେମ୍‌ ପିଲାଙ୍କର ଜ୍ଞାନାତ୍ମକ ଦକ୍ଷତାରେ ନକାରାତ୍ମକ ପ୍ରଭାବ ପକାଏ ନାହିଁ। ଅପରପକ୍ଷେ, ସାମାଜିକ ଗଣମାଧ୍ୟମ ପିଲାଙ୍କ ଉପରେ କି ପ୍ରକାର ଜ୍ଞାନାତ୍ମକ ପ୍ରଭାବ ପକାଉଛି ତାହା ବୁଝିବା ଗୁରୁତ୍ବପୂର୍ଣ୍ଣ ଏବଂ ସେଥି ଲାଗି ଅଧିକ ଗବେଷଣା ଆବଶ୍ୟକ। ଏଣେ ଯୁବପିଢ଼ିଙ୍କର ଆଳସ୍ୟ ପାଇଁ ଅନେକ ଅଭିଭାବକ ଭିଡିଓଗେମ୍‌କୁ ଦାୟୀ କରୁଥିବା ବେଳେ ତାହା ଯେ ବାସ୍ତବରେ ଆଇକ୍ୟୁ ବଢ଼ାଏ; ଏହା ସେମାନଙ୍କୁ ବୁଝାଇବା କଷ୍ଟକର ବୋଲି ଗବେଷକମାନେ ଚିନ୍ତାପ୍ରକଟ କରିଛନ୍ତି।

ସୌଜନ୍ୟ-ସମ୍ୱାଦ