ପୁଣି ସୂର୍ଯ୍ୟବଂଶୀଙ୍କ ଚମକ: ରବିବାର ଫାଇନାଲ୍‌ରେ ଭାରତ-ବାଂଲାଦେଶ

ସାରଜା: ଚଳିତ ୧୯ ବର୍ଷରୁ କମ୍‌ (ଯୁବ) ଏସିଆ କପ୍‌ରେ ଆଇପିଏଲ୍ ନିଲାମରେ ୧କୋଟିରୁ ଅଧିକ ଟଙ୍କାରେ ବିକ୍ରି ହୋଇ ଚର୍ଚ୍ଚାରେ ଥିବା ବୈଭବ ସୂର୍ଯ୍ୟବଂଶୀଙ୍କ ଚମକ ଜାରି ରହିଛି। ପ୍ରଥମ ଦୁଇ ମ୍ୟାଚ୍‌ରେ ବିଫଳ ହୋଇଥିବା ୧୩ ବର୍ଷୀୟ ସୂର୍ଯ୍ୟବଂଶୀ ଶେଷ ଲିଗ୍‌ ଓ ସେମିଫାଇନାଲ୍‌ରେ ଚମତ୍କାର ପ୍ରଦର୍ଶନ କରି ସାମାଲୋଚକଙ୍କ ମୁହଁ ବନ୍ଦ କରି ଦେଇଛନ୍ତି। ଶୁକ୍ରବାର ଶ୍ରୀଲଙ୍କା ବିପକ୍ଷ ସେମିଫାଇନାଲ୍‌ରେ ତାଙ୍କର ବିସ୍ଫୋରକ ଅର୍ଦ୍ଧଶତକ ବଳରେ ଭାରତ ୧୭୦ ବଲ୍‌ ପୂର୍ବରୁ ୩ ୱିକେଟ୍‌ ହରାଇ ୧୭୪ ରନ୍‌ର ବିଜୟ ଲକ୍ଷ୍ୟକୁ ହାସଲ କରିନେଇଛି। ସୂର୍ଯ୍ୟବଂଶୀ ୩୬ ବଲ୍‌ରୁ ୬୭ ରନ୍‌ କରି ଆଉଟ୍‌ ହୋଇଥିଲେ। ଏଥିରେ ୬ ‌ଚୌକା ଓ ୫ ଛକା ସାମିଲ ଥିଲା। ପ୍ରଥମ ୱିକେଟ୍‌ରେ ସେ ଆୟୁଷ ମହାତ୍ରେ (୩୪, ୨୮ ବଲ୍‌, ୭ ଚୌକା)ଙ୍କ ସହ ୯୧ ରନ୍‌ ଯୋଡ଼ି ଦୃଢ଼ ମୂଳଦୁଆ ପକାଇଥିଲେ। ଦ୍ବିତୀୟ ଓଭରରେ ୩ ଛକା ସହ ୩୧ ରନ୍‌ ଯୋଡ଼ିଥିଲେ ଏହି ଯୋଡ଼ି।

ଏହି ଦୁଇ ଜଣଙ୍କ ପରେ ଆନ୍ଦ୍ରେ ସିଦ୍ଧାର୍ଥ ୨୨ ରନ୍‌ କରି ଆଉଟ୍‌ ହୋଇଥିଲା ବେଳେ ଅଧିନାୟକ ମହମ୍ମଦ ଅମାନ (୨୫*) ଓ କେପି କାର୍ତ୍ତିକେୟ (୧୧*) ବିଜୟ ମୁଣ୍ଡି ମାରିଥିଲେ। ପୂର୍ବରୁ ଟସ୍‌ ଜିତି ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ୪୬.୨ ଓଭରରେ ୧୭୩ ରନ୍‌ କରି ଅଲ୍‌ଆଉଟ୍‌ ହୋଇଥିଲା। ଲାକଭିନ ଆବେସିଂହେ (୬୯) ଅର୍ଦ୍ଧଶତକ ଅର୍ଜନ କରିଥିଲା ବେଳେ ଶାରୁଜନ ଶାନମୁଗନାଥନ ୪୨ ରନ୍‌ର ଉପଯୋଗୀ ପାଳି ଖେଳିଥିଲେ। ଭାରତ ପକ୍ଷରୁ ଚେତନ ଶର୍ମା ୩, କିରଣ ଚୋରମାଳେ ଓ ଆୟୁଷ ମହ‌ାତ୍ରେ ୨ ୱିକେଟ୍‌ ‌ଲେଖାଏଁ ନେଇଥିଲେ। ଭାରତକୁ ୭ ୱିକେଟ୍‌ରେ ବିଜୟ ଭେଟି ଦେଇଥିବା ସୂର୍ଯ୍ୟବଂଶୀ ମ୍ୟାଚ୍‌ର ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି। ଅନ୍ୟଏକ ସେମିଫାଇନାଲ୍‌ରେ ବାଂଲାଦେଶ ୭ ୱିକେଟ୍‌ରେ ପାକିସ୍ତାନକୁ ପରାସ୍ତ କରି ଫାଇନାଲ୍‌ରେ ପ୍ରବେଶ କରିଛି। ଭାରତ ରବିବାର ଫାଇନାଲ୍‌ରେ ବାଂଲାଦେଶକୁ ଭେଟିବ।

ସୌଜନ୍ୟ-ସମ୍ୱାଦ