ପୁରୁଣା ସରକାରର ୨୧ ଯୋଜନାର ନାଁ ବଦଳେଇଛି ମୋହନ ସରକାର । ବିଧାନସଭାରେ ପୂରା ତଥ୍ୟ ଦେଲେ ମୁଖ୍ୟମନ୍ତ୍ରୀ । ଦେଖନ୍ତୁ, ଏହି ଲିଷ୍ଟ….

କନକ ବ୍ୟୁରୋ: ରାଜ୍ୟରେ ପୁରୁଣା ସରକାର ଯିବା ପରେ ଏବଂ ନୂଆ ସରକାର ଆସିବା ପରେ ଏ ପର୍ୟ୍ୟନ୍ତ ପୁରୁଣା ନବୀନ ସରକାରର ମୋଟ ୨୧ଟି ଯୋଜନାର ନାମ ପରିବର୍ତ୍ତନ କରିଛି ନୂଆ ସରକାର । ଏ ସଂକ୍ରାନ୍ତରେ ଆଜି ବିଧାନସଭାରୁ ଆସିଛି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଲିଖିତ ଉତ୍ତର ।

ସୂଚନା ମୁତାବକ, ବିଜେଡି ବିଧାୟକ ତୁଷାରକାନ୍ତି ବେହେରା ଏନେଇ ଆଜି ବିଧାନସଭାରେ ପ୍ରଶ୍ନ କରିଥିଲେ । ସେ ପଚାରିଥିଲେ ଯେ, ୨୦୨୪ ମାର୍ଚ୍ଚ ୩୧ ସୁଦ୍ଧା ରାଜ୍ୟରେ ରାଜ୍ୟ ଯୋଜନା, କେନ୍ଦ୍ର ଯୋଜନା କେତେ ପ୍ରତିଶତ ଅନୁଦାନରେ କେତେ ଯୋଜନା କାର୍ୟ୍ୟକାରୀ ହେଉଥିଲା ? ଏଥିସହ କେଉଁ କେଉଁ ପୁରୁଣା ଯୋଜନା ନାମ ପରିବର୍ତ୍ତନ କରି ସରକାର ଏହାର ପୁନଃ ନାମକରଣ କରିଛନ୍ତି ସେ ସଂକ୍ରାନ୍ତରେ ପ୍ରଶ୍ନ କରିଥିଲେ ତୁଷାରକାନ୍ତି ବେହେରା । ଯାହାର ଲିଖିତ ଉତ୍ତର ରଖିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ ।

ଏହି ଉତ୍ତରରୁ ମିଳିଥିବା ତଥ୍ୟ ମୁତାବକ, ଏପର୍ୟ୍ୟନ୍ତ ମୋଟ ୨୧ଟି ଯୋଜନାର ନାମ ପରିବର୍ତ୍ତନ କରିଛି ମୋହନ ସରକାର । ତେବେ ପୂର୍ବ ସରକାର କାଳିଆ ଯୋଜନା ଏବେ ସିଏମ୍ କିଷାନରେ ପରିବର୍ତ୍ତିତ ହେଇଥିବାବେଳେ ଓଡ଼ିଶା ମିଲେଟ୍ ମିଶନ ଏବଂ ଶ୍ରୀ ଅନ୍ନ ଯୋଜନାରେ ନାମିତ ହେଇଛି ବୋଲି ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ତା ସହ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଗୋପବନ୍ଧୁ ଜନ ଆରୋଗ୍ୟ ଯୋଜନା, ବିଜୁ ପକ୍କା ଘର ବର୍ତ୍ତମାନ ଅନ୍ତଦୋୟ ଗୃହ ଯୋଜନାରେ ପରିବର୍ତ୍ତିତ ହେଇଛି ବୋଲି ମୋହନ ମାଝୀ ସୂଚନା ଦେଇଛନ୍ତି ।
ସୌଜନ୍ୟ-କନକ