ପୂର୍ବତନ କେନ୍ଦ୍ରମନ୍ତ୍ରୀ ଏସ୍‌ଏମ୍ କ୍ରିଷ୍ଣାଙ୍କ ପରଲୋକ

ବେଙ୍ଗାଲୁରୁ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ତଥା ପୂର୍ବତନ ବୈଦେଶିକ ମନ୍ତ୍ରୀ ଏସ୍‌ଏମ୍‌ କ୍ରିଷ୍ଣାଙ୍କର ମଙ୍ଗଳବାର ପରଲୋକ ହୋଇଯାଇଛି। ତାଙ୍କୁ ୯୨ ବର୍ଷ ହୋଇଥିଲା। ୨୦୦୯ରୁ ୨୦୧୨ ପର୍ଯ୍ୟନ୍ତ ଭାରତର ବୈଦେଶିକ ନୀତି ଗଠନରେ ପ୍ରମୁଖ ଭୂମିକା ଗ୍ରହଣ କରିଥିବା କ୍ରିଷ୍ଣାଙ୍କର ଦୀର୍ଘ ଦିନର ଅସୁସ୍ଥତା ପରେ ବେଙ୍ଗାଲୁରୁସ୍ଥିତ ବାସଭବନରେ ପରଲୋକ ଘଟିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏସ୍‌ଏମ୍‌ କ୍ରିଷ୍ଣାଙ୍କ ବିୟୋଗରେ ଦୁଃଖ ପ୍ରକାଶ କରିବା ସହ ତାଙ୍କୁ ଜଣେ ଉଚ୍ଚକୋଟୀର ନେତା ଭାବେ ବର୍ଣ୍ଣନା କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ଏସ୍‌ଏମ୍‌ କ୍ରିଷ୍ଣାଜୀ ଜଣେ ଦକ୍ଷ ନେତା ଥିଲେ, ଯାହାଙ୍କୁ ସବୁ ବର୍ଗର ଲୋକ ପ୍ରଶଂସା କରିଥିଲେ। ତାଙ୍କ ବିୟୋଗରେ ମୁଁ ଗଭୀର ଦୁଃଖିତ। ତାଙ୍କ ପରିବାର ଓ ପ୍ରଶଂସକଙ୍କ ପ୍ରତି ମୋର ସମବେଦନା।

କର୍ଣ୍ଣାଟକର ମୁଖ୍ୟମନ୍ତ୍ରୀ ସିଦ୍ଦରମୈୟା କ୍ରିଷ୍ଣାଙ୍କ ବିୟୋଗରେ ଶୋକ ପ୍ରକାଶ କରି କହିଛନ୍ତି, ଜଣେ କେନ୍ଦ୍ରମନ୍ତ୍ରୀ ଏବଂ ମୁଖ୍ୟମନ୍ତ୍ରୀ ଭାବେ କ୍ରିଷ୍ଣାଙ୍କ ସେବା ଅତୁଳନୀୟ। ବିଶେଷକରି ମୁଖ୍ୟମନ୍ତ୍ରୀ ଭାବେ ଆଇଟି-ବିଟି କ୍ଷେତ୍ରର ଅଭିବୃଦ୍ଧିରେ ତାଙ୍କର ଅବଦାନ ପାଇଁ କର୍ଣ୍ଣାଟକ ସର୍ବଦା ତାଙ୍କ ନିକଟରେ ଋଣୀ ରହିବ। ପୂର୍ବତନ ପ୍ରଧାନମନ୍ତ୍ରୀ ଏଚ୍ ଡି ଦେବେଗୌଡ଼ା ଶୋକ ପ୍ରକାଶ କରିବା ସହ କହିଛନ୍ତି, ମୋର ବନ୍ଧୁ ତଥା କର୍ଣ୍ଣାଟକର ଦୀର୍ଘଦିନର ସହକର୍ମୀଙ୍କ ବିୟୋଗରେ ଦୁଃଖିତ। କ୍ରିଷ୍ଣା ୧୯୯୯ରୁ ୨୦୦୪ ପର୍ଯ୍ୟନ୍ତ କର୍ଣ୍ଣାଟକର ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ, ଯେଉଁ ସମୟରେ ବେଙ୍ଗାଲୁରୁକୁ ଦେଶର ଟେକ୍ନୋଲୋଜି ହବ୍‌ରେ ପରିଣତ କରିବାରେ ତାଙ୍କୁ ଶ୍ରେୟ ଦିଆଯାଇଥିଲା ଏବଂ ସହରକୁ ‘ସିଲିକନ୍ ଭାଲି ଅଫ୍ ଇଣ୍ଡିଆ’ର ମାନ୍ୟତା ମିଳିଥିଲା।

ସୌଜନ୍ୟ-ସମ୍ୱାଦ