ପ୍ରତିଶ୍ରୁତି ପୂରଣ କରିନଥିଲେ ଜୟ ଶାହ, ଭାରତ ସହ ଫାଇନାଲ୍ ହେଲେ ବି ଆମେ ଖେଳିବୁନି…ବାସିତ ଅଲିଙ୍କ ବଡ଼ ମନ୍ତବ୍ୟ

ନୂଆଦିଲ୍ଲୀ: ପାକିସ୍ତାନ ୨୦୨୬ ଟି-୨୦ ବିଶ୍ୱକପରେ ଭାରତ ବିପକ୍ଷରେ ନଖେଳିବାକୁ ନିଷ୍ପତ୍ତି ନେଇଛି। ରବିବାର ପାକିସ୍ତାନ ସରକାର ଘୋଷଣା କରିଛନ୍ତି ଯେ, ତାଙ୍କ ଦଳ ଫେବୃଆରୀ ୧୫ ତାରିଖରେ ଭାରତ ବିପକ୍ଷରେ ଖେଳିବ ନାହିଁ। ପାକିସ୍ତାନ ମ୍ୟାଚ୍ ବର୍ଜନ କରିବ। ପୂର୍ବତନ ପାକିସ୍ତାନୀ କ୍ରିକେଟର ବାସିତ ଅଲି ଏହି ବିଷୟରେ ଏବିପିକୁ ପ୍ରତିକ୍ରିୟା ଦେଇଛନ୍ତି ।

ପାକିସ୍ତାନ ଭାରତ ବିପକ୍ଷରେ ମ୍ୟାଚ୍ ଖେଳିବାକୁ କାହିଁକି ମନା କଲା ? ସେନେଇ ଏକ ସାକ୍ଷାତକାରରେ ବାସିତ ଅଲି କହିଛନ୍ତି, ‘ଦକ୍ଷିଣ ଏସିଆ, ଅର୍ଥାତ୍ ଭାରତ, ବାଂଲାଦେଶ, ଶ୍ରୀଲଙ୍କା, ପାକିସ୍ତାନ ଏବଂ ଆଫଗାନିସ୍ତାନରେ, ସରକାର ଯାହା କହିବେ ତାହା ହିଁ ହୁଏ। ସରକାରଙ୍କ ନିଷ୍ପତ୍ତି ଚୂଡ଼ାନ୍ତ। ଜଣେ କ୍ରିକେଟର ଭାବରେ, ଆମକୁ ସରକାରଙ୍କ ନିଷ୍ପତ୍ତିକୁ ଗ୍ରହଣ କରିବାକୁ ପଡିବ। ଭାରତ ଏହା ଆରମ୍ଭ କରିଥିଲା।’

ସେ କହିଛନ୍ତି, ୨୦୨୫ ରେ ଯେତେବେଳେ ଚାମ୍ପିଅନ୍ସ ଟ୍ରଫି ପାକିସ୍ତାନରେ ହେବାକୁ ଥିଲା, ଭାରତ ପାକିସ୍ତାନ ଆସିବାକୁ ମନା କରିଥିଲା । କିନ୍ତୁ ପାକିସ୍ତାନୀ ଦଳ ୨୦୨୩ ବିଶ୍ୱକପ୍ ପାଇଁ ଭାରତ ଗସ୍ତ କରିଥିଲା। ଜୟ ଶାହ ସେହି ସମୟରେ BCCIରେ ଥିଲେ ଏବଂ ସେ କହିଥିଲେ ଯେ, ତୁମେ ବିଶ୍ୱକପ୍ ଖେଳିବାକୁ ଆସ ଏବଂ ଆମେ ଚାମ୍ପିଅନ୍ସ ଟ୍ରଫିକୁ ଆସିବୁ। ତା’ପରେ ଜୟ ଶାହ BCCI ରୁ ICCର ମୁଖ୍ୟ ହେଲେ ଏବଂ ସେ ତାଙ୍କର ପ୍ରତିଶ୍ରୁତି ପୂରଣ କଲେ ନାହିଁ। ତା’ପରେ ଚାମ୍ପିଅନ୍ସ ଟ୍ରଫି ଏକ ହାଇବ୍ରିଡ୍ ମଡେଲରେ ଖେଳାଯାଇଥିଲା।

ସେ ଆହୁରି କହିଛନ୍ତି, ‘ଯୁଦ୍ଧ ହୋଇଥିଲା ଏବଂ ତା’ପରେ ତୁରନ୍ତ ଏସିଆ କପ୍ ହୋଇଥିଲା। ଉଭୟ ଦେଶ ଏସିଆ କପ୍ ଖେଳିଥିଲେ । କାରଣ ପ୍ରସାରକମାନେ ଏଥିରେ ଟଙ୍କା ନିବେଶ କରିଥିଲେ। କିନ୍ତୁ କେହି ଦୟାକରି ବୁଝାନ୍ତୁ ଯେ, ଟିମ୍ ଇଣ୍ଡିଆ ମୋହସିନ ନକଭିଙ୍କଠାରୁ ଟ୍ରଫି କାହିଁକି ଗ୍ରହଣ କଲା ନାହିଁ। ଟ୍ରଫିଟି ଏସୀୟ କ୍ରିକେଟ ପରିଷଦର ମୁଖ୍ୟଙ୍କ ଦ୍ବାରା ପ୍ରଦାନ କରାଯିବାକୁ ଥିଲା । ଯଦି ଅଷ୍ଟ୍ରେଲିଆ ୨୦୨୩ ରେ ODI ବିଶ୍ୱକପ୍ ଜିତିବା ସମୟରେ ପ୍ରଧାନମନ୍ତ୍ରୀଙ୍କଠାରୁ ଟ୍ରଫି ଗ୍ରହଣ କରିବାକୁ ମନା କରିଥାନ୍ତା ତେବେ କ’ଣ ହୋଇଥାନ୍ତା ?’

ବାସିତ ଅଲି କହିଛନ୍ତି, ଭାରତୀୟ ଦଳ ସେଠାରେ ଟ୍ରଫି ଗ୍ରହଣ କରିନଥିଲା କାରଣ ଏହା ସରକାରଙ୍କ ନିଷ୍ପତ୍ତି ଥିଲା। ସେତେବେଳେ କେହି ଆପତ୍ତି କରିନଥିଲେ। ଏବେ ଯେତେବେଳେ ପାକିସ୍ତାନ ସରକାର ଅନୁଭବ କରୁଛନ୍ତି ଯେ, ବାଂଲାଦେଶ ସହିତ କିଛି ଭୁଲ ହୋଇଛି, ସେମାନେ ଭାରତ ବିପକ୍ଷରେ ଖେଳିବେ ନାହିଁ। ଲୋକମାନେ କହୁଛନ୍ତି ଯେ, ପାକିସ୍ତାନ ୟୁ-ଟର୍ଣ୍ଣ ନେବ । କିନ୍ତୁ ମୁଁ ଆପଣଙ୍କୁ କହିବାକୁ ଚାହୁଁଛି ଯେ, ପାକିସ୍ତାନ ନିଜ ନିଷ୍ପତ୍ତିରେ ୟୁ-ଟର୍ଣ୍ଣ ନେବ ନାହିଁ।

ସେପଟେ ୧୯ ବର୍ଷରୁ କମ୍ ବିଶ୍ବକପ୍ରେ ପାକିସ୍ତାନ ଭାରତ ବିପକ୍ଷରେ ଖେଳିଥିଲା । ରବିବାର ଏହି ମ୍ୟାଚ୍ ହୋଇଥିଲା । ବାସିତ ଅଲି କହିଛନ୍ତି, ମ୍ୟାଚ୍ ନଖେଳିବାର ନିଷ୍ପତ୍ତି ସନ୍ଧ୍ୟା ୭ଟାରେ ନିଆଯାଇଥିଲା । ତେଣୁ ପାକିସ୍ତାନ-ଭାରତ ମ୍ୟାଚ୍ ହୋଇପାରିଥିଲା । ଯଦି ଏହି ନିଷ୍ପତ୍ତି ପୂର୍ବରୁ ହୋଇଥାନ୍ତା, ତେବେ ଭାରତ ଏବଂ ପାକିସ୍ତାନ ମ୍ୟାଚ୍ ହୋଇପାରିନଥାନ୍ତା ।

ସାକ୍ଷାତକାରରେ ବାସିତ ଅଲି କହିଛନ୍ତି, ‘ମୁଁ ଭାବୁନାହିଁ ଯେ, ପାକିସ୍ତାନ ଏବେ ଭାରତ ବିପକ୍ଷରେ କୌଣସି ମ୍ୟାଚ୍ ଖେଳିବ । ଫେବୃଆରୀ ୧୫ ମ୍ୟାଚ୍ ହେଉ କିମ୍ବା ଟି20 ବିଶ୍ୱକପ୍ ଫାଇନାଲ। ICC ଗୋଟିଏ ହାତରେ ତାଳି ବଜାଉଛି । କାରଣ ଭାରତ ପ୍ରସାରଣକାରୀଙ୍କଠାରୁ ସର୍ବାଧିକ ରାଜସ୍ୱ ପାଏ। BCCI ସବୁଠାରୁ ଅଧିକ ରୋଜଗାର କରେ । ତେଣୁ ଆଇସିସି BCCIର ସବୁ ନିଷ୍ପତ୍ତିକୁ ସମର୍ଥନ କରେ । କିନ୍ତୁ ଯଦି ବାଂଲାଦେଶ କିଛି କୁହେ, ICC ନା କହେ। ଆଇସିସି ସମସ୍ତଙ୍କୁ ସମାନ ଭାବରେ ବ୍ୟବହାର କରୁନାହିଁ।’

ପାକିସ୍ତାନ ଭବିଷ୍ୟତରେ ଭାରତ ସହିତ କୌଣସି ମ୍ୟାଚ୍ ଖେଳିବ କି ନାହିଁ ପ୍ରଶ୍ନରେ ମଧ୍ୟ ଜବାବ ଦେଇଛନ୍ତି ବାସିତ ଅଲି । ସେ କହିଛନ୍ତି, ‘ଏବେ ଆଇସିସି ନୂଆ ନିୟମ କରିବ। ବର୍ତ୍ତମାନ ନିୟମ ହେଉଛି ଯେ, ଯଦି ସରକାର ମନା କରନ୍ତି, ତେବେ ଦଳ ଖେଳିବ ନାହିଁ । କିନ୍ତୁ ଏବେ ଏକ ନୂତନ ନିୟମ କରାଯିବ। ମୁଁ ଆଶ୍ଚର୍ଯ୍ୟ ହେଉଛି ଯେ, ସମସ୍ତ ବୋର୍ଡ ଟଙ୍କା ପାଇଁ ଲୋଭୀ। ସବୁ ବୋର୍ଡ ସତ କହୁନାହାନ୍ତି। ସବୁଠାରୁ ବଡ଼ ସମସ୍ୟା ପ୍ରସାରକମାନଙ୍କ ପାଇଁ ହେବ । ୨୦୩୧ ପର୍ଯ୍ୟନ୍ତ ଭାରତ-ପାକିସ୍ତାନ ମ୍ୟାଚ୍ ପାଇଁ ଏକ MOU ସ୍ୱାକ୍ଷରିତ ହୋଇଛି। ମହିଳା ଦଳର ମଧ୍ୟ ମ୍ୟାଚ୍ ଅଛି। ପାକିସ୍ତାନର ମହିଳା ଟିମ୍ ମଧ୍ୟ ଖେଳିବ ନାହିଁ। ଏବେ ଏସିଆ କପ୍ ମଧ୍ୟ ଅନୁଷ୍ଠିତ ହେବ ନାହିଁ। ଏବେ ଆଇସିସି ଆଖି ଖୋଲିବ। ପାକିସ୍ତାନ ଏକ ଛୋଟ ଦେଶ ନୁହେଁ। ପାକିସ୍ତାନ ସରକାର ଏକ ଭଲ ନିଷ୍ପତ୍ତି ନେଇଛନ୍ତି। ଆମେ ସମସ୍ତେ ଏହି ନିଷ୍ପତ୍ତିକୁ ସମର୍ଥନ କରୁଛୁ।’

ସୌଜନ୍ୟ Prameya News7