ପ୍ରତି ୧୨ ଶିଶୁରେ ଜଣେ ଅନ୍‌ଲାଇନ୍ ଯୌନ ନିର୍ଯାତନାର ଶିକାର: ଲାନ୍‌ସେଟ୍

ନୂଆଦିଲ୍ଲୀ: ଲାନ୍‌ସେଟ୍ ଚାଇଲ୍ଡ ଆଣ୍ଡ୍ ଆଡଲସେଣ୍ଟ ହେଲ୍ଥରେ ମଙ୍ଗଳବାର ପ୍ରକାଶିତ ଏକ ନୂତନ ଅଧ୍ୟୟନ ଅନୁଯାୟୀ ବିଶ୍ୱରେ ପ୍ରତି ୧୨ ଜଣ ଶିଶୁଙ୍କ ମଧ୍ୟରୁ ଜଣେ କୌଣସି ନା କୌଣସି ପ୍ରକାରେ ଅନ୍‌ଲାଇନ୍ ଯୌନ ଶୋଷଣ କିମ୍ବା ନିର୍ଯାତନାର ଶିକାର ହୋଇଛନ୍ତି। ଅନ୍‌ଲାଇନ୍ ଶିଶୁ ଯୌନ ଶୋଷଣ ଓ ନିର୍ଯାତନା (ଓସିଏସ୍‌ଇଏ) ହେଉଛି ଏକ ବିଶ୍ୱସ୍ତରୀୟ ଜନସ୍ୱାସ୍ଥ୍ୟ ସମସ୍ୟା ଯାହା ଦ୍ରୁତ ଗତିରେ ବୃଦ୍ଧି ପାଉଛି। ଏହା ଅନ୍‌ଲାଇନ୍‌ରେ କିମ୍ବା ସୂଚନା ଓ ଯୋଗାଯୋଗ ପ୍ରଯୁକ୍ତି (ଆଇସିଟି) ବ୍ୟବହାର ମାଧ୍ୟମରେ ହେଉଥିବା ଯୌନ ଶୋଷଣକୁ ବୁଝାଏ, ଯେଉଁଥିରେ ଅନ୍‌ଲାଇନ୍ ଅନୁରୋଧ, ଅନ୍‌ଲାଇନ୍ ଗ୍ରୁମିଂ, ପର୍ଣ୍ଣୋଗ୍ରାଫି ସଂସ୍ପର୍ଶରେ ଆସିବା, ଫଟୋ ଆଧାରିତ ନିର୍ଯାତନା, ଯୌନ ଶୋଷଣ ଆଦି ଅନ୍ତର୍ଭୁକ୍ତ।

୨୦୧୦ରୁ ୨୦୨୩ ମଧ୍ୟରେ କରାଯାଇଥିବା ୧୨୩ଟି ଅଧ୍ୟୟନର ଫଳାଫଳକୁ ବିଶ୍ଳେଷଣ କରି ଏହି ରିପୋର୍ଟ ପ୍ରକାଶ କରାଯାଇଛି, ଯେଉଁଥିରୁ ଜଣାପଡିଛି ଯେ ପ୍ରତି ଆଠ ଜଣ ଶିଶୁଙ୍କ ମଧ୍ୟରୁ ଜଣେ ଫଟୋ ଆଧାରିତ ନିର୍ଯାତନା (୧୨.୬%) ଓ ଅନ୍‌ଲାଇନ୍ ଅନୁରୋଧ (୧୨.୫%) ଦ୍ୱାରା ପ୍ରଭାବିତ ହୋଇଥିଲେ, ୨୧ ଜଣଙ୍କ ମଧ୍ୟରୁ ଜଣେ ଅନ୍‌ଲାଇନ୍ ଯୌନ ଶୋଷଣ (୪.୭%) ଦ୍ୱାରା ପ୍ରଭାବିତ ହୋଇଥିଲେ ଏବଂ ୨୮ ଜଣଙ୍କ ମଧ୍ୟରୁ ଜଣେ ଯୌନ ଚାଲାଣ (୩.୫%) ଦ୍ୱାରା ପ୍ରଭାବିତ ହୋଇଥିଲେ।

ସୌଜନ୍ୟ-ସମ୍ୱାଦ