ପ୍ରଥମ ଥର ପାଇଁ ତାଙ୍କ ଗାର୍ଲଫ୍ରେଣ୍ଡଙ୍କ ବିଷୟରେ କହିଲେ ବିଲ୍ ଗେଟ୍ସ

ୱାସିଂଟନ: ନିକଟରେ ଟୁଡେ ସୋ’ରେ ଏକ ସାକ୍ଷାତ୍‌କାରରେ ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ୍ ଗେଟ୍ସ ପ୍ରଥମ ଥର ପାଇଁ ପାଉଲା ହର୍ଡଙ୍କ ସହ ତାଙ୍କ ସମ୍ପର୍କ ବିଷୟରେ ସାର୍ବଜନୀନ ଭାବେ କହିଥିଲେ। ୬୯ ବର୍ଷୀୟ ଗେଟ୍ସ ନିଜର ଖୁସି ବ୍ୟକ୍ତ କରି କହିଛନ୍ତି, ମୁଁ ଭାଗ୍ୟବାନ ଯେ ପାଉଲା ମୋର ଗାର୍ଲଫ୍ରେଣ୍ଡ। ଆମେ ମଜା କରୁଛୁ, ଅଲିମ୍ପିକ୍ସକୁ ଯାଉଛୁ ଏବଂ ଏକାଠି ଅନେକ ଭଲ ଜିନିଷ ଉପଭୋଗ କରୁଛୁ।
ପାଉଲା ହର୍ଡ ଜଣେ ସମାଜସେବୀ। ସେ ପୂର୍ବରୁ ଓରାକଲର ପୂର୍ବତନ ସିଇଓ ମାର୍କ ହର୍ଡଙ୍କୁ ବିବାହ କରିଥିଲେ ଯାହାଙ୍କର ୨୦୧୯ରେ ଦେହାନ୍ତ ହୋଇଥିଲା। ଗେଟ୍ସ ଓ ହର୍ଡଙ୍କୁ ପ୍ରଥମେ ୨୦୨୨ରେ ଏକାଠି ଦେଖିବାକୁ ମିଳିଥିଲା ଏବଂ ୨୦୨୩ ପ୍ରାରମ୍ଭରେ ସେମାନଙ୍କ ସମ୍ପର୍କକୁ ସାର୍ବଜନୀନ କରାଯାଇଥିଲା। ପ୍ୟାରିସ୍ ଅଲିମ୍ପିକ୍ସ, ବ୍ରେକ୍‌ଥ୍ରୁ ପ୍ରାଇଜ୍ ସମାରୋହ ଏବଂ ଅନନ୍ତ ଅମ୍ବାନୀଙ୍କ ବିବାହ ସମେତ ବିଭିନ୍ନ କାର୍ଯ୍ୟକ୍ରମରେ ଦୁହିଁଙ୍କୁ ଏକାଠି ଦେଖିବାକୁ ମିଳିଛି।

ମେଲିଣ୍ଡା ଫ୍ରେଞ୍ଚ ଗେଟ୍ସଙ୍କ ସହ ବିଲ୍‌ଙ୍କର ପୂର୍ବ ବିବାହ ୨୦୨୧ରେ ଶେଷ ହୋଇଥିଲା। ଗେଟ୍ସ ଏହି ବିଚ୍ଛେଦକୁ ତାଙ୍କର ସବୁଠାରୁ ବଡ଼ ଭୁଲ୍ ବୋଲି ବର୍ଣ୍ଣନା କରିଥିଲେ। ଟାଇମ୍ସ ଅଫ୍ ଲଣ୍ଡନକୁ ଦେଇଥିବା ଏକ ସାକ୍ଷାତ୍‌କାରରେ ବିଲ୍ ଗେଟ୍ସ ସ୍ୱୀକାର କରିଛନ୍ତି ଯେ ବିବାହର ୨୭ ବର୍ଷ ପରେ ମେଲିଣ୍ଡା ଫ୍ରେଞ୍ଚ ଗେଟ୍ସଙ୍କଠାରୁ ଛାଡପତ୍ର ତାଙ୍କ ଜୀବନର ସବୁଠାରୁ ବଡ ଦୁଃଖ। ଯଦିଓ ସେ ତାଙ୍କ ବର୍ତ୍ତମାନ ଜୀବନରେ ଅଧିକ ଖୁସି ଅଛନ୍ତି, ତଥାପି ସେ ସ୍ପଷ୍ଟ ଭାବରେ ସ୍ୱୀକାର କରିଥିଲେ ଯେ ଛାଡପତ୍ର ଉଭୟ ତାଙ୍କର ଓ ମେଲିଣ୍ଡାଙ୍କ ପାଇଁ ଏକ ଅତ୍ୟନ୍ତ କଷ୍ଟକର ସମୟ ଥିଲା, ଯାହା ଅତି କମ୍‌ରେ ଦୁଇ ବର୍ଷ ପର୍ଯ୍ୟନ୍ତ ଚାଲିଥିଲା। ଛାଡ଼ପତ୍ର ପରେ ବିଲ୍ ଗେଟ୍ସ ନିଜ ତ୍ରୁଟିକୁ ସ୍ୱୀକାର କରି ଅତୀତରେ ମେଲିଣ୍ଡାଙ୍କୁ ଅନେକ ଯନ୍ତ୍ରଣା ଦେଇଥିବା ସ୍ୱୀକାର କରିଥିଲେ। ସେମାନଙ୍କୁ ଅଲଗା କରିବାରେ ଅନ୍ୟ ଏକ ଗୁରୁତ୍ୱପୂର୍ଣ୍ଣ କାରଣ ହେଉଛି ଦୋଷୀସାବ୍ୟସ୍ତ ଯୌନ ଅପରାଧୀ ଜେଫ୍ରି ଏପଷ୍ଟିନଙ୍କ ସହିତ ବିଲ୍‌ଙ୍କ ଅତୀତର ସମ୍ପର୍କ। ମେଲିଣ୍ଡା ସାର୍ବଜନୀନ ଭାବରେ ସେମାନଙ୍କ ସମ୍ପର୍କକୁ ତୀବ୍ର ବିରୋଧ କରିଛନ୍ତି। ଏହାପରେ ବିଲ୍ ଏପଷ୍ଟିନଙ୍କ ସହ ତାଙ୍କ ସମ୍ପର୍କକୁ ଏକ ଭୁଲ୍ ବୋଲି ସ୍ୱୀକାର କରିଛନ୍ତି।

ସୌଜନ୍ୟ-ସମ୍ୱାଦ