ଫସାଇଦେଲା ମାଟ୍ରିମୋନି ସାଇଟ୍‌ର ଜୀବନସାଥୀ: ଉଡ଼ାଇନେଲା ଯୁବତୀଙ୍କ ୨୦ ଲକ୍ଷ

ଭୁବନେଶ୍ବର: ମାଟ୍ରିମୋନି ସାଇଟ୍‌ରେ ପୁରୁଷବନ୍ଧୁ ବା ଜୀବନସାଥୀ ବାଛିବାକୁ ଯାଇ ଫସିଛନ୍ତି ଜଣେ ଯୁବତୀ। ପୁରୁଷବନ୍ଧୁ ସାଜିଥିବା ସାଇବର ଠକ ବେଶ୍‌ କାଇଦାରେ ଯୁବତୀଙ୍କ ଆକାଉଣ୍ଟ୍‌ରୁ ଉଡ଼ାଇନେଇଛି ୨୦ ଲକ୍ଷ ଟଙ୍କା। ଠକାମିର ଶିକାର ହୋଇଥିବା ଯୁବତୀ ଏବେ ସାଇବର ଥାନା ଦୁଆରେ ଚକ୍କର କାଟୁଛନ୍ତି। ଯୁବତୀଙ୍କ ଅଭିଯୋଗ ଓ ସୂଚନା ଆଧାରରେ ପୁଲିସ ତଦନ୍ତ ଆରମ୍ଭ କରିଛି।

ଯୁବତୀଙ୍କ କହିବା ଅନୁସାରେ ବିବାହ ପାଇଁ ସେ ଏକ ଘରୋଇ ମାଟ୍ରିମୋନି ସାଇଟ୍‌ରେ ନିଜ ନାମ ପଞ୍ଜୀକରଣ କରିଥିଲେ। କିଛି ଦିନ ପରେ ଜଣେ ଯୁବକ ତାଙ୍କ ସହିତ ଯୋଗାଯୋଗ କରିଥିଲା। ସେ ଗୁଜରାଟର ବାସିନ୍ଦା ଏବଂ ବିଦେଶରେ ଏକ ୟୁଏସ୍‌ ବେସ୍‌ଡ୍‌ କମ୍ପାନିରେ ସଫ୍‌ଟୱେର୍‌ ଇଞ୍ଜିନିୟର୍‌ ଚାକିରି କରିଛି ବୋଲି କହିଥିଲା। ଏହାପରେ ସେମାନଙ୍କ ମଧ୍ୟରେ ବନ୍ଧୁତା ବଢ଼ିଥିଲା ଏବଂ ସେମାନେ ବିବାହ ବନ୍ଧନରେ ବାନ୍ଧିହେବେ ବୋଲି କଥା ଛିଡ଼ିଥିଲା। ଏହା ଭିତରେ ସେ ଭାରତ ଆସିବେ ଏବଂ ଭୁବନେଶ୍ବର ଆସି ତାଙ୍କୁ ଓ ତାଙ୍କ ପରିବାରକୁ ଭେଟି ବିବାହ ପ୍ରସ୍ତାବ ଦେବେ ବୋଲି ପ୍ରତିଶ୍ରୁତି ଦେଇଥିଲା। ହଠାତ୍ ଦିନେ ସେ ଫୋନ୍‌ କରି କହିଲା କି ଦିଲ୍ଲୀ ବିମାନବନ୍ଦରରେ ତାଙ୍କୁ କଷ୍ଟମ୍‌ସ ଅଧିକାରୀମାନେ ଅଟକାଇଛନ୍ତି। ତାଙ୍କ ପାଇଁ ବିଦେଶରୁ ଆଣିଥିବା ଉପହାର ବକ୍ସକୁ କଷ୍ଟମ୍‌ସ ଅଧିକାରୀମାନେ ଜବତ କରିଛନ୍ତି। କଷ୍ଟମ୍‌ସ ଶୁଳ୍କ ବାବଦରେ ଅଫିସର୍‌ମାନେ ଟଙ୍କା ଦାବି କରୁଛନ୍ତି।

ସାଙ୍ଗରେ ଆଣିଥିବା ଡଲାର ଏକ୍ସଚେଞ୍ଜ୍‌ ହୋଇପାରୁନଥିବାରୁ ସେ ଏହି ଶୁଳ୍କ ପଇଠ କରିପାରୁନାହାନ୍ତି। ପୁଣି ତାଙ୍କ ନିକଟରେ ଥିବା ଆମେରିକୀୟ ଡଲାର ପରିମାଣ ଅଧିକ ହୋଇଥିବାରୁ ସେଥିପାଇଁ ମଧ୍ୟ ଟିକସ ଦେବାକୁ କଷ୍ଟମ୍‌ସ ଅଧିକାରୀମାନେ କହୁଛନ୍ତି। ଏମିତି କହି ସେ ଅନ୍ୟଜଣକୁ ଫୋନ୍‌ ଧରାଇ ଦେଲା। ଉକ୍ତ ବ୍ୟକ୍ତିଜଣକ ନିଜକୁ ଦିଲ୍ଲୀ ଏୟାର୍‌ପୋର୍ଟର କଷ୍ଟମ୍‌ସ ଅଧିକାରୀ ବୋଲି ପରିଚୟ ଦେଇ ସମାନ କଥା ଦୋହରାଇଥିଲା। ତେଣୁ ସେ ବିଶ୍ବାସ କରିଯାଇଥିଲେ ଏବଂ ଯୁବକଙ୍କ କଥା ଅନୁସାରେ ୨୦ ଲକ୍ଷ ଟଙ୍କା ପଠାଇଦେଇଥିଲେ। ନେଟ୍‌ ବ୍ୟାଙ୍କିଂ ଜରିଆରେ ସେ ୨୦ ଲକ୍ଷ ଟଙ୍କା ପଠାଇବା ପରେ ଯୁବକଙ୍କ ମୋବାଇଲ୍‌ ସୁଇଚ୍‌ ଅଫ୍ ହୋଇଯାଇଥିଲା। ଯୁବତୀଜଣକ ବାରମ୍ବାର ଫୋନ୍‌ କଲେ ମଧ୍ୟ ତାହା ସୁଇଚ୍ ଅଫ୍ ଦେଖାଇଥିଲା। ଏହାପରେ ଯାଇ ଯୁବତୀ ବୁଝିଲେ ଯେ ସେ ସାଇବର ଠକ ହାବୁଡ଼ରେ ପଡ଼ି ଫସିଛନ୍ତି।

ସୌଜନ୍ୟ-ସମ୍ୱାଦ