ଫେବୃଆରୀ ୨୮ରୁ ଇଣ୍ଡ୍‌ପ୍ଲାସ୍‌-୨୫

ଭୁବନେଶ୍ୱର,୧୯।୧୨: ଇଣ୍ଡିଆନ୍‌ ପ୍ଲାଷ୍ଟିକ୍‌ ଫେଡେରେଶନ (ଆଇପିଏଫ୍‌)ର ବହୁ ପ୍ରତୀକ୍ଷିତ ବି୨ବି କାର୍ଯ୍ୟକ୍ରମ ତଥା ଅନ୍ତର୍ଜାତୀୟ ପ୍ଲାଷ୍ଟିକ୍‌ ପ୍ରଦର୍ଶନୀ ‘ଇଣ୍ଡ୍‌ପ୍ଲାସ୍‌-୨୫’ର ୧୦ମ ସଂସ୍କରଣ କୋଲକାତାର ବିଶ୍ୱ ବାଙ୍ଗଳା ମେଳା ପ୍ରାଙ୍ଗଣରେ ଅନୁଷ୍ଠିତ ହେବାକୁ ଯାଉଛି। ଏପରିକି ଏହି ମେଳା ୨୦୨୫ ଫେବୃଆରୀ ୨୮ରୁ ମାର୍ଚ୍ଚ ୩ ପର୍ଯ୍ୟନ୍ତ ଆୟୋଜିତ ହେବ। ଏହି ପ୍ରଦର୍ଶନୀରେ ପ୍ଲାଷ୍ଟିକ୍‌ ଇଣ୍ଡଷ୍ଟ୍ରିର ବିକାଶ ଏବଂ ନୂତନ ସୁଯୋଗକୁ ବିଭିନ୍ନ କାର୍ଯ୍ୟକ୍ରମ ଜରିଆରେ ଲୋକାଭିମୁଖୀ କରାଯିବ।
ଏହି ପରିପ୍ରେକ୍ଷୀରେ ଆଇପିଏଫ୍‌ ପକ୍ଷରୁ ବୁଧବାର ଏକ ଖବରଦାତା ସମ୍ମିଳନୀ ଭୁବନେଶ୍ୱରର ହୋଟେଲ ପ୍ରେସିଡେନ୍ସିଠାରେ ଆୟୋଜିତ ହୋଇଯାଇଛି। ଏହି ଅବସରରେ ଇଣ୍ଡ୍‌ପ୍ଲାସ୍‌-୨୫ କମିଟିର ଚେୟାରମ୍ୟାନ୍‌ ଅଶୋକ ଜାଜୋଡିଆ, ଆଇପିଏଫ୍‌ର ଉପାଧ୍ୟକ୍ଷ ଅମିତ ଅଗ୍ରଓ୍ବାଲ ଏବଂ ସଚିବ ଶ୍ୟାମଲାଲ ଅଗ୍ରଓ୍ବାଲ ପ୍ରମୁଖ ଉପସ୍ଥିତ ରହି ‘ଇଣ୍ଡ୍‌ପ୍ଲାସ୍‌-୨୫’ର ଆଭିମୁଖ୍ୟ ଓ ପ୍ରଦର୍ଶନୀ ସମ୍ବନ୍ଧୀୟ ବିଷୟବସ୍ତୁକୁ ବିସ୍ତୃତ ଭାବେ ଆଲୋଚନା କରିଥିଲେ।
ସେହିଭଳି ଆଇପିଏଫ୍‌ ପକ୍ଷରୁ ଆୟୋଜିତ ଏହି ପ୍ରଦର୍ଶନୀର ମୁଖ୍ୟ ଲକ୍ଷ୍ୟ ପ୍ଲାଷ୍ଟିକ୍‌ ଉତ୍ପାଦନ, ପ୍ରକ୍ରିୟାକରଣ, ପୁନଃ ବ୍ୟବହାର ପ୍ରଯୁକ୍ତିବିଦ୍ୟା ଏବଂ ସ୍ଥାୟୀ ଅଭ୍ୟାସରେ ପ୍ରୟୋଗ ଇତ୍ୟାଦି ସାମିଲ ରହିଛି। ଏହି ଅବସରରେ ୪୦୦ରୁ ଅଧିକ ପ୍ରଦର୍ଶକ, ଯନ୍ତ୍ରପାତି, କଞ୍ଚାମାଲ, ପ୍ୟାକେଜିଂ ଏବଂ ଅନ୍ୟାନ୍ୟ ମଧ୍ୟରେ ଉଦ୍ଭାବନ ପ୍ରଦର୍ଶନ କରିବେ। ଏହି ଚାରିଦିନିଆ ଶୋ’ରେ ୧,୫୦,୦୦୦ରୁ ଅଧିକ ପରିଦର୍ଶକ ଏବଂ ବିଦେଶୀ ଅଂଶଗ୍ରହଣକାରୀଙ୍କ ସମେତ ୧୦ରୁ ଊର୍ଦ୍ଧ୍ୱ ଦେଶରୁ ପ୍ରଦର୍ଶକମାନେ ଆସିବେ ବୋଲି ଆଶା ରଖାଯାଇଛି।
ଉଲ୍ଲେଖଯୋଗ୍ୟ, ଇଣ୍ଡ୍‌ପ୍ଲାସ୍‌’୨୫ ପୂର୍ବ ଭାରତର ସର୍ବବୃହତ୍‌ ବି୨ବି ଅନ୍ତର୍ଜାତୀୟ ପ୍ଲାଷ୍ଟିକ୍‌ ପ୍ରଦର୍ଶନୀ ହେବାକୁ ଯାଉଛି। ଏଥିରେ ଭାରତ ସମେତ ତାଇୱାନ, ଚାଇନା , ମାଲେସିଆ, ଭିଏଟ୍‌ନାମ, ଥାଇଲାଣ୍ଡ, ଜର୍ମାନୀ, ଆମେରିକା ଏବଂ ଇରାନ ଭଳି ଅନ୍ୟାନ୍ୟ ଦେଶରୁ ବିଦେଶୀ ପ୍ରଦର୍ଶକମାନେ ଅଂଶଗ୍ରହଣ କରିବାକୁ ଯାଉଛନ୍ତି। ଏପରିକି ଭାରତୀୟ ଭିସା ନୀତି ଯୋଗୁ ଅନେକ ଚାଇନା ପ୍ରଦର୍ଶକ ଉପସ୍ଥିତ ହେବାକୁ ଅସମର୍ଥ ହୋଇଥିବାବେଳେ ଉଭୟ ଭାରତୀୟ ଏବଂ ଆନ୍ତର୍ଜାତିକ ଯନ୍ତ୍ରପାତି, କଞ୍ଚାମାଲ, ଆନୁଷଙ୍ଗିକ ସେବା ଓ ଯୋଗାଣକାରୀ ଏବଂ ମାଷ୍ଟରବ୍ୟାଚ୍‌ ଉତ୍ପାଦନକାରୀଙ୍କଠାରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।

ସୌଜନ୍ୟ-ଧରିତ୍ରୀ