ବଡ଼ଗେଙ୍ଗୁଟି ନଦୀପଠା ଏବେ ଘାସପଡ଼ିଆ: ପୋତି ହୋଇଗଲାଣି ନଦୀ, ବିରୂପା ପରି ଅସ୍ତିତ୍ୱ ହରାଉଛି

ଚଣ୍ଡିଖୋଲ: ବିରୂପା ପରି ବଡ଼ଗେଙ୍ଗୁଟି ନଦୀ ଅସ୍ତିତ୍ୱ ହରାଇବାକୁ ବସିଛି। ପୋତି ହୋଇଗଲାଣି ନଦୀପଠା। ବର୍ତ୍ତମାନ ଏହା ଘାସପଡ଼ିଆ ପାଲଟିଥିବାବେଳେ ସେଥିରେ ଗୋରୁଗାଈ ଚରୁଛନ୍ତି। ଏହି ନଦୀରେ କେଉଁଠି କେମିତି ପାଣିଧାର ଦେଖିବାକୁ ମିଳୁଛି। ଫଳରେ ନଈକୂଳିଆ ବାସିନ୍ଦା ପାଣି ସମସ୍ୟାରେ ଆଉଟୁପାଉଟୁ ହେଉଛନ୍ତି। ଗୋଟିଏ ପଟେ ଚାଷ ପାଇଁ ପାଣି ମିଳୁନି, ଅନ୍ୟପଟେ ଭୂତଳ ଜଳସ୍ତର ତଳକୁ ଖସିବାରେ ଲାଗିଛି।

ସୂଚନା ମୁତାବକ, ବିରୂପା ନଦୀର ଶାଖା ହେଉଛି ବଡ଼ଗେଙ୍ଗୁଟି। କଟକ ଜିଲ୍ଲା ମାହାଙ୍ଗା ବ୍ଲକ୍‌ ଅନ୍ତର୍ଗତ ଲାପଟୁଆଁ ବରାହିପୁର ନିକଟରୁ ବିରୂପା ନଦୀରୁ ଏହା ବାହାରି ବଡ଼ଗେଙ୍ଗୁଟି ନାମରେ ମାହାଙ୍ଗା, ବଡ଼ଚଣା ଓ ଧର୍ମଶାଳା ବ୍ଲକ୍‌ର ବିଭିନ୍ନ ଅଞ୍ଚଳ ଦେଇ ପ୍ରବାହିତ ହେବା ସହ ବଡ଼ଚଣାର ସାଉଡ଼ିଆଠାରେ ବ୍ରାହ୍ମଣୀ ନଦୀର ଶାଖା କେଲୁଅ ନଦୀରେ ମିଶିଛି। ମୋଟ ୩୫ କିଲୋମିଟର ଏହା ପ୍ରବାହିତ ହୋଇଛି। ବଡ଼ଗେଙ୍ଗୁଟିର ବରାହିପୁରର ଆରମ୍ଭ ସ୍ଥଳଠାରୁ ୫୩ ନମ୍ବର ଜାତୀୟ ରାଜପଥର ବେଣାପୁର ପର୍ଯ୍ୟନ୍ତ ୧୫ କିଲୋମିଟର ବ୍ୟାପୀ ନଦୀଶଯ୍ୟା ଗତ ୨୦ ବର୍ଷ ହେବ ପୋତି ହେବାରେ ଲାଗିଛି।

ପୋତି ହୋଇଯାଇଥିବା ଏହି ଅଞ୍ଚଳ ସବୁ ଘାସପଡ଼ିଆ ପାଲଟି ଯାଇଛି। ନଦୀପଠାର ବିଭିନ୍ନ ସ୍ଥାନରେ ବଡ଼ବଡ଼ ଗଛ ଉଠି ଜଙ୍ଗଲିଆ ପରିବେଶ ସୃଷ୍ଟି ହୋଇଗଲାଣି। କେତେକ ଅଞ୍ଚଳରେ ଚାଷୀମାନେ ଏହାର ପଠାରେ ବିଭିନ୍ନ ପରିବା ଚାଷ କଲେଣି। କିନ୍ତୁ ପୂର୍ବରୁ ନଈକୂଳିଆ ଲୋକେ ଏହି ନଦୀରୁ ପାଣି ମଡ଼ାଇ ସେମାନଙ୍କ ଜମିରେ ବିଭିନ୍ନ ଚାଷ କରୁଥିଲେ। ଏବେ ନଦୀ ପୋତି ହୋଇ ଯାଇଥିବାରୁ ଚାଷୀମାନେ ଜମିରେ ଆଉ ପାଣି ମଡ଼ାଇ ଚାଷ କରି ପାରୁନାହାନ୍ତି ବୋଲି କହିଛନ୍ତି। ଦିନକୁ ଦିନ ପାଣି ସୁଅ କମିଯାଉଥିବାରୁ ନଦୀ କୂଳବର୍ତ୍ତୀ ୮ ପଞ୍ଚାୟତର ଚାଷୀ ବିଭିନ୍ନ ସମସ୍ୟାର ସମ୍ମୁଖୀନ ହୋଇ ଆସୁଛନ୍ତି। ନଦୀର ପୁନରୁଦ୍ଧାର ପାଇଁ ଏହାର ଶଯ୍ୟାକୁ ଖନନ କରିବା ଜରୁରି ବୋଲି ସ୍ଥାନୀୟ ଲୋକେ କହିଛନ୍ତି।

ସୌଜନ୍ୟ-ସମ୍ୱାଦ