ବନ୍ଦ ଘରେ ପଣବନ୍ଦୀ ରଖି ନାବାଳିକାକୁ ଗଣଦୁଷ୍କର୍ମ ଘଟଣା: ୩ ଗିରଫ

ରାଉରକେଲା, ୨୦/୧୨: ବନ୍ଦ ଘରେ  ପଣବନ୍ଦୀ ରଖି ନାବାଳିକାକୁ ଗଣଦୁଷ୍କର୍ମ । ଦୁଇଦିନ ଯୌନ ଉତ୍ପୀଡ଼ନ ପରେ ଛାଡ଼ିଦେଇଥିଲେ  ତିନି ଜଣ ଯୌନପିପାସୁ । ଘଟଣାର ତଦନ୍ତ କରି ୩ ଅଭିଯୁକ୍ତଙ୍କୁ ଗିରଫ କରିଛି ଉଦିତ ନଗର ପୋଲିସ । ଶୁକ୍ରବାର ତିନି ଗିରଫ ଅଭିଯୁକ୍ତଙ୍କ ଡାକ୍ତରୀ ମାଇନା ସରିଛି । ଅନ୍ୟ ପଟେ ପୀଡ଼ିତା ନାବାଳିକାଙ୍କ ଡାକ୍ତରୀ ମାଇନା ସରିଥିବା ବେଳେ ୧୬୪ ବୟାନ ରେକର୍ଡ କରାଯିବ । ସୁନ୍ଦରଗଡ଼ ଜିଲ୍ଲାର ରାଉରକେଲା ସହରରୁ ଏଭଳି ଅମାନୁଷିକ ଖବର ସାମ୍ନାକୁ ଆସିଛି ।

ସୂଚନା ମୁତାବକ, ସମ୍ପୃକ୍ତ ୧୫ ବର୍ଷୀୟା ନାବାଳିକାଙ୍କ ଘର ଉଦିତ୍‌ନଗର  ଥାନାଞ୍ଚଳରେ । ତାଙ୍କ ମା’ବାପା ଦିନ ମଜୁରିଆ ।  ଗରିବ ପରିବାରର ହୋଇଥିବାରୁ ନାବାଳିକା  ଜଣକ ବିଭିନ୍ନ ସ୍ଥାନରେ ବୁଲି ଖାଇବା ଯୋଗାଡ଼  କରିଥାଆନ୍ତି । ଘଟଣା ଦିନ ଅର୍ଥାତ୍‌ ଗତ ୧୭ ତାରିଖରେ ସେ ଷ୍ଟେସନ ଅଞ୍ଚଳରେ ବୁଲାବୁଲି  କରୁଥିବାବେଳେ ଦୁଇଜଣ ଯୁବକ ଆସି ତାଙ୍କ ସହ ସମ୍ପର୍କ ଯୋଡ଼ିଥିଲେ । ଖାଇବାକୁ ଦେବାକୁ ପ୍ରଲୋଭିତ କରିଥିଲେ । ହେଲେ ସେମାନଙ୍କ ଉଦ୍ଦେଶ୍ୟ ଥିଲା ଅଲଗା । ନାବାଳିକାଙ୍କୁ ଜାଲରେ ଫସାଇ ଦୁଇ ଅଭିଯୁକ୍ତ ରାଉରକେଲାଠାରୁ ପ୍ରାୟ ୨୦ କିମି ଦୂରକୁ ନେଇଯାଇଥିଲେ । ଏକ ଝାଟିମାଟି ଘରେ ପଣବନ୍ଦୀ କରି ରଖିଥିଲେ । ଉକ୍ତ ଘରେ ରହୁଥିବା ଅନ୍ୟ ଜଣେ ବ୍ୟକ୍ତି ଏବଂ ଦୁଇ ଅଭିଯୁକ୍ତ ତାଙ୍କୁ ଦୁଇଦିନ ଧରି ପଣବନ୍ଦୀ ରଖି ଦୁଷ୍କର୍ମ କରିଥିଲେ । ନାବାଳିକା ଜଣକ ଘରକୁ ନ ଫେରିବାରୁ  ମା’ ଖୋଜାଖୋଜି କରିଥିଲେ । ହେଲେ  ପାଇ ନ ଥିଲେ । ଗୁରୁବାର ସକାଳେ ଜଣେ  ଅଭିଯୁକ୍ତ ବାଇକ୍‌ରେ ଆଣି ନାବାଳିକାକୁ ବିର୍ସା  ଛକରେ ଛାଡ଼ି ପଳାଇଥିଲେ ।

ଅସହାୟ ଅବସ୍ଥାରେ ବୁଲୁଥିବା ବେଳେ ପୀଡ଼ିତାଙ୍କୁ ଦେଖିଥିଲା ପୋଲିସ । ପରେ ଏହି ଘଟଣା ସମ୍ପର୍କରେ ଜାଣି ମାମଲା ରୁଜୁ କରିଥିଲା ପୋଲିସ । ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢାଉ ଜାରି ରଖିଥିଲା । ଶେଷରେ ୩ ଜଣଙ୍କୁ ଧରିବାରେ ସଫଳ ହୋଇଛି ପୋଲିସ ।

ସୌଜନ୍ୟ – ସମ୍ୱାଦ