ବାରଣାସୀର ରେଳ ଷ୍ଟେସନ୍‌ରେ ଅଗ୍ନିକାଣ୍ଡ ଘଟି ଜଳିଗଲା ୨୦୦ ଗାଡ଼ି

ବାରଣାସୀ: ଶନିବାର ପୂର୍ବାହ୍ନରେ ଉତ୍ତରପ୍ରଦେଶର ବାରଣାସୀର କ୍ୟାଣ୍ଟ ରେଳ ଷ୍ଟେସନର ଗାଡି ପାର୍କିଂ ଅଞ୍ଚଳରେ ଏକ ବଡ଼ ଧରଣର ଅଗ୍ନିକାଣ୍ଡ ଘଟି ଅତି କମରେ ୨୦୦ଟି ଦୁଇ ଚକିଆ ଯାନରେ ନିଆଁ ଲାଗିଯାଇଛି। ଅଗ୍ନିଶମ ବାହିନୀ ଏବଂ ପୁଲିସ ବିଭାଗର ଅଧିକାରୀମାନେ ନିଆଁ ଲିଭାଇବାରେ ନିୟୋଜିତ ଅଛନ୍ତି।

ପାର୍କିଂ ଅଞ୍ଚଳରେ ଏକ ବଡ଼ ଧରଣର ଅଗ୍ନିକାଣ୍ଡ ଦେଖାଯାଇଛି। ଗୋଟିଏ ଭିଡିଓରେ ପୁଲିସ୍ ଅଧିକାରୀଙ୍କ ଏକ ଟିମ୍ ଘଟଣାସ୍ଥଳରେ ପାଣି ଛିଞ୍ଚୁଥିବାର ଦେଖିବାକୁ ମିଳୁଛି। ଅଗ୍ନିକାଣ୍ଡ ଯୋଗୁ ବ୍ୟାପକ ଧୂଆଁ ଏବଂ କୁହୁଡ଼ି ମଧ୍ୟ ଦେଖିବାକୁ ମିଳୁଛି।

ସରକାରୀ ରେଳ ପୁଲିସ (ଜିଆର୍‌ପି), ରେଳ ସୁରକ୍ଷା ବଳ (ଆରପିଏଫ) ଏବଂ ସ୍ଥାନୀୟ ପୁଲିସ ଟିମ୍ ସହିତ ନିଆଁ ଲିଭାଇବା ପାଇଁ ପ୍ରାୟ ୧୨ଟି ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ତେବେ ଏହି ଅଗ୍ନିକାଣ୍ଡରେ କେହି ଆହତ ହୋଇନଥିବା ଖବର ରହିଛି।

ପ୍ରାରମ୍ଭିକ ଅନୁସନ୍ଧାନ ଅନୁଯାୟୀ ସର୍ଟ ସର୍କିଟ ଯୋଗୁ ଏହି ଅଗ୍ନିକାଣ୍ଡ ଘଟିଛି।

ସିଓ ଜିଆର୍‌ପି କୁନୱର ବାହାଦୁର ସିଂ କହିଛନ୍ତି, “କିଛି ସାଇକେଲ୍‌ ମଧ୍ୟ ଏହି ଅଗ୍ନିକାଣ୍ଡରେ ପୋଡି ପାଉଁଶ ହୋଇଯାଇଥିଲା। ସର୍ଟ ସର୍କିଟ ଯୋଗୁ ଏହି ଅଗ୍ନିକାଣ୍ଡ ଘଟିଛି। ଆମେ ଅଧିକ ଅନୁସନ୍ଧାନ କରୁଛୁ।” ଏହି ଘଟଣାରେ ପୋଡ଼ି ଯାଇଥିବା ଦୁଇ ଚକିଆ ଯାନ ମଧ୍ୟରୁ ଅଧିକାଂଶ ରେଳ କର୍ମଚାରୀଙ୍କର ବୋଲି ଅଧିକାରୀମାନେ କହିଛନ୍ତି।

“ମୁଁ ମୋ ବାଇକକୁ ରାତି ପ୍ରାୟ ୧୨ଟାରେ ପାର୍କିଂ କରିଥିଲି। ଗାଡି ପାର୍କିଂ ନିକଟରେ ଥିବା ଜଣେ ଲୋକ ମୋତେ କହିଥିଲେ ଯେ ସର୍ଟ ସର୍କିଟ ରାତି ପ୍ରାୟ ୧୧ଟା ପୂର୍ବରୁ ହୋଇସାରିଛି ଏବଂ ତାହାକୁ ଠିକ୍ କରାଯାଇଛି। କିଛି ଘଣ୍ଟା ପରେ ଜଣେ ଯାତ୍ରୀ ମୋତେ କହିଥିଲେ ଯେ ସେଠାରେ ନିଆଁ। ମୁଁ ମୋ ବାଇକ ବାହାର କରି ଅନ୍ୟ ପାର୍ଶ୍ୱରେ ପାର୍କିଂ କଲି। କିଛି ସମୟ ପରେ ନିଆଁ ପାର୍କିଂ ସ୍ଥାନକୁ ବ୍ୟାପି ଯାଇଥିଲା।’’ ବୋଲି ଜଣେ ବାଇକର୍‌ କହିଛନ୍ତି।
ସୌଜନ୍ୟ-ପ୍ରମେୟ