ବିକଳାଙ୍ଗ ଟ୍ରାଫିକ୍‌ ପୋଷ୍ଟ: ଡମଣାରେ ନାହିଁ, ପଟିଆ ଓ କିଟ୍‌ରେ ଭାଙ୍ଗିଯାଇଛି

ଚନ୍ଦ୍ରଶେଖରପୁର: ଦିନେ କି ମାସେ ନୁହେଁ। ୬ ମାସ ବିତିଗଲାଣି। ପୁନଃନିର୍ମାଣ ହୋଇପାରୁ ନାହିଁ ଡମଣା ଟ୍ରାଫିକ୍‌ ପୋଷ୍ଟ। ନଭେମ୍ବର ପ୍ରଥମ ସପ୍ତାହରେ ଏକ ଭୟଙ୍କର ଦୁର୍ଘଟଣାରେ ଟ୍ରାଫିକ୍ ପୋଷ୍ଟ ଭାଙ୍ଗିଥିଲେ ମଧ୍ୟ ଆଜି ପର୍ଯ୍ୟନ୍ତ ନୂଆ ନିର୍ମାଣ କରାଯାଇ ନାହିଁ। ପରିଣାମ ସ୍ବରୂପ ଖରାରୁ ରକ୍ଷା ପାଇବାକୁ ଟ୍ରାଫିକ୍‌ ପୁଲିସ କେତେବେଳେ ଗଛ ଛାଇରେ ଛିଡ଼ା ହୋଇ ଟ୍ରାଫିକ୍‌ ପରିଚାଳନା କରୁଛନ୍ତି ତ ଆଉ କେବେ ଟାଇଁ ଟାଇଁ ଖରାରେ ଦିନ କଟୁଛି। କର୍ମଚାରୀମାନେ ଏନେଇ ବାରମ୍ବାର ଉପରିସ୍ଥ ଅଧିକାରୀମାନଙ୍କ ନିକଟରେ ଗୁହାରି କରିଥିଲେ ମଧ୍ୟ ଆଜି ପର୍ଯ୍ୟନ୍ତ ବିପର୍ଯ୍ୟସ୍ତ ଟ୍ରାଫିକ୍‌ ବ୍ୟବସ୍ଥାରେ ସୁଧାର ଅଣାଯାଇପାରି ନାହିଁ। କେବେ ହେବ ସେନେଇ ମଧ୍ୟ କାହା ପାଖରେ ଉତ୍ତର ନାହିଁ। କେବଳ ଡମଣା ଟ୍ରାଫିକ୍‌ ଛକ ନୁହେଁ, ପଟିଆ ଓ କିଟ୍ ଛକରେ ଅବସ୍ଥା ମଧ୍ୟ ଦୟନୀୟ। ଛକରେ ଥିବା ଟ୍ରାଫିକ୍‌ ପୋଷ୍ଟ ଭଙ୍ଗି ଯାଇଥିବାରୁ ଡ଼୍ୟୁଟି କରୁଥିବା ପୁଲିସ୍ କର୍ମଚାରୀ ଘଣ୍ଟା ଘଣ୍ଟା ଖରାରେ ଠିଆ ହୋଇ ଟ୍ରାଫିକ୍ ନିୟନ୍ତ୍ରଣ କରୁଥିବା ଦେଖବାକୁ ମିଳିଛି। ୬ମାସ ତଳେ ବିଳମ୍ବିତ ରାତିରେ ଏକ ହାଇୱା ଧକ୍କାରେ ଡମଣା ଟ୍ରାଫିକ୍‌ ପୋଷ୍ଟ ଚୁରମାର ହୋଇଥିବା ବେଳେ ପଟିଆ ଛକରେ ମଧ୍ୟ ସମାନ ପ୍ରକାର ଦୁର୍ଘଟଣା ହୋଇଥିଲା। ବିଳମ୍ବିତ ରାତିରେ ଏକ ମୋରମ୍‌ ବୋଝେଇ ଟ୍ରକ୍ ଟ୍ରାଫିକ୍ ପୋଷ୍ଟକୁ ଧକ୍କା ଦେବାରୁ ତାହା ଭାଙ୍ଗିଯାଇଛି। ପା‌ଖାପାଖି ସପ୍ତାହେ ହେଲା ଟ୍ରାଫିକ୍‌ ପୋଷ୍ଟ ଅଧା ଭଙ୍ଗା ଅବସ୍ଥାରେ ରହିଥିବାରୁ ଟ୍ରାଫିକ୍‌ କର୍ମଚାରୀ ସେଠାରେ କାର୍ଯ୍ୟ କରିପାରୁ ନାହାନ୍ତି। ବାଧ୍ୟ ହୋଇ ନିକଟରେ ଥିବା ଗଛ ମୂଳେ ଛିଡ଼ା ହୋଇ ଟ୍ରାଫିକ୍‌ ପରିଚାଳନା କରୁଛନ୍ତି। ସେହିପରି କିଟ୍ ଛକ ଟ୍ରାଫିକ୍‌ ପୋଷ୍ଟ କଥା ନ‌ କହିବା ଭଲ। କିଛି ଦିନ ପୂର୍ବେ ଏକ ଦ୍ରୁତଗାମୀ କାର୍ ଜନଗହଳି ସମ‌ୟରେ ଟ୍ରାଫିକ୍ ପୋଷ୍ଟକୁ ଧକ୍କା ଦେଇ ଚାଲିଯାଇଥିଲା। ଅର୍ଦ୍ଧ ଭଗ୍ନ ଅବସ୍ଥାରେ ଟ୍ରାଫିକ୍‌ ପୋଷ୍ଟ ରହିଥିବାରୁ ପୁଲିସ୍ କର୍ମଚାରୀ ସେଠାରେ ଡ଼୍ୟୁଟି କରିବାକୁ ସୁରକ୍ଷିତ ମଣୁନାହାନ୍ତି।

ଡମଣାରେ ନାହିଁ, ପଟିଆ ଓ କିଟ୍‌ରେ ଭାଙ୍ଗିଯାଇଛି
କାହା ଦାନକୁ ଚାହିଁରହିଛି କମିସନରେଟ୍‌ ପୁଲିସ
ଲୋକଙ୍କ କଥା ବୁଝି‌ଲେ, ଟ୍ରାଫିକ କର୍ମଚାରୀଙ୍କୁ ଭୁଲିଗଲେ

ଏନେଇ ଟ୍ରାଫିକ୍‌ ପୋଷ୍ଟଗୁଡ଼ିକର ମରାମତି ଓ ଡ଼ମଣା ଛକରେ ନୂଆ ପୋଷ୍ଟ ନିର୍ମାଣ କରିବାକୁ କର୍ମଚାରୀମାନେ ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନେଉ ନଥିବା ଅଭିଯୋଗ ହୋଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଟ୍ରାଫିକ୍‌ ପୋଷ୍ଟ ନିର୍ମାଣ ଓ ମରାମତି କରିବାକୁ କୌଣସି ସଂସ୍ଥାର ସହାୟତାକୁ ଉପରିସ୍ଥ ଅଧିକାରୀମାନେ ଚାହିଁ ରହିଛନ୍ତି। ଯଦି କୌଣସି ବ୍ୟାଙ୍କ କିମ୍ବା ଘରୋଇ ସଂସ୍ଥା ସେମାନଙ୍କ ସିଏସ୍‌ଆର ଫଣ୍ଡ୍‌ରୁ ଅର୍ଥ ଯୋଗ‌ାଇ ଦେବେ ତାହା ହେଲେ ଟ୍ରାଫିକ୍‌ ପୋଷ୍ଟର ମରାମତି ହେବ। ନ ହେଲେ ଟ୍ରାଫିକ୍‌ ପୁଲିସ କର୍ମଚାରୀ ଏମିତି ଖରାରେ ସିଝି କାମ କରୁଥିବେ।
ଅନ୍ୟପକ୍ଷରେ ଟାଣ ଖରାରୁ ପଥଚାରୀଙ୍କୁ ସୁରକ୍ଷା ଦେବାକୁ ଏହି ଟ୍ରାଫିକ୍‌ ଛକଗୁଡ଼ିକରେ ସେଡ୍‌ ହେଉଛି। ଗୋଲାପି ଓ ସବୁଜ ରଙ୍ଗର କପଡ଼ା ଟାଙ୍ଗି କାର୍‌, ମୋଟର ସାଇକେଲ୍‌ ଚାଳକଙ୍କ ପାଇଁ ବ୍ୟବସ୍ଥା କରାଯାଇଛି। ଲୋକଙ୍କୁ ଖରାରୁ ଟିକିଏ ଆଶ୍ବସ୍ତି ଦେବାକୁ ବ୍ୟବସ୍ଥା ହୋଇଥିବାରୁ ମୁଣ୍ଡ ଫଟା ଖରାରୁ ପଥଚାରୀ ଟିକିଏ ତ୍ରାହି ପାଉଛନ୍ତି। ହେଲେ ଯେଉଁମାନେ ଲୋକଙ୍କୁ ସେବା ଯୋଗାଇ ଦେଉଛନ୍ତି ସେମାନଙ୍କ ପାଇଁ ଆଦୌ ବ୍ୟବସ୍ଥା ନଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।

ସୌଜନ୍ୟ-ସମ୍ୱାଦ