ବିରାଟଙ୍କୁ ଦେଖିବାକୁ ଜମିଲା ଲୋକଭିଡ଼: ୩ ଜଣ ଆହତ

ନୂଆଦିଲ୍ଲୀ: ଟିମ୍ ଇଣ୍ଡିଆର ଷ୍ଟାର ବ୍ୟାଟର ବିରାଟ କୋହଲି ଖେଳିବେ ରଣଜୀ ଟ୍ରଫି । ଆଜି ଦିଲ୍ଲୀ ଏବଂ ରେଲୱେ ମଧ୍ୟରେ ମ୍ୟାଚ ଖେଳାଯିବ। ଦୀର୍ଘ ୧୨ ବର୍ଷର ବ୍ୟବଧାନ ପରେ ବିରାଟ ଫେରିଥିବାରୁ ତାଙ୍କୁ ଦେଖିବାକୁ ଅଗଣତି ଲୋକଭିଡ଼ ଜମିଛି।

ନୂଆଦିଲ୍ଲୀର ଅରୁଣ ଜେଟଲି ଷ୍ଟାଡିୟମ ବାହାରେ ବିରାଟଙ୍କୁ ଦେଖିବା ପାଇଁ ପ୍ରବଳ ଭିଡ଼ ସହ ବିଶୃଙ୍ଖଳା ପରିସ୍ଥିତି ସୃଷ୍ଟି ହୋଇଛି। ପ୍ରଶଂସକମାନେ ସେମାନଙ୍କର ପ୍ରିୟ ତାରକାଙ୍କୁ ଦେଖିବା ପାଇଁ ଉତ୍ସାହିତ ଥିଲେ ଏବଂ ବହୁ ସଂଖ୍ୟାରେ ସେ ସ୍ଥାନକୁ ଆସିଥିଲେ।

କିନ୍ତୁ ପ୍ରବଳ ଲୋକ ଭିଡ଼ ‌ହେତୁ ପ୍ରଶଂସକମାନେ ଆହତ ହେବା ସହିତ ସ୍ଥାନ ବାହାରେ ପରିସ୍ଥିତି ବିଶୃଙ୍ଖଳିତ ହୋଇଯାଇଛି। ଗେଟ୍ ୧୬ ବାହାରେ ଏଭଳି ପରିସ୍ଥିତି ଉପୁଜିଥିବା ସୂଚନା ରହିଛି। ଫାଟକ ପାଖରେ କିଛି ପ୍ରଶଂସକ ଆହତ ହୋଇ ତଳ ପଡ଼ି ଯାଇଛନ୍ତି।

ଏକ ପୁଲିସ ବାଇକ୍ ଏହି ଭିଡ଼ ଭିତରେ କ୍ଷତିଗ୍ରସ୍ତ ହୋଇଛି ଏବଂ ଅନେକ ସେମାନଙ୍କ ଜୋତା ପଛରେ ଛାଡ଼ି ଆଗକୁ ମାଡ଼ି ଯାଇଥିଲେ।  ଏହି ବିଶୃଙ୍ଖଳାରେ ଅତି କମରେ ତିନି ଜଣ ଆହତ ହୋଇଥିବା ସୂଚନା ରହିଛି।

ଆହତ ପ୍ରଶଂସକମାନଙ୍କୁ ଡିଡିସିଏ ସୁରକ୍ଷା ଏବଂ ପୁଲିସ ଫାଟକ ନିକଟରେ ଚିକିତ୍ସା କରିଥିଲେ। ଜଣେ ପ୍ରଶଂସକଙ୍କ ଗୋଡରେ ବ୍ୟାଣ୍ଡେଜ୍ ପକାଯାଇଛି। ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରିବା ସମୟରେ ଜଣେ ସୁରକ୍ଷା କର୍ମୀ ମଧ୍ୟ ଆହତ ହୋଇଛନ୍ତି।

ସୌଜନ୍ୟ-ସମ୍ୱାଦ