ବିଶ୍ବବିଦ୍ୟାଳୟ‌ରେ ବର୍ଷକୁ ଦୁଇଥର ନାମଲେଖା: ଚିଠା ପ୍ରସ୍ତାବ ଜାରି କରି ମତାମତ ଲୋଡ଼ିଲା ୟୁଜିସି

ଭୁବନେଶ୍ବର: ବିଶ୍ବବିଦ୍ୟାଳୟଗୁଡ଼ିକରେ ବର୍ଷକୁ ଦୁଇଥର ନାମଲେଖା କରାଯିବ। ଜୁଲାଇ/ଅଗଷ୍ଟ ମାସରେ ଗୋଟିଏ ଏବଂ ଜାନୁଆରି/ଫେବ୍ରୁଆରିରେ ଦ୍ବିତୀୟ ନାମଲେଖା ହେବ। ୟୁଜିସି ନିୟମାବଳୀ ଅନୁଯାୟୀ ବିଶ୍ବବିଦ୍ୟାଳୟର ଏକାଡେମିକ୍‌ ଓ ଭିତ୍ତିଭୂମି, ଛାତ୍ରଛାତ୍ରୀ-ଶିକ୍ଷକ ଅନୁପାତ, ଶିକ୍ଷକ-ଅଣଶିକ୍ଷକ ଅନୁପାତ ଆଧାରରେ ଛାତ୍ରଛାତ୍ରୀଙ୍କ ନାମଲେଖା କରାଯିବ। କ୍ଲାସରୁମ୍‌, ଲାବରେଟୋରି, ଲାଇବ୍ରେରି, କ୍ରୀଡ଼ା ଓ ସ୍ବାସ୍ଥ୍ୟ ସୁବିଧା, ହଷ୍ଟେଲ, କ୍ୟାଣ୍ଟିନ୍‌/କାଫେଟେରିଆ ସମେତ ଅନ୍ୟାନ୍ୟ ସୁବିଧା‌ ଉପଲବ୍ଧ ବାଧ୍ୟତାମୂଳକ ହେବ। ୟୁଜି ଓ ପିଜି ପାଠ୍ୟକ୍ରମରେ ଏକୀକରଣ ଉଚ୍ଚଶିକ୍ଷା, ଧନ୍ଦାମୂଳକ ଶିକ୍ଷା, ତାଲିମ ଓ ଦକ୍ଷତା, ଇଣ୍ଟର୍ଣ୍ଣସିପ୍‌ ବ୍ୟବସ୍ଥା ରହିବ। କ୍ରେଡିଟ୍‌ ଫ୍ରେମ୍‌ୱାର୍କ, ଉଚ୍ଚ ଶିକ୍ଷାନୁଷ୍ଠାନରେ ବହୁମୁଖୀ ପ୍ରବେଶ ଓ ପ୍ରସ୍ଥାନ ବ୍ୟବସ୍ଥା, ଛାତ୍ରଛାତ୍ରୀ ଧନ୍ଦାମୂଳକ ଶିକ୍ଷାରୁ ସାଧାରଣ ଶିକ୍ଷା ଗ୍ରହଣ କରିବାକୁ ଯାଇପାରିବେ। ଯୁକ୍ତ୨ ତଥା ଦ୍ବାଦଶ ଶ୍ରେଣୀ ତଥା ସମାନ ପାଠ୍ୟକ୍ରମରେ ଉତ୍ତୀର୍ଣ୍ଣ ହୋଇଥିବା ଯେକୌଣସି ବିଦ୍ୟାର୍ଥୀ ୟୁଜି(ସ୍ନାତକ) ପାଠ୍ୟକ୍ରମରେ ନାମ ଲେଖାଇପାରିବେ। ଜାତୀୟ ତଥା ବିଶ୍ବବିଦ୍ୟାଳୟ ସ୍ତରୀୟ ୟୁଜି ପ୍ରବେଶିକା ପରୀକ୍ଷାରେ ଉତ୍ତୀର୍ଣ୍ଣ ହୋଇଥିବା ଯେକୌଣସି ଛାତ୍ରଛାତ୍ରୀ ୟୁଜି ପାଠ୍ୟକ୍ରମରେ ନାମଲେଖାଇବାକୁ ଯୋଗ୍ୟତା ଅର୍ଜନ କରିବେ। ୩-ବର୍ଷିଆ ୟୁଜି ଡିଗ୍ରିଧାରୀ(ଲେବୁଲ୍‌-୫.୫, ୧୨୦ କ୍ରେଡିଟ୍‌) ଓ ୪-ବର୍ଷିଆ ୟୁଜି ଡିଗ୍ରିଧାରୀ(ଲେବୁଲ୍‌-୬, ୧୬୦ କ୍ରେଡିଟ୍‌) ଛାତ୍ରଛାତ୍ରୀ ପିଜି ପାଠ୍ୟକ୍ରମରେ ନାମଲେଖା ପାଇଁ ଯୋଗ୍ୟତା ଅର୍ଜନ କରିବେ। ଜାତୀୟ ଶିକ୍ଷା ନୀତି(ଏନ୍‌ଇପି)-୨୦୨୦ ଆଧାରରେ ଉଚ୍ଚଶିକ୍ଷାନୁଷ୍ଠାନର ୟୁଜି ଓ ପିଜି ପାଠ୍ୟକ୍ରମରେ ନାମଲେଖା ପାଇଁ ବିଶ୍ବବିଦ୍ୟାଳୟ ଅନୁଦାନ ଆୟୋଗ(ୟୁଜିସି) ପକ୍ଷରୁ ପ୍ରସ୍ତୁତ ହୋଇଥିବା ୨୦୨୪ ଚିଠା ପ୍ରସ୍ତାବରେ ଏଭଳି ବ୍ୟବସ୍ଥା ସମ୍ପର୍କରେ ସୂଚନା ଦିଆଯାଇଛି।

ପରୀକ୍ଷା ପଦ୍ଧତି ସମ୍ପର୍କରେ ନାମଲେଖା ବେଳେ ଜଣାଇବେ
ଚିଠା ପ୍ରସ୍ତାବ ଜାରି କରି ମତାମତ ଲୋଡ଼ିଲା ୟୁଜିସି

ଏହାବ୍ୟତୀତ ଭିତ୍ତିଭୂମିକୁ ଦେଖି ବିଶ୍ବବିଦ୍ୟାଳୟ କର୍ତ୍ତୃପକ୍ଷ ୟୁଜିର କିଛି ଛାତ୍ରଛାତ୍ରୀଙ୍କୁ ସିଧାସଳଖ ଦ୍ବିତୀୟ/ତୃତୀୟ/ଚତୁର୍ଥ ବର୍ଷରେ ଏବଂ ପିଜିର ଦ୍ବିତୀୟ ବର୍ଷରେ ନାମଲେଖାଇପାରିବେ। ନ୍ୟାସନାଲ କ୍ରେଡିଟ୍‌ ଫ୍ରେମ୍‌ୱାର୍କ ଆଧାରରେ ପ୍ରବେଶ ଓ ପ୍ରସ୍ଥାନକୁ ଦେଖି କର୍ତ୍ତୃପକ୍ଷ ଏଭଳି ନିଷ୍ପତ୍ତି ନେଇପାରିବେ। ଜଣେ ବିଦ୍ୟାର୍ଥୀ ଏକା ସମୟରେ ଦୁଇଟି ୟୁଜି ପାଠ୍ୟକ୍ରମରେ ଶିକ୍ଷାଗ୍ରହଣ କରିପାରିବେ। ୟୁଜିସି ଅନୁମୋଦିତ ଉଚ୍ଚ ଶିକ୍ଷାନୁଷ୍ଠାନରେ ହିଁ ଛାତ୍ରଛାତ୍ରୀ କେବଳ ଅନ୍‌ଲାଇନ୍‌ ମୋଡ୍‌ରେ ଡିଗ୍ରି ପାଠ୍ୟକ୍ରମରେ ଶିକ୍ଷା ଗ୍ରହଣ କରିପାରିବେ। ବିଶ୍ବବିଦ୍ୟାଳୟ ଓ ସ୍ବୟଂଶାସିତ ମହାବିଦ୍ୟାଳୟଗୁଡ଼ିକ ପାଠ୍ୟକ୍ରମ, ଏଜୁକେସନାଲ ଟେକ୍ନୋଲୋଜି, ସମୟ ଅବଧି, ନିୟମିତ ଭାବେ ମୂଲ୍ୟାୟନ ଓ ଆସେସ୍‌ମେଣ୍ଟ ପଦ୍ଧତି ସମ୍ପର୍କରେ ନିଷ୍ପତ୍ତି ନେବେ। ଏନ୍‌ଇପି-୨୦୨୦ ଆଧାରରେ ବିଭିନ୍ନ ପାଠ୍ୟକ୍ରମରେ ଛାତ୍ରଛାତ୍ରୀଙ୍କ ଉପସ୍ଥାନ କେତେ ରହିବ ସେନେଇ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକ ନିଷ୍ପତ୍ତି ଗ୍ରହଣ କରିବେ। ୟୁନିଟ୍‌ର ମୂଲ୍ୟାୟନ, ପରୀକ୍ଷା, ସେମିନାର, ପ୍ରେଜେଣ୍ଟେସନ, କ୍ଲାସ ପର୍ଫମାନ୍ସ, ଫିଲ୍ଡୱାର୍କ ଆଦି ବିଷୟ ଉପରେ ବିଶ୍ବବିଦ୍ୟାଳୟ ଏକାଡେମିକ୍‌ ନିଷ୍ପତ୍ତି ନେବ। ଚୂଡ଼ାନ୍ତ ପରୀକ୍ଷା(ଅନ୍‌ଲାଇନ୍‌/ଅଫ୍‌ଲାଇନ୍‌) କିମ୍ବା ଉଭୟ ପଦ୍ଧତିରେ କରାଯିବ ସେସମ୍ପର୍କରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଶିକ୍ଷାବର୍ଷ ଆରମ୍ଭରୁ ଛାତ୍ରଛାତ୍ରୀଙ୍କୁ ଅବଗତ କରାଇବେ। ସେମିଷ୍ଟର/ବର୍ଷ ଶେଷ ପରୀକ୍ଷା ବ୍ୟତୀତ ନିୟମିତ ବ୍ୟବଧାନରେ ପାଠ୍ୟକ୍ରମଗୁଡ଼ିକର ମୂଲ୍ୟାୟନ କରାଯିବ। ମୂଲ୍ୟାୟନ ପଦ୍ଧତି ସ୍ବଚ୍ଛ ଓ ଲୁକ୍କାୟିତ ହିବ। ୟୁଜି ଡିଗ୍ରିର ସମୟ ଅବଧୀ ୩ କିମ୍ବା ୪ ବର୍ଷ ହେବାକୁ ଥିବା ବେଳେ ପିଜି ଡିଗ୍ରିର ଅବଧି ୧ କିମ୍ବା ୨ ବର୍ଷ ରହିବ। କେଉଁଭଳି ଭାବେ ଛାତ୍ରଛାତ୍ରୀଙ୍କୁ କ୍ରେଡିଟ୍‌ ମିଳିବ ସେସମ୍ପର୍କରେ ୟୁଜିସି ପକ୍ଷରୁ ଜାରି ଚିଠା ପ୍ରସ୍ତାବରେ ବିସ୍ତୃତ ଭାବେ ଉଲ୍ଲେଖ କରାଯାଇଛି।
ଯଦି କୌଣସି ଉଚ୍ଚଶିକ୍ଷାନୁଷ୍ଠାନ ନିୟମର ଉଲ୍ଲଂଘନ କରନ୍ତି ତାହାହେଲେ ୟୁଜିସି ପକ୍ଷରୁ ଏକ ତଦନ୍ତ କମିଟି ଗଠନ କରି‌ବେ। ଏହି କମିଟି ରିପୋର୍ଟ ଆଧାରରେ ଶିକ୍ଷାନୁଷ୍ଠାନ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ। ୟୁଜିସି ଯୋଜନା, ଡିଗ୍ରି କାର୍ଯ୍ୟକ୍ରମ, ଅନ୍‌ଲାଇନ୍‌ ମୋଡ୍‌ କାର୍ଯ୍ୟକ୍ରମରୁ ବଞ୍ଚିତ, ୟୁଜିସି ୧୨(ବି)ରୁ ବାଦ୍‌ ପରି କାର୍ଯ୍ୟାନୁଷ୍ଠାନ ହୋଇପାରେ ବୋଲି ଏଥିରେ କୁହାଯାଇଛି। ଏହି ଚିଠା ପ୍ରସ୍ତାବ ଉପରେ ଯେକୌଣସି ବ୍ୟକ୍ତି କିଛି ବି ମତାମତ ଦେବାକୁ ଚାହିଁବେ ସେମାନେ ଡିସେମ୍ବର ୨୩ ସୁଦ୍ଧା ଜଣାଇପାରିବେ ବୋଲି ୟୁଜିସି ପକ୍ଷରୁ କୁହାଯାଇଛି।

ସୌଜନ୍ୟ-ସମ୍ୱାଦ