‘ବେବି ଜନ୍‌’ର ଟ୍ରେଲର ରିଲିଜ୍‌, ଆସନ୍ତା ୨୫ରେ ପ୍ରେକ୍ଷାଳୟକୁ ଆସିବ ଫିଲ୍ମ

ମୁମ୍ବାଇ ୧୧/୧୨: ନିଜର ଅପ୍‌କମିଂ ଫିଲ୍ମ ‘ବେବି ଜନ୍‌’କୁ ନେଇ ଲଗାତର ଚର୍ଚ୍ଚାରେ ଅଛନ୍ତି ଅଭିନେତା ବରୁଣ ଧୱନ । ଆସନ୍ତା ୨୫ରେ ଫିଲ୍ମଟି ପ୍ରେକ୍ଷାଳୟକୁ ଆସିବ । ତା’ ପୂର୍ବରୁ ଫିଲ୍ମର ଧମାକାଦାର ଟ୍ରେଲର ରିଲିଜ୍‌ ହୋଇଛି । ୩ ମିନିଟ୍‌ ୬ ସେକେଣ୍ଡର ଟ୍ରେଲରରେ ବରୁଣଙ୍କୁ ଦମଦାର ଆକ୍ସନ୍‌ ଅବତାରରେ ଦେଖିବାକୁ ମିଳୁଛି । ଜ୍ୟାକି ଶ୍ରଫ୍‌ ଏଥିରେ ମୁଖ୍ୟ ଖଳନାୟକ ହୋଇଥିବାବେଳେ ଡିସିପି ବରୁଣ ତାଙ୍କ ସହିତ ଟକ୍କର ନେଉଛନ୍ତି । ଫିଲ୍ମଟି ମଧ୍ୟ ଇମୋସନାଲ ଡ୍ରାମା ଓ କମେଡିରେ ଭରପୁର । ତେଣୁ ଦର୍ଶକମାନେ ଏଥିରୁ ଭରପୁର ମନୋରଞ୍ଜନ ପାଇବେ ବୋଲି ଟ୍ରେଲରକୁ ସୋସିଆଲ ମିଡିଆରେ ସେୟାର କରି ବରୁଣ ଲେଖିଛନ୍ତି । ବରୁଣଙ୍କ ସହିତ ଏଥିରେ ଅଭିନେତ୍ରୀ କୀର୍ତ୍ତି ସୁରେଶ, ୱାମିକା ଗାବିଙ୍କୁ ଦେଖିବାକୁ ମିଳିବ । ସେହିପରି ଭାଇଜାନ୍‌ ସଲମାନ୍‌ ଖାନ୍‌, ସାନ୍ୟା ମଲହୋତ୍ରା ମଧ୍ୟ କ୍ଷୁଦ୍ର ଭୂମିକାରେ ନଜର ଆସିବେ । ‘ବେବି ଜନ୍‌’ ତାମିଲ ସୁପରଷ୍ଟାର ବିଜୟଙ୍କ ଅଭିନୀତ ଫିଲ୍ମ ‘ଥେରି’ର ହିନ୍ଦୀ ରିମେକ୍‌ । ଏହାର କାହାଣୀ ଏକ ପିତାପୁତ୍ରୀଙ୍କ ଉପରେ ଆଧାରିତ । କାଲିସ୍‌ ଏହାର ନିର୍ଦ୍ଦେଶନା ଦେଇଥିବାବେଳେ ଅଟଲି ପ୍ରଯୋଜନାରେ ଅଛନ୍ତି । ପ୍ରାୟତଃ ରୋମାଣ୍ଟିକ ଅବତାରରେ ନଜର ଆସୁଥିବା ବରୁଣ ଧୱନଙ୍କ କ୍ୟାରିୟର ଲାଗି ଏହି ଫିଲ୍ମଟି ଏକ ଟର୍ଣ୍ଣିଂ ପଏଣ୍ଟ ସାବ୍ୟସ୍ତ ହୋଇପାରେ ବୋଲି କୁହାଯାଉଛି ।

ସୌଜନ୍ୟ-ପ୍ରମେୟ