ବ୍ୟାଙ୍କ ହଟାଇଲେ ୪୨,୦୦୦ କୋଟି ଋଣ

ନୂଆଦିଲ୍ଲୀ: ଚଳିତ ଆର୍ଥିକ ବର୍ଷର ପ୍ରଥମ ଛଅ ମାସରେ ସରକାରୀ ବ୍ୟାଙ୍କଗୁଡ଼ିକ ନିଜ ଋଣ ଖାତାରୁ ୪୨ ହଜାର କୋଟି ଟଙ୍କା ରାଇଟ୍‌ ଅଫ୍‌ କରିଛନ୍ତି। ରାଇଟ୍‌ ଅଫ୍‌ ହେଉଛି ସେହି ପ୍ରକ୍ରିୟା ଯେଉଁଥିରେ ଅସୁଲ ହେବାରେ ଅସୁବିଧା ହେଉଥିବା ଋଣଗୁଡ଼ିକ ଲାଗି ପାଣ୍ଠିର ବ୍ୟବସ୍ଥା କରିବା ପରେ ତାହାକୁ ହିସାବ ଖାତାରୁ ହଟାଇ ଦିଆଯାଏ। ତେବେ ସେହି ଋଣଗୁଡ଼ିକୁ ଅସୁଲ କରିବା ଲାଗି ପ୍ରକ୍ରିୟା କିନ୍ତୁ ପୂର୍ବଭଳି ଜାରି ରହିଥାଏ।

ସଂସଦରେ ଉପସ୍ଥାପିତ ତଥ୍ୟ ଅନୁଯାୟୀ ଭାରତୀୟ ଷ୍ଟେଟ୍‌ ବ୍ୟାଙ୍କ ୮,୩୧୨ କୋଟି ଟଙ୍କା, ପଞ୍ଜାବ ନ୍ୟାସନାଲ୍ ବ୍ୟାଙ୍କ ୮୦୬୧ କୋଟି ଟଙ୍କା, ୟୁନିୟନ୍ ବ୍ୟାଙ୍କ ଅଫ୍ ଇଣ୍ଡିଆ ୬୩୪୪ କୋଟି ଟଙ୍କା ଓ ବ୍ୟାଙ୍କ ଅଫ୍ ବରୋଦା ୫୯୨୫ କୋଟି ଟଙ୍କାର ଋଣ ରାଇଟ୍‌ ଅଫ୍‌ କରିଛନ୍ତି। ଏ ସମ୍ପର୍କରେ ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ କହିଛନ୍ତି ଯେ ରାଇଟ୍‌ ଅଫ୍‌ରେ ଗ୍ରାହକଙ୍କ ପାଇଁ ଋଣ ଛାଡ଼ ହୁଏ ନାହିଁ। ଏଥିରେ ଗ୍ରାହକଙ୍କୁ କିଛି ଲାଭ ମିଳେ ନାହିଁ। ପୂର୍ବଭଳି ବିଭିନ୍ନ ଉପାୟରେ ଗ୍ରାହକଙ୍କଠାରୁ ଋଣ ଅସୁଲ କରିବା ପ୍ରକ୍ରିୟା ଜାରି ରହିଥାଏ। ୨୦୨୩-୨୪ ଆର୍ଥିକ ବର୍ଷରେ ସରକାରୀ ବ୍ୟାଙ୍କଗୁଡ଼ିକ ୧.୧୪ ଲକ୍ଷ କୋଟି ଟଙ୍କାର ଋଣ ରାଇଟ୍‌ ଅଫ୍‌ କରିଥିଲେ। ୨୦୨୨-୨୩ରେ ସେମାନେ ୧.୧୮ ଲକ୍ଷ କୋଟି ଟଙ୍କାର ଋଣ ରାଇଟ୍‌ ଅଫ୍‌ କରିଥିଲେ। ଚଳିତ ବର୍ଷର ଏପ୍ରିଲ୍‌ରୁ ସେପ୍ଟେମ୍ବର ମଧ୍ୟରେ ବ୍ୟାଙ୍କଗୁଡ଼ିକ ଆଉ ୪୨,୦୩୫ କୋଟି ଟଙ୍କାର ଋଣ ରାଇଟ୍‌ ଅଫ୍‌ କରିଥିବା ସହିତ ୩୭,୨୫୩ କୋଟି ଟଙ୍କା ଅସୁଲ କରିଛନ୍ତି।

ସୌଜନ୍ୟ-ସମ୍ୱାଦ