ଭରତପୁରରେ ପୁଲିସକୁ ଆକ୍ରମଣ ଘଟଣା: ବନ୍ଧାହେଲେ ୨

ଭୁବନେଶ୍ବର: ଶୁକ୍ରବାର ବିଳମ୍ବିତ ରାତିରେ ବନଦୁର୍ଗାସାହିରେ ଭରତପୁର ଥାନା ପୁଲିସକୁ ଆକ୍ରମଣ କରିଥିବା ଅଭିଯୋଗରେ ୨ଜଣଙ୍କୁ ଗିରଫ କରାଯାଇଛି। ଆଜି ଭରତପୁର ଥାନା ପୁଲିସ ଦ୍ବାରା କୋର୍ଟ ଚାଲାଣ ହୋଇଥିବା ୨ଅଭିଯୁକ୍ତ ହେଲେ ସେହି ସାହିର ଦେବବ୍ରତ ନାୟକ ଓରଫ ଦୀପୁ(୨୭) ଓ ବିଦେଶୀ ନାୟକ(୪୦)। ଏହି ମାମଲାରେ ସମ୍ପୃକ୍ତ ଆଉ କିଛି ଫେରାର ଅଛନ୍ତି ଏବଂ ପୁଲିସ ସେମାନଙ୍କୁ ଧରିବା ଲାଗି ଚଢ଼ଉ ଚଳାଇଛି। ବନଦୁର୍ଗାସାହିରେ ରହୁଥିବା ଭାସ୍କର ମହାରଣାଙ୍କ ଦୁଇ ପୁଅ ସୂର୍ଯ୍ୟମଣି ଓ ଅଶୋକଙ୍କ ମଧ୍ୟରେ ଘରବାଡ଼ିକୁ ନେଇ ବିବାଦ ଲାଗିରହିଛି। ପ୍ଲଟ୍‌ ନମ୍ବର ୨୨୭୨ରେ ସାନ ପୁଅ ଅଶୋକ ସହିତ ବୃଦ୍ଧ ଭାସ୍କର ରହୁଥିବା ବେଳେ ବଡ଼ ପୁଅ ସୂର୍ଯ୍ୟମଣି ଉକ୍ତ ଘରରୁ ଭାଗ ନେବାକୁ ଚାହୁଥିଲା।

ଘଟଣାଦିନ ବିଳମ୍ବିତ ରାତିରେ ସୂର୍ଯ୍ୟମଣି ଦଳବଳ ନେଇ ସେଠାରେ ପହଞ୍ଚି ଗଣ୍ଡଗୋଳ କରିଥିଲା। ସୂର୍ଯ୍ୟମଣିଙ୍କ ସ୍ତ୍ରୀ, ୨ ପୁଅ, ବଡ଼ବୋହୂ ଓ ବଡ଼ପୁଅର ଶଳା ଏମିତି ୬ଜଣ ସଂଘବଦ୍ଧ ଭାବେ ଅଶୋକ, ତାଙ୍କ ସ୍ତ୍ରୀ ଆରତି ଓ ପୁଅ ଶୁଭମ୍‌ଙ୍କୁ ଆକ୍ରମଣ କରିଥିଲେ। ସେମାନେ ଧାରୁଆ ଅସ୍ତ୍ରରେ ଆକ୍ରମଣ କରିବାରୁ ଅଶୋକ କ୍ଷତାକ୍ତ ହୋଇ ପଡ଼ିଯାଇଥିଲେ ଏବଂ ବିକଳରେ ସାହିଲୋକଙ୍କୁ ଡାକ ପକାଇଥିଲେ। ସାହିଲୋକେ ଏକାଠି ହୋଇ ସୂର୍ଯ୍ୟମଣି ଦଳକୁ ଘେରିଯିବାରୁ ସେମାନେ ଏକ ଘରେ ପଶି କବାଟ କିଳି ରହିଯାଇଥିଲେ। ଖବର ପାଇ ଭରତପୁର ଥାନା ପୁଲିସ ପହଞ୍ଚିଥିଲା ଏବଂ ପ୍ରଥମେ ଆହତ ଅଶୋକ ଓ ତାଙ୍କ ପୁଅକୁ ଡାକ୍ତରଖାନା ପଠାଇଥିଲା। ସେହିଭଳି ଅନ୍ୟ ଏକ ଟିମ୍‌ ଆକ୍ରମଣମାରୀ ସୂର୍ଯ୍ୟମଣି ଦଳକୁ ଗିରଫ କରି ଥାନାକୁ ନେବାକୁ ବାହାରିଥିଲା। ଏତିକିବେଳେ ଉତ୍ତ୍ୟକ୍ତ ସାହିଲୋକେ ପୁଲିସ ଗାଡ଼ିକୁ ଘେରିଯାଇଥିଲେ ଏବଂ ଆକ୍ରମଣକାରୀଙ୍କୁ ସେମାନଙ୍କ ଜିମାରେ ଛାଡ଼ିଦେବାକୁ ଅଡ଼ି ବସିଥିଲେ। ପୁଲିସ ସେମାନଙ୍କୁ ବୁଝାସୁଝା କରିଥିଲେ ହେଁ ସେମାନେ କିଛି ନ ବୁଝି ପାଲଟା ପୁଲିସକୁ ଆକ୍ରମଣ କରିଥିଲେ। ସେମାନେ ପିସିଆର୍‌ ଭଙ୍ଗାରୁଜା କରିଥିଲେ ଏବଂ ସେମାନଙ୍କ ଆକ୍ରମଣରେ ୩ ପୁଲିସ କର୍ମଚାରୀ ଆହତ ହୋଇଥିଲେ। ପୁଲିସ ଗତକାଲି ସୂର୍ଯ୍ୟମଣି ଦଳର ୬ଜଣଙ୍କୁ କୋର୍ଟ ଚାଲାଣ କରିଥିଲା।

ସୌଜନ୍ୟ-ସମ୍ୱାଦ